اقش پرەزيدەنتى دونالد ترامپ پەن قىتاي پرەزيدەنتى شي جينپيڭ. فوتو: "ايقىن" گازەتى

اقش پرەزيدەنتى دونالد ترامپ ساۋدا وكىلى روبەرت لايتحايزەرگە قىتايدىڭ ساۋدا-ەكونوميكالىق ىسىنە تەرگەۋ جۇرگىزۋ تۋرالى تاپسىرما بەرىپ، بىرنەشە جارلىقتارعا قول قويدى. 

ەندى پرەزيدەنتتىڭ مۇنداي شەشىمىنە بايلانىستى قوعامدا  "قىتاي مەن اقش اراسىنداعى ساۋدا-ەكونوميكالىق قاتىناستارعا زالال كەلۋى مۇمكىن" دەگەن الاڭداۋشىلىق تۋىنداعان.

سونداي-اق، دونالد ترامپ ساۋداداعى ادىلدىك پەن تەپە-تەڭدىك پرينتسيپتەرىنە كەپىلدىك بولۋى ءۇشىن اقش-تىڭ ساۋدا وكىلىنە بارلىق جاعدايلاردى ەسكەرۋ كەرەكتىگىن ايتقان.

ونىڭ سوزىنشە، اقۇي امەريكالىق كومپانيالاردىڭ ينتەللەكتۋالدى مەنشىگىن قورعاۋ ءۇشىن ناقتى قادامدار جاسايدى جانە بۇل تەرگەۋ امەريكالىق جۇمىسشىلار ءۇشىن دە ماڭىزدى.

"ۋاشينگتون ەندى كوز جۇمىپ وتىرا المايدى", - دەدى ول.

بۇدان بۇرىن ساراپشىلار ساۋدا وكىلى روبەرت لايتحايزەر قىتايعا قارسى تەرگەۋ جۇمىستارىن ساۋدا تۋرالى زاڭنىڭ 301 ءبولىمى بويىنشا 1974 جىلدان باستايتىنىن ايتقان. ال 1995 جىلى دۇنيەجۇزىلىك ساۋدا ۇيىمى قۇرىلعاننان كەيىن بۇل زاڭ اكتىسى سيرەك قولدانىلعان. ەندى بۇل اقش پرەزيدەنتىنە ساۋدا ارىپتەستەرىنە قارسى بىرجاقتى سانكتسيالار باستاۋىنا مۇمكىندىك بەرمەك.

دونالد ترامپتىڭ بۇل ارەكەتى تەكسەرۋ جۇمىستارىنىڭ باياۋ بولاتىنىن جانە قىتايعا قارسى سانكتسيانىڭ بولماي قالاتىنىن بىلدىرمەيدى. ال اقش اكىمشىلىگىنىڭ وكىلى بولسا "الداعى ۋاقىتتا امەريكالىق تاراپ تەرگەۋ جۇمىستارىن باستايتىن بولسا، الدىمەن قىتايمەن كونسۋلتاتسيا وتكىزىلەدى" دەگەندى ايتادى.

قىتايدىڭ سىرتقى ىستەر مينيسترلىگىنىڭ وكىلى حۋا ءچۇن يىڭ (Hua Chun Ying) بولسا قىتاي-امەريكالىق ساۋدا ساياساتى ۋاقىت وتكەن سايىن نىعايعانىن جانە ەگەر "ساۋدا سوعىسى" باستالسا ەكى ەلدىڭ دە جەڭىلەتىنىن ايتادى.

ونىڭ سوزىنشە، قىتاي تاراپى "اقش مەملەكەتتىڭ جەكە يننوۆاتسيا نەگىزىندە ەكونوميكانى دامىتىپ وتىرعانىنا ءمان بەرىپ، قىتايدىڭ ينتەلەكتۋالىق قۇقىقتى قورعاۋ ىسىندەگى جەتىستىكتەرىن باعالايدى" دەپ ۇمىتتەنەدى.

MarketWatch باسلىمىنىڭ مالىمەتىنشە، امەريكالىقتار جىل سايىن 460 ملرد دوللارعا قىتايدىڭ ارزان ويىنشىقتارىن، كيىمدەرىن، ەلەكتروندى تەحنيكالارىن ساتىپ الادى ەكەن. ال بۇل جاعداي تەرگەۋ جۇمىستارى بىرنەشە جىلعا سوزىلعان كۇننىڭ وزىندە الداعى ۋاقىتتا وزگەرە قويمايدى.

“The Qazaq Times”