ەو سولتۇستىك كورەيامەن كەلىسسوزدە قىتايدى ارا اعايىن ەتپەك

ەو شەنەۋنىكتەرىنىڭ ايتۋىنشا، ەۋروپالىق وداق قازىرگى كەزدە قىتاي مەن سولتۇستىك كورەيا اراسىندا كونسۋلتاتسيالار جۇرگىزىپ وتىر. سولتۇستىك كورەيانىڭ يادرولىق باعدارلامالاردان باس تارتۋى ماسەلەسىندە ارا اعايىن رەتىندە قىتايدىڭ ماڭىزى جوعارىلاماق. بۇل تۋرالى «The Wall Street Journal» باسىلىمى حابارلاپ وتىر.

ەو-داعى تالقى بارىسىندا، وڭتۇستىك كورەيا، قىتاي جانە ەۋرووداق تارابى ء"بىر عانا سانكتسيانى كۇشەيتۋ سولتۇستىك كورەيانى يادرولىق باعدارلامادان باس تارتۋىنا كوندىرە المايدى" دەپ ايتىپ الاڭداۋشىلىق بىلدىرۋدە. ەڭ باستىسى اسكەري ارەكەتتەردى بولدىرماس ءۇشىن كەلىسسوزدەر جۇرگىزۋ كەرەك دەپ تاپقان.

وسى اپتادا سولتۇستىك كورەيادا تۇتقىندالىپ، ءبىر جىلدان كەيىن ەلىنە قايتارىلعان امەريكالىق ستۋدەنت  ۇلكەن ميىنىڭ قاتتى زاقىمدالۋى سەبەپتى كوز جۇمدى. بۇل امەريكالىقتاردىڭ سولتۇستىك كورەياعا دەگەن نارازىلىعىن تاعى ءورشىتتى. سوعان  بايلانىستى اقش ۇكىمەتىنىڭ سولتۇستىك كورەياعا قىسىم كورسەتۋ بەكىمى ارتا ءتۇستى.

اقش پرەزيدەنتى دونالد ترامپ ءوزىنىڭ Twitter پاراقشاسىندا قىتاي مەن قىتاي باسشىسىنا قانشا رەت ماقتاۋ ايتسا دا، قىتاي جاعى اقش-تىڭ ويلاعان جەرىنەن شىعا العان جوق. سەيسەنبى كۇنى ترامپ «مەن قىتاي ۇكىمەتى مەن باسشىسى شي جينپيڭنىڭ سولتۇستىك كورەيا ماسەلەسىن شەشۋگە كومەكتەسىپ، بار كۇشىن سالىپ كەلگەنىنە ايرىقشا العىس ايتامىن. دەگەنمەن بۇل قۇلشىنىس ايتارلىقتاي جەمىس بەرمەدى. قىتاي سولتۇستىك كورەيانى شەكتەي الماي كەلەدى، بۇل اقش-تىڭ سىرتقى ساياساتىنا جاڭا باعىت الىپ كەلەتىن بولادى»، – دەدى.

جوعارى لاۋازىمدىلاردىڭ سوزىنە قاراعاندا، سوڭعى كەزدەرى بريۋسسەل مەن بەيجىڭ اراسىندا بىرقاتار كەزدەسۋلەر سەرياسى ءوتتى. بۇل كەزدەسۋلەر الداعى ۋاقىتتاعى سولتۇستىك كورەيامەن بولاتىن كەلىسسوزىنە قاتىسۋشى تاراپتاردىڭ شەشىمىنە ىقپال ەتە الادى. ەو-عا مۇشە ەلدەر كحدر-مەن ديپلوماتيالىق قارىم-قاتىناستاردى قولدايدى. سونداي-اق، الداعى كەلىسسوزگە 2015 جىلعى يرانمەن جۇرگىزىلگەن كەلىسسوز تاجريبەسى قولدانىلادى دەپ وتىر.

“The Qazaq Times”