فوتو: BBC.com

كىتاپ – جانىڭدى تازارتاتىن، تۇسىندىرۋدەن جالىقپايتىن ەڭ سابىرلى ۇستاز دەپ جاتادى. وسى قاعيدانى بالاباقشادان جوو-نا دەيىنگى ارالىقتاعى ءبىلىم الۋشىلاردىڭ بارلىعىنا ۇيرەتەدى. ءبىرى ەسكەرسە، ءبىرى ەسكەرە بەرمەيدى. «ءار قازاق وقۋعا ءتيىس 50 كىتاپ» نەمەسە «ءار ستۋدەنت وقۋعا ءتيىس 100 كىتاپ» جوبالارىن بىلەمىز. اقش-تا وسىعان ۇقساس «بالاباقشاعا دەيىن 1000 كىتاپ» جوباسى بار ەكەن. بالاباقشاعا ءبۇلدىرشىن ءارىپ تانۋعا بارادى ەمەس پە دەگەن تاڭدانىسىمىزدى جاسىرا المادىق. دەسە دە ناتيجە بار!

داليا ماري ارانا – اقش-تىڭ گەينسۆيلل قالاسىنىڭ ءتورت جاسار تۇرعىنى. ونىڭ وقىعان كىتاپتارىنىڭ ءتىزىمى  مىڭنان اسادى ەكەن. كىتاپقۇمارلىعىنىڭ ارقاسىندا دالياعا كونگرەسستەگى كىتاپحانادا «ءبىر كۇنگە كىتاپحاناشى» بولۋ مۇمكىندىگى  تۋدى.

كونگرەسس كىتاپحاناسىندا

داليانىڭ اكەسىنىڭ ايتۋىنشا، ءبىر جاسىنا تولار كەزىندە ءارىپ تانىپ، وقىپ ۇيرەنگەن. قىزىنىڭ كىتاپتاعى سوزدەردى «كەمىرىپ» وتىراتىندىعىن بايقاعان اناسى، وعان «بالاباقشاعا دەيىن 1000 كىتاپ» جوباسىنا قاتىسىپ كورۋدى ۇسىنعان. عارىشتىق جىلدامدىقپەن قىزدارىنىڭ ادەبيەتتەردى مەڭگەرىپ شىعاتىنىنا ەشكىم سەنبەگەن. قىزدارى ءالى 4-كە دە تولماعان، ۇسىنىلعان 1000 كىتاپتى وقىپ، ەشكىم ويلاماعان بەلەستى باعىندىرعان.

وسىنداي جەتىستىكتەرىن ەستىگەننەن كەيىن،  ارانا وتباسىن تۇگەل كونگرەسسكە شاقىرىپ، كىتاپحاناسىنا ساياحات جاساتقان. اقش-تا اتالمىش كىتاپحانادا كىتاپحاناشى بولۋ – ابىرويلى قىزمەت، ۇلكەن جاۋاپكەرشىلىكتى تالاپ ەتەدى. دالياعا كىتاپحاناشىنىڭ ورنىنا ءبىر كۇن قىزمەت ەتۋگە ۇسىنىس جاساعان. وسىنداي ەرەكشە سىي-قۇرمەتكە يە بولعان دالياعا جارايسىڭ دەيمىز! 4 ەمەس، 40 جاسىندا دا وسىنشاما كىتاپ وقىماعان قانشا حالىق بار. تەك قۇلشىنىسىڭ ودان سايىن ارتىپ، كىتاپقا دەگەن ماحابباتى سۋىماسىن!

قورىتىندى ورنىنا، ءبىز دە ەلىمىزدە وسىنداي اسەمپازدىقپەن ەمەس، جاسامپازدىقپەن كوزگە تۇسەتىن اقىلدىلاردىڭ كوپ بولعانىن قالايمىز. «ادامدار كىتاپ وقىعاندار جانە كىتاپ وقيتىنداردى تىڭدايتىندار دەپ ەكىگە بولىنەدى» دەگەندى ەستىپ ەدىك. ءبىزدىڭ ەلدە العاشقىسى كوپ بولاتىن شىعار. سولاي بولسا ەكەن...

«The Qazaq Times»