جاپون پرەمەرى مەن اقش پرەزيدەنتى سولتۇستىك كورەيا ءىسى جونىندە تەلەفوندا سويلەستى

جاپونيا پرەمەر-ءمينيسترى شينزو ابە (Shinzo Abe) اقش پرەزيدەنتى دونالد ترامپپەن تەلەفوندا سويلەسىپ، سولتۇستىك كورەيانىڭ زىمىران سىناقتارى مەن شابۋىلدارىن توقتاتۋ ءۇشىن تانىم بىرلىگىنە كەلۋ كەرەكتىگىن ءسوز ەتكەن. بۇل تۋرالى اقش-تىڭ «The Wall Street Journal» باسىلىمى حابارلايدى.

جاپوننىڭ باس ءۋازىرى شينزو ابە ترامپپەن بولعان تەلەفونداعى سۇحباتىنان كەيىن، توكيودا جۋرناليستەردى قابىلداپ، ەكەۋارا سويلەسكەن تاقىرىپتار تۋرالى تىلشىلەر سۇراعىنا جاۋاپ بەرگەن. ول ترامپقا وڭىردەگى اقش-تىڭ وداقتاستارىنىڭ قاۋىپسىزدىگىن قورعاۋدا كورسەتكەن سەنىمى ءۇشىن العىس بىلدىرگەن. جاپون ۇكىمەتىنىڭ باسشىسى سويلەسۋ بارىسىندا سولتۇستىك كورەيانىڭ "گۋام ارالىنا زىمىران شابۋىلىن جاسايمىن "دەگەنى ايماقتاعى شيەلەنىستى ۋشىقتىرۋ ءۇشىن ايتىلعانىن العا تارتقان.

سونداي-اق، جاپون باسشىسى سوزىندە: «ەكى جاق تانىم بىرلىگىنە كەلىپ، اقش، جاپونيا، وڭتۇستىك كورەيا سەلبەستىكتى نىعايتا وتىرىپ، رەسەيمەن، قىتايمەن جانە باسقا دا الەم ەلدەرىمەن ىنتىماقتاستىقتى كۇشەيتۋ ارقىلى سولتۇستىك كورەيا زىمىران سىناقتارىنا توسقاۋىل بەرۋ كەرەكتىگىن العا تارتتىق»، – دەدى.

بۇدان بىرنەشە ساعات بۇرىن سولتۇستىك كورەيا ءوزىنىڭ گۋام ارالىنا زىمىران شابۋىل جوسپارىن توقتاتقانىن رەسمي باسىلىمدارىندا جاريا ەتكەن ەدى.

“The Qazaq Times”