2005 جىلى مامىردىڭ 13 كۇنى وزبەكستاندا ءاندىجان وقيعاسى بولعانى بەلگىلى. سول ۋاقىتتان بەرى وزبەكستان بيلىگى بۇل وقيعانى حالىق ساناسىنان جويىپ جىبەرۋ ءۇشىن ءتۇرلى قادامدارعا باردى. ءبىز بۇگىن وسىعان قىسقاشا توقتالۋدى ءجون كوردىك.

يسلام كارىموۆتىڭ كەزىنەن باستاپ وسى ۋاقىتقا دەيىن وزبەكستان بيلىگى حالىق ساناسىنان اندىجانداعى قاندى قىرعىندى ۇمىتتىرۋ ءۇشىن ءتۇرلى ارەكەتتەرگە باردى.

وسى ماقساتتا كارىموۆ رەجيمى وزبەك حالقىنىڭ قانى توگىلگەن شولپان (چۋلپون) كوشەسىنىڭ اتىن اۋىستىردى. ەرەۋىلگە شىققان حالىق اياۋسىز باسىپ، جانشىلعان كوشە بويىنداعى عيماراتتار مەن ورتالىق الاڭداعى بابىر ەسكەرتكىشىن بۇزىپ تاستالدى. نارازىلىق شەرۋىنە قاتىسقان كوپتەگەن ادامدى قورقىتتى، ۇركىتتى، تۇرمەگە قامادى، ولگەندەردى بەلگىسىز بەيىتكە اپارىپ جەرلەدى. ەرەۋىلدە وققا ۇشقانداردىڭ تۋىستارىنا ولگەندەرگە ارناپ قۇران باعىشتاۋعا، قىرىق كۇندىگىن وتكىزۋگە تىيىم سالىندى.

ءاندىجان وقيعاسى قۇرباندارىنىڭ بەلگىسىز بەيىتتەرى. فوتو: centre1.com

ءاندىجان وقيعاسىنان كەيىن نە ءبارى ءبىر جىل ىشىندە وزبەكستان بيلىگى ەلدەگى حالىقارالىق تەلەارنالار مەن ادام قۇقىعىن قورعاۋ ۇيىمدارىن ەلدەن الاستاتتى. جەرگىلىكتى تاۋەلسىز جۋرناليستەر مەن قۇقىق قورعاۋشىلاردى قۋدالادى. اقش-تىڭ ءاندىجان وقيعاسىن حالىقارالىق ۇيىمداردىڭ تەكسەرۋى كەرەكتى جايىندا ايتقان مالىمدەمەسىنە وزبەكستان بيلىگى قۇلاق اسپادى. ءتىپتى اقش-تىڭ بۇل مالىمدەمەسى ءۇشىن رەسمي تاشكەنت اقۇيدەن  وزبەكستان اۋماعىنداعى  حاناباد اسكەري بازاسىن التى اي ىشىندە جاۋىپ، ەل اۋماعىنان اسكەرىن الىپ كەتۋدى تالاپ ەتتى.

2005 جىلعى ءاندىجان وقيعاسىندا وزبەكستان اسكەرى جۇزگە جۋىق ەرەۋىلشىنى ءولتىردى. بەس جۇزگە تارتا ءاندىجان تۇرعىنى كورشىلەس قىرعىزستانعا قاشۋعا ءماجبۇر بولدى. كەيىنەن وزبەكستان بيلىگىنىڭ سۇراۋىمەن قىرعىزستاننان حاسان شاكيروۆ، مۋحامماد كادىروۆ، ديلشود حودجيەۆ پەن تاۆاكال حودجيەۆ ەكستراديتسيالانىپ، 13 جىلدان 17 جىلعا دەيىن باس بوستاندىقتارىنان ايىرىلدى. وسىدان كەيىن قىرعىزستانعا قاشىپ بارعان ءاندىجان تۇرعىندارى رۋمىنياعا قونىس اۋداردى.

وسىلايشا وزبەكستان اۋماعىندا 2005 جىلى 13 مامىردا بولعان اندىجانداعى قاندى قىرعىندى ەسكە تۇسىرەتىن ەشتەڭە قالمادى.

“The Qazaq Times”