ستوكگولمداعى، سانكت-پەتەربۋرگتەگى لاڭكەستىك شابۋىلداردان كەيىن الەم وزبەكستان تەرروريزمى جايىندا ءسوز قوزعاي باستاعانى بەلگىلى. ال سول وزبەكستان مەشىتتەرىندە وزدەرىنەن شىعىپ جاتقان لاڭكەستەر جايىندا نە ايتىپ جاتىر؟ وزبەكستان ءدىني باسقارماسى ەلدە ءورشىپ تۇرعان ءدىني راديكاليزممەن كۇرەسىپ جاتىر ما؟ وسى جانە وزگە دە سۇراقتارعا centre1.com. سايتىنىڭ جۋرناليستەرى جاۋاپ ىزدەپ كورگەن.
اتالمىش ينتەرنەت باسىلىمنىڭ تىلشىلەرى جۇما سايىن بىرنەشە اپتا بويى تاشكەنت قالاسىنداعى مەشىتتەرگە باراپ، سول جەردەگى يمامداردىڭ ۋاعىزدارىن تىڭداعان.
وسى ۋاقىت ارالىعىندا تاشكەنت قالاسىندا ورنالاسقان مەشىتتەردىڭ ءبىر دە، ءبىرىن دە ەل ىشىندەگى راديكالدى ءدىني اعىمدار، ءدىني ەكسترەميزىم، رەسەي مەن جاقىن جانە الىس شەت ەلدەردە لاڭكەستىك توپتاردىڭ ارباۋىنا ءتۇسىپ جاتقان وزبەكستان ازاماتتارى جايىندا ايتىلماعان.
ونىڭ ورىنىنا وزبەكستان يمامدارى وزبەك جاستارىنا ءناپسىنى قالاي تىيىپ ۇستاۋعا بولاتىنى جايىندا، ىسىراپشىلدىق پەن رامازان ايىندا استا-توك اۋىز اشار جاساماۋ كەرەكتىگى جايىندا ۋاعىز ايتقان.
وسى ارقىلى وزبەكستان ءدىني باسقارماسى دا، وزبەكستان ءدىن ىستەر كوميتەتى دە ەلدەگى راديكالدى ءدىني توپتارمەن كۇرەسۋگە قاۋقارسىز نەمەسە قۇلىقسىز ەكەنىن دالەلدەگەن.
بىراق بۇل جاڭالىق ەمەس ەكەنى بەلگىلى. ويتكەنى يسلام كارىموۆتىڭ كەزىنەن باستاپ وزبەكستاندا ءدىني راديكاليزم جايىندا ەل ىشىندە ءسوز قوزعاۋعا قاتاڭ تىيىم سالىنعان بولاتىن.
