فوتو: correspondent.ru

سولتۇستىك كورەيانىڭ سىرتقى ىستەر ءمينيسترى اقش پرەزيدەنتى دونالد ترامپتى كحدر-گە قارسى "سوعىس جاريالادى" دەپ ايىپتاپ، ءوز مەملەكەتىنىڭ ارەكەتىن "قورعانۋ ماقساتىنداعى جاسالعان قادامدار" دەپ ءتۇسىندىردى. ري يوڭ حو (Ri Yong Ho) مىرزا سوعىس قاۋپى جاعدايىندا سولتۇستىك كورەيا قارۋ قولدانۋعا قۇقىلى دەپ ەسەپتەيدى. بۇل تۋرالى ۆۆس اقپاراتتىق قىزمەتى جازدى. 

سولتۇستىك كورەيانىڭ سىرتقى ىستەر ءمينيسترى نيۋ-يورككە بۇۇ ساپارىنان قايتار ساتتە جۋرناليستەرگە بەرگەن سۇحباتىندا: "بۇكىل الەم كحدر مەملەكەتىنە قارسى سوعىستى العاش بولىپ امەريكا اشقانىن ەسىندە ساقتاۋى كەرەك" ، - دەپ مالىمدەدى. ۆۆس اقپاراتتىق اگەنتتىگى لي ەن حو مىرزانىڭ بۇل پىكىرى دونالد ترامپتىڭ ءوزىنىڭ تۆيتتەر پاراقشاسىندا قالدىرعان "ەگەر سولتۇستىك كورەيا باسشىلىعى ءدال وسى ارەكەتىن جالعاستىرا بەرسە، جۋىردا ولار مۇلدە بولماۋى مۇمكىن" دەگەن جازباسىنا جاۋابى دەپ تۇيەدى.

اق ءۇي كحدر وكىلىنىڭ جاۋابىن "اقىلعا قونىمسىز" دەپ قابىلدادى. پەنتاگون پيوڭياڭعا پروۆوكاتسيالار جاساماۋعا شاقىرىپ، قاتاڭ ەسكەرتۋ جاسادى. بۇۇ-نىڭ باس حاتشىسى انتونيۋ گۋتەرريش اتالعان مالىمدەمە ۇلكەن تۇسىنىسپەۋشىلىككە ۇلاسۋى مۇمكىن دەپ الاڭداۋشىلىق ءبىلدىردى.

سونداي-اق، سولتۇستىك كورەيانىڭ سىرتقى ىستەر ءمينيسترى: "اقش ەلىمىزگە قارسى سوعىس جاريالاعاننان كەيىن، ونىڭ اسكەري ۇشاقتارى  اۋە كەڭىستىگىمىزدە جۇرمەسە دە، ءبىزدىڭ قارسىلاستىڭ ماڭىزدى ستراتەگيالىق بومبىلاۋ نىساندارىن اتقىلاۋعا قۇقىعىمىز بار", - دەدى. ري يوڭ حو-نىڭ (Ri Yong Ho) پىكىرى اقش-تىڭ اۋە كۇشتەرى اسكەري جاتتىعۋ كەزىندە سولتۇستىك كورەيا شەكاراسىنا جاقىن اۋماقتا ۇشقان كورسەتىلىم شاراسىنان كەيىن، اراعا ەكى كۇن سالىپ، جاريالانىپ وتىر.

قىتايدىڭ بۇۇ-داعى ەلشىسى "بارلىعىنىڭ تىنىشتالعانىن قالايمىز. جاعدايدىڭ ۋشىققانىنا ەشكىم دە مۇددەلى ەمەس، كۇننەن كۇنگە قورقىنىش ۇدەپ بارادى" دەگەن پىكىر ايتتى.

ەكى ەل اراسىنداعى كۇرمەۋى قيىن قاتىناستار تاريحتاعى ەڭ ۇلكەن ء"سوز سوعىسىنا" ۇلاسقالى ءبىراز ۋاقىت بولدى. بارلىق الەمنىڭ قاۋىپتەنىپ، قالت جىبەرمەي باقىلاپ وتىرعان دۇنيەسى ء"سوز سوعىسى شىنايى سوعىسقا اينالىپ كەتپەيدى مە؟" دەگەن قورقىنىش بولىپ وتىر.

“The Qazaq Times”