موسۋلدىڭ سوڭعى قالاشىعىن قايتارىپ الۋ شايقاسى باستالدى

يراك ۇكىمەتى ارمياسى موسۋل قالاسىنداعى «يسلام مەملەكەتى» اتالعان تەررورلىق كۇشتەردىڭ ەڭ سوڭعى تياناعى بولعان ەسكي قالاشىعىنا شابۋىل باستادى. يراك قارۋلى كۇشتەرى تاراتقان مالىمەتكە سۇيەنسەك، ۇكىمەت ارمياسى قالانىڭ شىعىس جاعىنان، ال فەدەرالدىق پوليتسيا وڭتۇستىك باعىتتان شابۋىلداعان. ەسكي قالاشىعى يراك ۇكىمەتىنىڭ قولىنا وتسە، موسۋل تولىقتاي قايتارىلىپ الىنعان بولادى. بۇل تۋرالى BBC ارناسىنىڭ رەسمي سايتى جازىپ وتىر.

موسۋلداعى ەسكي قالاشىعى. فوتو: BBC

سوڭعى جەتكەن دەرەكتەرگە قاراعاندا، «يسلام مەملەكەتى» كۇشتەرى قالاشىقتى قورعاپ، قاتتى قارسىلىق كورسەتۋدە. جيھادشىلار قالاشىققا كىرەتىن وتكەلدەرگە بەكىنىپ جان اياماي ۇرىس سالىپ جاتقان كورىنەدى. يراكتىڭ تەررورلىققا قارسى كۇشتەرىنىڭ قولباسشىسى ماان ءال-ءساديدىڭ «فرانس-پرەسس» باسىلىمىنا بەرگەن سۇحباتىندا، ۇكىمەت ارمياسى فارۋز رايونىندا باسىمدىقتى  قولعا كەلتىرگەنىن، دەسە دە قارسىلىقتىڭ ءالى دە كۇشتى ەكەنىن ايتقان.

بۇۇ-نىڭ مالىمەتىندە ەسكي قالاشىعىنىڭ تۇرعىندار سانى 100 مىڭعا تارتادى. سوڭعى ەكى اپتا ىشىندە موسۋلدىڭ باتىس رايوندارىنان 230 بەيبىت تۇرعىن قازا تاپقانى ءمالىم بولدى. ولاردىڭ باسىم كوبى وسى رەتكى شايقاستا كوز جۇمسا، ءبىر ءبولىمى قالادان قاشىپ شىعۋ بارىسىندا لاڭكەستىك توپ جاعىنان وققا ۇشقان.

ۇكىمەت ارمياسى قالا تۇرعىندارىنا اشىق جەرلەردە جۇرمەۋىن ەسكەرتىپ، حابارلاما تاراتتى. ءارى ارقانداي ءبىر مۇمكىندىكتى پايدالانىپ، شايقاس بولىپ جاتقان وڭىردەن الىستاپ كەتۋىن ەسكەرتتى. ۇكىمەت ارمياسىنىڭ مالىمەتىنە قاراعاندا، موسۋل شايقاسى باستالعان كەزدەگى (وتكەن جىلى قازان ايى) 6 مىڭ لاڭكەستىك توپ مۇشەسىنەن ەسكيگە بەكىنگەن 300 ادام قالعان.

“The Qazaq Times”