وسى جىلدىڭ سوڭىنا دەيىن بانك سەكتورىن ساۋىقتىرۋ اياسىندا بانكتەرگە قارجى بەرىلەدى. بۇل تۋرالى ۇلتتىق بانك توراعاسى دانيار اقىشەۆ پارلامەنت پالاتالارىنىڭ بىرىككەن وتىرىسىندا مالىمدەدى.
«بانكتەر ءوزىنىڭ جۇمىسىن ناقتى كورسەتە الۋى ءۇشىن بانك اكتيۆتەرىنە باعالاۋ جۇرگىزۋدى جوسپارلاپ وتىرمىز. دەگەنمەن ولاردىڭ جۇمىس جۇيەسى ەسەپتە كورسەتىلگەن دەڭگەيدەن دە ناشار بولۋى مۇمكىن. بار ماسەلە بانك اكتسيونەرلەرىنىڭ كاپيتالعا اقشا قۇيۋى كەرەكتىگىندە بولىپ وتىر. قازىرگى ۋاقىتتا ۇلتتىق بانك قارجىنىڭ بەلگىلى ءبىر سوماسىن ءبىر ۋاقىتتا قۇيۋ مۇمكىندىگى ەكونوميكادا جەتكىلىكسىز ەكەنىن تۇسىنەدى", - دەدى اقىشەۆ.
ونىڭ سوزىنشە، بانك سەكتورىن ساۋىقتىرۋ باعدارلاماسى ۇلتتىق بانك تاراپىنان رەسۋرستاردى قامتاماسىز ەتۋگە قولداۋ كورسەتەدى. بىراق مىندەتتى تۇردە اكتسيونەرلەردىڭ پروپورتسيونالدى قاتىسۋىمەن ايىرباس ارقىلى بولادى.
"ياعني مەملەكەت قارجى بەرسە، اكتسيونەرلەرگە بەلگىلى ءبىر ۋاقىت ارالىعىنا مىندەتتەر قويىلادى. قازىرگى كەزدە پروپورتسيونالدى سومانى كاپيتالعا قۇيۋ تۇرىندە سالۋ بويىنشا تالقىلاۋ جۇرگىزىلىپ جاتىر. بۇل بانكتەر جاقىن جىلدارى كاپيتال اعىنىنا يە بولادى، ولار پروبلەمالارىن شەشىپ، وزدەرىندە جينالىپ قالعان كرەديتتەردى ەسەپتەن شىعارا الادى دەگەندى بىلدىرەدى", - دەدى اقىشەۆ.
ايتا كەتەيىك، بۇعان دەيىن قازكوممەرتسبانك قازاقستاننىڭ قور بيرجاسىنا 2017 جىلى 14 ناۋرىزدا 200 ملرد تەڭگە قارىز العانى تۋرالى حابارلاعان ەدى.
