اقش اسكەرلەرى قاراپايىم ادامداردى ولتىرگەن

كەيبىر اقپارات كوزدەرى «اقش كۇشتەرىنىڭ اۋە شابۋىلىنان قۇندىز وبلىسىنداعى ءبىر اۋىلدا قاراپايىم ادامدار قازا بولدى» دەپ ءۋاج ايتقان سوڭ تەكسەرىس باستالدى. وسى اتىس سالدارىنان 33 قاراپايىم ادام قازا تاۋىپ، 27 ادام جارالاندى. اقش ارمياسىنىڭ اۋعانستانداعى شتابى تاراپىنان جۇرگىزىلگەن تەكسەرىس امەريكالىق اسكەريلەردىڭ وتكەن جىلعى قاراشانىڭ ەكىسى كۇنى جاساعان شابۋىلىندا قازا بولعاندار مەن جارالانعاندار بۇرىن ايتىلعان اۋە شابۋىلدارىنان ەمەس، بۇل اسكەريلەردىڭ قۇندىزداعى تۇرعىنداردىڭ ۇيلەرىنە تىكەلەي وق جاۋدىرۋى سالدارىنان ورىن العانىن كورسەتتى. امەريكالىق اسكەريلەر وسى شابۋىلدا قاراپايىم ادامداردى ولتىرگەننەن كەيىن اۋعانستاننىڭ استاناسى كابۋلدا جۇزدەگەن ادام اقش ارمياسىنىڭ حالىقتى قىرىپ-جويۋى مەن بەيباستاق ارەكەتتەرىنە قارسى شەرۋ وتكىزدى. 2015 جىلدىڭ قازان ايىندا اقش ارمياسى اۋە كۇشتەرىنىڭ قۇندىز قالاسىنداعى شەكاراسىز دارىگەرلەر اۋرۋحاناسىنا جاساعان شابۋىلىندا كەمىندە 30 ادام قازا بولىپ، ونداعان ادام جارالانعان جاعدايدا اقش-تىڭ وسى قىلمىسى ورىن الىپ وتىر. 2014 جىلدىڭ اياعىندا اۋعانستاندا  شەتەلدىك كۇشتەردىڭ اسكەري ميسسياسى اياقتالعان سوڭ اقش پەن ناتو تەك كابۋل ۇكىمەتىنىڭ رەسمي وتىنىشىمەن عانا اۋعانستان ارمياسىنا اۋەدەن قولداۋ كورسەتۋ ماقساتىندا اۋە امالدارىن اتقارۋعا مىندەتتەمە العان جاعدايدا اقش ارمياسى اۋعانستاننىڭ ءارتۇرلى وبلىستارىنداعى، سونىڭ ىشىندە قۇندىز وبلىسىنداعى تۇرعىن اۋداندارعا شابۋىلدار جاسادى. اقش ارمياسىنىڭ اۋعانستاندا ورنالاسقان شتابى تاراپىنان امەريكالىق اسكەريلەردىڭ تىكەلەي وق جاۋدىرۋى سالدارىنان قۇندىز وبلىسىندا قاراپايىم ادامداردىڭ ولتىرىلگەنىنىڭ مويىندالۋى – ۆاشينگتوننىڭ اۋعانستاندا تاليبانعا قارسى اسكەري امالدارعا ارالاسپاۋ تۋرالى مىندەتتەمەسىن تاعى دا بۇزعانىنىڭ ءبىر دالەلى. اقش 2015 جىلدىڭ باسىنان باستاپ تەك كابۋل ۇكىمەتىنىڭ رەسمي وتىنىشىمەن اۋعانستان ارمياسىنىڭ لاڭكەستىككە قارسى امالدارىنا اۋەدەن قولداۋ كورسەتىپ، تاليبان مەن باسقا دا ەكسترەميستىك توپتارمەن تىكەلەي قاقتىعىسۋدان باس تارتۋعا ۋادە بەرگەن بولاتىن.

اۋعانستاندا سوعىس جۇرگىزگەن 15 جىلدىڭ ىشىندە ۆاشينگتون ءوز اسكەريلەرىنىڭ اۋعانستانداعى قىلمىستارىن زاڭمەن قۋدالاماعان جاعدايدا اقش ارمياسى وتكەن قاراشا ايىندا قۇندىز حالقىنىڭ قىرىلۋىندا امەريكالىق اسكەريلەردىڭ تىكەلەي وق جاۋدىرۋىنىڭ قاتىسى بارىن مويىنداپ وتىر. سول سەبەپتى جانە امەريكالىق اسكەريلەردىڭ اۋعانستانداعى قىلمىستار سانىنىڭ ارتۋىنا بايلانىستى وسىدان بۇرىن حالىقارالىق قىلمىستىق سوت وسى اسكەريلەردىڭ اۋعانستانداعى قىلمىستارى تۋرالى تەكسەرىستىڭ باستالعانىن حابارلادى. الايدا بۇل اق ءۇيدىڭ قاتاڭ رەاكتسياسىنا ۇشىرادى.  حالىقارالىق قىلمىستىق سوت اۋعانستانداعى اسكەري قىلمىستار تۋرالى كەڭ تۇردە تەكسەرىس جۇرگىزەتىنى تۋرالى ۋادەسىن ورىنداسا، شەتەلدىك كۇشتەردىڭ، اسىرەسە امەريكالىق اسكەريلەردىڭ قورقىنىشتى قىلمىستارىنىڭ قىرلارى الەمنىڭ قوعامدىق پىكىرىنە ودان ارى اشىلا تۇسەتىن بولادى. امەريكالىق اسكەريلەر اۋعانستانداعى سوعىس جىلدارى ونداعان سوعىس قىلمىسىن جاسادى. سونىڭ ىشىندە «قانداعار قىرعىنى» دەگەن اتپەن تانىمال قىلمىستىق ىستە 2012 جىلدىڭ ناۋرىز ايىنىڭ ون ءبىرى كۇنى تاڭەرتەڭ قانداعار وبلىسىنىڭ پاندجۆاي اۋدانىندا روبەرت بيلس ەسىمدى ءبىر امەريكالىق سارباز 18 قاراپايىم اۋعاندىقتى تىكەلەي وق اتىپ ءولتىرىپ، ولاردىڭ دەنەلەرىن ورتەپ جىبەرگەن بولاتىن. – دەپ جاريالادى «فارس» اقپارت اگەنتتىگى.

"The Qazaq Times"