اقش پرەزيدەنتى دونالد ترامپ. فوتو: NDTV Gadgets.

اقش قورعانىس ءمينيسترى جيم مەتتيس مالىمدەمە جاساپ: «امەريكا قۇراما شتاتتارى سولتۇستىك كورەيانىڭ يادرولىق قارۋ-جاراق باعدارلاماسىن توقتاتۋ ءۇشىن ديپلوماتيالىق جانە ەكونوميكالىق قىسىم جاساۋعا دايىن»، – دەدى. ول ەسكەرتۋ جاساي وتىرىپ، قارۋلى كۇشتەردىڭ دە كەلىسسوزدىڭ ءساتسىز اياقتالۋىنا جول بەرمەۋ ءۇشىن دايىن تۇرعانىن اتاپ ءوتتى. بۇل تۋرالى “WSJ” باسىلىمى حابارلادى.

مەتتيس سوزىندە كورەي تۇبەگىندە سوعىس بولعان جاعدايداعى بارلىق سۇمدىق وقيعالاردى اتاپ ءوتتى. سونىمەن بىرگە اقش مەملەكەتتىك دەپارتامەنتى مەن بىرىككەن ۇلتتار ۇيىمى ديپلوماتيا مەن سانكتسيالاردا جەتەكشىلىك ەتەتىنىن ايتتى.

جيم مەتتيس اقش قارۋلى كۇشتەرىنىڭ كەزەكتى جينالىسىندا ديپلوماتيالىق قۇرالدار مەن ەكونوميكالىق سانكتسيالار ارقىلى سولتۇستىك كورەيانىڭ يادرولىق باعدارلاماسىن توقتاتۋ كەزەك كۇتتىرمەيتىن ءىس ەكەنىن باسا ايتتى. بۇل ءدۇبىرلى وتىرىسقا وداقتاس ەلدەردىڭ بايلانىس وفيتسەرلەرى مەن قورعانىس مەردىگەرلەرى دە قاتىستى.

ال، اقش پرەزيدەنتى دونالد ترامپ وتكەن اپتانىڭ سوڭىندا سولتۇستىك كورەيامەن جاسالاتىن كەلىسسوزدىڭ الدەقاشان ساتسىزدىككە ۇشىراعانىن، ال اقش ارمياسىنىڭ «داۋىل الدىنداعى تىنىشتىق» كۇيىندە تۇرعانىن ايتقان ەدى.

“The Qazaq Times”