تاليبان مالىمدەمەشىسى: اۋعانستان امەريكالىقتار ءۇشىن مولاعا اينالادى

اقش پرەزيدەنتىنىڭ اۋعانستان ساياساتى تۋرالى شەشىمى جاريالانعاننان كەيىن، تاليبان ۇيىمى مالىمدەمە جاساپ، اقش ارمياسىن تەز ارادا اۋعانستاننان شىعارۋىن تالاپ ەتتى. بۇل تۋرالى «Franc-Press»-كە سىلتەمە جاساي وتىرىپ «پارس.اقپارات» اگەنتتىگىنىڭ رەسمي سايتى حابارلادى.

سەيسەنبى كۇنى تاليباننىڭ باس مالىمدەمەشىسى زابيحۋللا مودجاحەت ارناۋلى مالىمدەمە جاساپ، ترامپتىڭ اۋعانستانداعى اسكەر سانىن ارتتىرۋ شەشىمىنە جاۋاپ بەردى. ول سوزىندە: «ەگەر اقش بۇل ەلدەن اسكەرلەرىن الىپ كەتپەسە، اۋعانستان امەريكالىقتار ءۇشىن مولاعا اينالادى»، – دەدى. تاليبان كۇشتەرى اۋعانستان سوعىسى اقش اسكەرلەرىن الىپ كەتكەننەن كەيىن عانا شەشىم تابادى دەپ قارايدى.

اتالعان مالىمدەمەدە جانە دە: «اقش مۇنداعى سوعىستى جالعاستىرۋدىڭ ورنىنا، شەگىنۋ جولدارىن قاراستىرسىن. اقش-تىڭ ءبىر ساربازى قالسا دا ءبىز باسقىنشىلارمەن سوعىستى جالعاستىرا بەرەمىز»، – دەلىنگەن.

اقش پرەزيدەنتى ءوز سوزىندە اۋعانستانداعى اسكەر سانىن قانشاعا ارتتىراتىنىن اشىپ ايتپادى. الايدا، اق ءۇي لاۋازىمدىلارىنىڭ ءبىرى ترامپتىڭ پەنتاگونعا جولداعان نۇسقاۋىن نەگىزگە الا وتىرىپ، اۋعانستانعا 3900 اسكەر كىرگىزۋى مۇمكىن ەكەنىن ايتقان. شەتەلدىڭ كەيبىر ساراپشىلارى بۇل ەلدەگى امەريكا قۇراما شتات ارمياسىنىڭ بەيبىت تۇرعىنداردىڭ ءولىمى مەن ينفراقۇرىلىمداردى بۇلىنۋىنەن باسقا تابىسى جوق دەپ قارايدى.

“The Qazaq Times”