وتتو ۆومبيەردىڭ سولتۇستىك كورەيا سوتىندا وتىرعان كەزى. فوتو: The Wal Street Journal.

جاقىندا عانا سولتۇستىك كورەيا تۇرمەدەن شىعارعان امەريكالىق ستۋدەنت وتتو ۆومبيەر دۇيسەنبى كۇنى كوز جۇمدى. ۆومبيەر وسىعان دەيىن سولتۇستىك كورەيادا ءبىر جىلدان اسا ۋاقىت قاماقتا بولعان. وتكەن اپتادا عانا اقش تارابىنىڭ سۇراتۋىمەن قاماقتان بوساتىلىپ، ەلىنە قايتارىلعان بولاتىن. ۆومبيەر ەلىنە جەتكىزىلگەن كەزدە دارىگەرلەر ونىڭ ميى قاتتى زاقىمدالعانىن مالىمدەگەن. بۇل تۋرالى «The Wall Street Journal» باسىلىمى حابارلاپ وتىر.

ۆومبيەردىڭ اتا-اناسى جانە وزگەدە تۋىستارى ءباسپاسوز كونفەرەنتسياسىندا، ۇلدارىنىڭ دۇيسەنبى كۇنى تۇستەن كەيىن (اقش جەرگىلىكتى ۋاقىتىمەن) كوز جۇمعانىن ايتتى. تسينتسينناتي مەديتسينالىق ورتالىعىنىڭ دارىگەرلەرى بەرگەن مالىمەتىندە ۆومبيەردىڭ ۇلكەن مي قىزمەتى الدە قاشان «ولگەن» دەلىنگەن. ال بۇل دارىگەرلەر ۆومبيەردى وسىدان التى كۇن بۇرىن  اقش-قا جەتكىزىلگەننەن كەيىن ەمدەۋگە العان.

وتتو ۆومبيەر اقش-تىڭ ۆيردجينيا ۋنيۆەرسيتەتىنىڭ ستۋدەنتى. ول 2016 جىلى قاڭتاردا پيوڭياڭ (پحەنيان) اۋەجايىنان ۇشقالى تۇرعان جەرىندە سولتۇستىك كورەيا ۇكىمەتى جاعىنان قولعا الىنعان. سوت ۇكىمى وعان 15 جىلدىق قاتاڭ تۇردەگى قاماق جازاسىن كەسكەن. وعان  "كحدر رەجيمىنە قارسى ساياسي ۇگىت ناسيحات جۇرگىزدى" دەپ ايىپ تاعىلعان.

اقش پرەزيدەنتى دونالد ترامپ ۆومبيەردىڭ وتباسىنا كوڭىل ايتۋ حاتىن جىبەردى. ترامپ بۇل حاتىندا: «ۆومبيەردىڭ تاعدىرى مۇنداي رەجيمدەردىڭ نەمەسە ادام قۇقىعىن اياق استى ەتەتىن ەلدەردىڭ قولىندا جازىقسىز قازا تاباتىن مۇنداي قايعىلى جاعدايلاردىڭ قايتالانباۋى ۇشىن، ۇكىمەتتىڭ بۇل ماسەلەنى قاداعالاۋىن نىعايتا تۇسەتىن بولادى»، – دەدى. سونداي-اق، ول بۇل ءۇشىن سولتۇستىك كورەياعا قاتال ايىپ تاعاتىنىن دا ايتىپ وتكەن.

“The Qazaq Times”