ماسكەۋ مەن ۋاشينگتوننىڭ تاعاتسىزدانا كۇتكەن كۇنى كەلدى

ماسكەۋ مەن ۋاشينگتوننىڭ تاعاتسىزدانا كۇتكەن كۇنى كەلدى. بۇگىن گامبۋرگتە وتەتىن  G20 ءسامميتى اياسىندا اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن كەزدەسەدى.

ەكىجاقتى كەلىسسوزدەر جۇرگىزۋ مۇمكىندىگى تۋرالى ۇزاق تالقىلاۋلاردان سوڭ، اقش پرەزيدەنتىنىڭ قىزمەتىنە كىرىسكەلى ونداعان ەلدىڭ باسشىسىمەن سۇحبات قۇرىپ ۇلگەرگەن دونالد ترامپ رەسەي پرەزيدەنتىمەن اراعا جارتى جىل سالىپ، العاش رەت جەكە كەزدەسكەلى وتىر.

ماسكەۋ مەن ۋاشينگتوندا ەكى ەل اراسىنداعى وسىنداي سالقىن قارىم-قاتىناس «قىرعي-قاباق سوعىس» كەزىنەن بەرى العاش رەت ورناپ وتىر دەپ ەسەپتەيدى. سوندىقتان بۇل كەزدەسۋدەن ەكى ەلدىڭ دە كۇتەرى كوپ.

كەزدەسۋ بارىسىندا رەسەيدىڭ اقش-تاعى ديپلوماتيالىق يەلىكتەرىنە سالىنعان سانكتسيالار جونىندە ماسەلە كوتەرىلۋى مۇمكىن. وتكەن جىلدىڭ جەلتوقسان ايىندا باراك وبامانىڭ اكىمشىلىگى رەسەيدىڭ نيۋ-يوركتەگى تۇراقتى وكىلدىگىنىڭ ەكى تۇرعىن ءۇي كەشەنىن جاۋىپ تاستاعان بولاتىن. ەكس-پرەزيدەنت بۇل شەشىمىن رەسەيدىڭ اقش-تاعى سايلاۋعا اسەر ەتۋگە استىرتىن ارەكەت ۇيىمداستىرعانى جانە  ماسكەۋدەگى امەريكاندىق ديپلوماتتارعا كورسەتىپ وتىرعان قىسىمىنا جاۋاپ دەپ تۇسىندىرگەن ەدى. رەسەيدىڭ ەل پرەزيدەنتى سايلاۋىنا ارالاستى دەگەن ايىپتاۋىنا ناقتى دالەلدەر كەلتىرىلگەن جوق. ال رەسەي قارسى سانكتسيالار ەنگىزبەستەن، جاڭا پرەزيدەنتتىڭ جاۋابىن كۇتتى. دەگەنمەن قىزمەتىنە كىرىسكەنىنە جارتى جىلعا جۋىق ۋاقىت بولسا دا، دونالد ترامپ رەسەيدىڭ ديپلوماتيالىق يەلىكتەرى تۋرالى جاق اشپادى. بۇگىن اقش پرەزيدەنتىنىڭ وسى ماسەلەگە قاتىستى ويى بەلگىلى بولادى.

كەزدەسۋدىڭ قانداي فورماتتا وتەتىندىگى ءالى بەلگىسىز، بىراق بۇل تولىققاندى ۇزاق سۇحبات ەمەس، شاعىن ءارى ۋاقىت جونىنەن شەكتەلگەن اڭگىمە بولادى دەپ كۇتىلۋدە. جالپى، سوڭعى كەزدەرى رەسەي مەن اقش اراسىنداعى كەزدەسۋلەردىڭ لەگى وسىنداي. ماسەلەن، 2015 جىلى انتاليادا وتكەن G20 وتىرىسىندا ەكى ەل پرەزيدەنتتەرى 20 مينۋتقا سوزىلعان اڭگىمە قۇرسا، 2016 جىلى پەرۋدە وتكەن ازيا-تىنىق مۇحيت ەكونوميكالىق ارىپتەستىگىنىڭ سامميتىندە باراك وباما مەن ۆلاديمير پۋتين بىرەر مينۋتقا ءدالىز بويىندا ءسوز الماسقان.

“The Qazaq Times”