ەۋرووداقتاعى جۇمىسسىزدىق دەڭگەيى تومەندەدى

ەۋرووداقتاعى جۇمىسسىزدىق دەڭگەيى 2009 جىلدان بەرى العاش رەت ەڭ تومەنگى دەڭگەيگە جەتتى. وسى جىلدىڭ مامىر ايىندا 9,2 پايىزدى قۇراعان جۇمىسسىزدىق، وتكەن ايداعى مالىمەتتەرگە سايكەس، 9,1 پايىزعا ءتۇسىپ، تۇراقتاعان. بۇل تۋرالى BBC اقپاراتتىق اگەنتتىگى جازادى. 

جۇمىسسىزدىق دەڭگەيى ەۋرووداقتىڭ ەستونيادان باسقا 19 مەملەكەتىندە تومەندەگەن. حالقى ەڭ كوپ جۇمىسپەن قامتىلعان مەملەكەتتەر - گەرمانيا مەن مالتا.  بۇل ەلدەردەگى جۇمىسسىزدىق دەڭگەيى سايكەس 3,8 جانە 4,1 پايىزدى قۇرايدى.

ەكونوميكالىق قۇلدىراۋدى باسىنان كەشىرىپ وتىرعان گرەتسيا حالقىنىڭ 21,7 پايىزى، جاستارىنىڭ 45,5 پايىزى - جۇمىسسىز. ەڭ جوعارى جۇمىسسىزدىق كورسەتكىشى سونداي-اق، يسپانيادا تىركەلگەن: 17,1 پايىز (حالىق), 39,2 پايىز (جاستار).

“The Qazaq Times”