ەستونيا «يسلام مەملەكەتى» لاڭكەستىك ۇيىمىنا قارسى اسكەري كواليتسياعا كىرۋ ءۇشىن كەلىسسوزدەر جۇرگىزىپ جاتىر دەپ حابارلايدى ينتەرفاكس ۋكراينا اقپارات اگەنتتىگى.

«ەستونيا وسىعان دەيىن اقش جانە وزگە دە اسكەري وداقتاستارىمەن «يسلام مەملەكەتى» لاڭكەستىك ۇيىمىنا قارسى اسكەري كواليتسيا قۇرۋعا بايلانىستى كەلىسسوزدەر جۇرگىزگەن. قازىرگى تاڭدا ەستونيانىڭ ون اسكەري قىزمەتكەرى يراكتا جەرگىلىكتى ساربازداردى دايىنداۋعا كومەكتەسىپ ءجۇر. الداعى ۋاقىتتا يراكقا اسكەري دارىگەرلەر مەن ساپەرلاردى دايىنداۋعا بەس قىزمەتكەرىمىزدى جىبەرۋدى جوسپارلاپ وتىرمىز.» دەدى ەستونيا قورعانىس ءمينيسترى مارگۋس تساحكنا جەرگىلىكتى تەلەارنالاردىڭ بىرىنە بەرگەن سۇحباتىندا.

بۇدان بۇرىن بريۋسسەلدە وتكەن ناتو ساميتىندە ناتو باسشىلارى اقش پرەزيدەنتى دونالد ترامپپەن كەزدەسكەننەن كەيىن، ناتو-نىڭ «يسلام مەملەكەتى» لاڭكەستىك ۇيىمىنا قارسى اسكەري كواليتسياعا كىرەتىنى جايىندا مالىمدەگەن بولاتىن.

“The Qazaq Times”