يران وكىلدەرى مەن مينيسترلەرى اقش پەن ساۋد ارابياسىن جاپپاي ايىپتادى

ساۋد ارابياسى وتكەن اپتانىڭ سوڭىندا ەلدىڭ ورتالىق قالاسى ەر-ريادتىڭ كەڭىستىگىنەن بالليستيكالىق زىمىراندى اتىپ قۇلاتقاندارى تۋرالى مالىمدەگەن بولاتىن. اقش تارابى يەمەننەن اتىلعان بۇل زىمىراننىڭ جاۋاپكەرشىلىگى يراننىڭ موينىندا ەكەنىن ايتۋدا. دەگەنمەن، تەھران (تەگەران) بيلىگى بۇنى تەرىسكە شىعاردى. بۇل تۋرالى وسى ەلدىڭ رەسمي «پارس.اقپارات» اگەنتتىگى حابارلاعان ەدى.

يران قورعانىس ءمينيسترى جاساعان مالىمدەمەدە: «ولار بىزگە ايىپ تاعۋ ءۇشىن بارلىق مۇمكىندىكتەرىن پايدالانۋدا. الايدا ءبىز بۇنى سوڭىنا دەيىن تەكسەرىپ انىقتايتىن بولامىز دەستى. اتالعان ەلدىڭ تاراتقان حابارىندا، اقش-تىڭ بارلىق قادامىن يرانعا قاراتا جاۋلىق ساياساتى رەتىندە كورسەتكەن. يران جاق اقش ۇكىمەتىن ايىپتاۋ سوزىندە «بالا ءولتىرۋشى رەجيمدەردى (ساۋد ارابياسىن ايتىپ وتىر) جانە قياناتشىل يزرايل ەلدەرىنىڭ يەمەن مەن پالەستيناداعى ارەكەتتەرىن قولدادى» دەپ ايىپتاعان.

ال، يراننىڭ بۇۇ-داعى تۇراقتى وكىلى ۇيىمنىڭ باس حاتشىسى مەن قاۋىپسىزدىك كەڭەسى توراعاسىنا حات جولداپ، ساۋد ارابيانىڭ سىرتقى ساياساتتارىنا نارازىلىق ءبىلدىردى. وعان قوسا ساۋد ارابياسىنا قىسىم ءتۇسىرۋدى تالاپ ەتتى. بۇل جەردە يران يەمەندەگى سوعىس پەن كاتار داعدارىسىن العا تارتىپ، ساۋد جۇرتى وڭىردە ارانداتۋشىلىق جاساپ وتىر دەپ ايىپتادى.

سونىمەن بىرگە يراننىڭ ءسىم باسشىسى دا فرانتسيا ساپارى كەزىندە، اقش-تىڭ يران يادرولىق كەلىسىمىنە قاراتقان ۇستانىمىن تەرىستەپ، «حالىقارالىق كەلىسىمدى بۇزۋ» دەپ ايىپتادى. ال، يراننىڭ بۇل ماسەلەدە كەز-كەلگەن قادامعا دايىن ەكەنىن باسا ايتتى.

“The Qazaq Times”