اۋەجايلاردا ايىپپۇل تولەۋگە ارنالعان تەرمينال ورناتىلدى

استانا، الماتى جانە قاراعاندى قالالارى اۋەجايلارىندا ايىپپۇل تولەۋگە ارنالعان قازپوشتانىڭ تەرمينالدارى ىسكە قوسىلدى. كليەنتكە ارنالعان بۇل سەرۆيس باس پروكۋراتۋرانىڭ باستاماسىنمەن ادىلەت مينيسترلىگى، ۇقك، «قازپوشتا» اق جانە جەكە سوت ورىنداۋشىلارىنىڭ رەسپۋبليكالىق پالاتاسىمەن بىرلەسە جۇزەگە اسىپ وتىر. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى. 

بۇعان دەيىن شەتەلگە ۇشۋدى جوسپارلاعان قازاقستاندىقتار وتەلمەگەن ايىپپۇلدارىنا بايلانىستى رەيستەرىنەن قالىپ قوياتىن، ال وسى سەرۆيس ارقىلى ازاماتتار جەكە سوت ورىنداۋشىلارمەن بايلانىس جاساماي، سول جەردە ايىپپۇل بويىنشا قارىزىن تەكسەرىپ، بولعان جاعدايدا ونى تولەپ جانە اۆتوماتتى تۇردە ەل شەكاراسىنان شىعۋعا رۇقسات الۋ مۇمكىندىگىنە يە بولادى.

دەگەنمەن بۇل 2015 جىلدىڭ 1 ماۋسىمىنان كەيىن قويىلعان شەكتەۋلەرگە عانا ارەكەت ەتەدى.  كورسەتىلگەن مەرزىمگە دەيىن شەكتەۋدى جويۋ بۇرىنعى ءتارتىپ بويىنشا جۇرگىزىلەدى (سوت ورىنداۋشىسىنا ايىپپۇلداردىڭ وتەلگەندىگىن راستايتىن قۇجاتتار بەرۋ).

تەرمينالدار ادىلەت مينيسترلىگىنىڭ دەرەكقورىنا بىرىكتىرىلگەن. بورىشتىڭ وتەلگەندىگى تۋرالى اقپارات وسى ۆەدومستۆونىڭ دەرەكقورىنا 15 مينۋت ىشىندە بەرىلەدى جانە ەل شەكاراسىنان شىعۋعا قويىلعان شەكتەۋ 30 مينۋت كولەمىندە الىنىپ تاستالادى.

تەرمينال ارقىلى تولەنەتىن ايىپپۇل كولەمىنىڭ ماكسيمالدى سوماسى 2 ملن تەڭگەگە دەيىن. تەرمينال ارقىلى وتەمدەرگە كوميسسيا بورىش سوماسىنىڭ 1%-ىن قۇرايدى، بىراق  ءاربىر تولەم ءۇشىن 100 تەڭگەدەن كەم ەمەس. ەگەر بورىش كولەمى 2 ملن تەڭگە نەمەسە ودان جوعارى بولسا، ازامات قازپوشتانىڭ كەز كەلگەن بولىمدەرىندە تولەم جۇرگىزە الادى.

جاقىن ارادا وسىنداي تەرمينالدار اقتاۋ مەن شىمكەنت قالالارىندا ىسكە قوسىلاتىنىن اتاپ وتكەن ءجون.

“The Qazaq Times”