فوتو: studychinese.ru

قىتاي پرەزيدەنتى شي جينپيڭ اقش پرەزيدەنتى دونالد ترامپپەن كەزدەسۋ بارىسىندا تايۋان (تايۆان) - اقش-قىتاي قارىم-قاتىناسىنىڭ ەڭ ماڭىزدى ءارى سەزىمتال تۇسى ەكەنىن اتاپ ءوتتى. سونداي-اق ازيالىق ارىپتەس دونالد ترامپتان امەريكانىڭ ء"بىر قىتاي" جوباسىن قولداعانىن قۇپ كورەتىنىن جاسىرمادى. بۇل تۋرالى Reuters اقپاراتتىق اگەنتتىگى جازدى. 

قىتاي تايۋاندى ءوزىنىڭ اجىراماس بولىگى رەتىندە قاراستىرادى جانە ونى مەملەكەت ىشىندەگى ءبىر ايماق ستاتۋسىنان ارتىق "جەكە مەملەكەت" ەسەبىندە كورە المايدى. اقش-تىڭ تايۋانمەن رەسمي قارىم-قاتىناستارى بولماعانىمەن، امەريكا تىنىق مۇحيتىنداعى ارالدى قورعاۋ تۋرالى كەلىسىمگە قول قويعان جانە بۇل ەلگە قارۋ-جاراقتىڭ نەگىزگى تاسىمالداۋشىسى.

دەگەنمەن وتكەن جىلى تايۋاننىڭ پرەزيدەنتى بولىپ سايلانعان تساي ينۆەننىڭ جەلتوقسان ايىندا دونالد ترامپپەن تەلەفون ارقىلى سويلەسۋى قىتايعا ۇناعان جوق. ويتكەنى بۇل 1979 جىلى اقش پرەزيدەنتى دجيم كارتەر تايۋاندى ەمەس، قىتايدى مويىنداۋ ساياساتىنا كوشكەننەن بەرى جاسالعان ەڭ العاشقى تەلەفون بايلانىسى بولدى.

شي جينپيڭ دونالد ترامپقا امەريكانىڭ ء"بىر قىتاي" جوباسىن قولداپ، مەملەكەتتىڭ تۇتاستىعى يدەياسىنا قارسى كەلمەيتىنىنە ءۇمىت ارتاتىنىن ايتتى. وسىدان بۇرىن تايۋاننىڭ جاڭا پرەزيدەنتى قىتايمەن اراداعى بەيبىتشىلىكتى ساقتاعىسى كەلەتىنىن، دەگەنمەن ءوز مەملەكەتىنىڭ تاۋەلسىزدىگى مەن دەموكراتيا ورناتۋ ءۇشىن كۇرەسەتىنىن مالىمدەگەن ەدى.

جۋىردا اقش پرەزيدەنتى تايۋان باسشىسىنىڭ تىنىق مۇحيتىنداعى وزگە وداقتاستارىمەن كەزدەسۋ ءۇشىن گاۆاي مەن گۋام ارقىلى ءترانزيتىن قامتاماسىز ەتىپ بەردى. بۇل ماسەلە دە قىتايدىڭ شامىنا تيگەنى راس. بۇگىن كەلىسسوزدەر اقش-تىڭ "قىتايدىڭ تۇتاستىعى مەن بىرلىگىنە" قارسىلىعى جوق ەكەنىن ايتۋىمەن اياقتالدى. بىراق كوزقاراستاردىڭ كەلەشەكتە قالاي قۇبىلاتىنى بەلگىسىز.

“The Qazaq Times”