قازاقستاننىڭ دامۋ بانكى مۇناي جابدىقتارىن جەتكىزەتىن كومپانياعا نەسيە بەرەدى

«قازاقستاننىڭ دامۋ بانكى» اق قازاقستانداعى ءىرى ۇڭعىما قۇرىلىسى مەن جوندەۋ، مۇناي وڭدەۋ، ءوندىرۋ جانە جيناۋعا ارنالعان جابدىق، سونداي-اق جىلۋ ەنەرگەتيكالىق جابدىق ءوندىرۋشى «اتىراۋمۇنايماش» جشس-نىڭ ينۆەستيتسيالىق جوباسىن ىسكە اسىرۋ ءۇشىن نەسيە بەرەدى. جوبانىڭ جالپى قۇنى 15,3 ملرد تەڭگەنى قۇرايدى.

ءباسپاسوز قىزمەتىنىڭ مالىمەتىنشە، جوبانى جۇزەگە اسىرۋ ناتيجەسىندە «اتىراۋمۇنايماش» وندىرىستىك قۋاتتىلىقتارى 2,5 ەسەگە  - ماشينا جاساۋ ونىمدەرى جىلىنا 20 000 تونناعا دەيىن ۇلعايادى.

بۇدان وزگە، ANSI, API, ASME حالىقارالىق ستاندارتتارى بويىنشا مۇناي-گاز، مۇناي وڭدەۋ جانە مۇناي-حيميا كاسىپورىندارىنا ارنالعان ونىمدەردىڭ جاڭا اتاۋلارىن شىعارۋ جوسپارلانعان.

جوبا ىستىق مىرىشتاۋ، گرەيتينگ تسەحتارىنىڭ، سونداي-اق زاۋىتتىڭ قوسالقى تسەحىنىڭ قۇرىلىسىن اياقتاۋدان تۇرادى. جوعارى تەحنولوگيالى يتالياندىق، گەرمانيالىق، امەريكالىق جابدىقتارمەن جابدىقتالعان جاڭا وندىرىستىك تسەحتاردى 2018 جىلى پايدالانۋعا بەرۋ جوسپارلانعان.

جاڭا وندىرىستىك  جەلى قۇرىلىسى 2013 جىلى «اتىراۋمۇنايماش» اسا گاباريدتى بۇيىمداردى ءوندىرۋ كەشەنىن پايدالانۋعا بەرۋدەن باستاعان ينۆەستيتسيالىق جوبانىڭ ەكىنشى كەزەڭى بولماق.

«اتىراۋمۇنايماش» باس ديرەكتورى الەكساندر دونسكوۆتىڭ سوزىنشە، جينالعان قۇزىرەتتىلىكتەر مەن اسا اۋىر جۇكتەردى تاسىمالداۋ بويىنشا تاجىريبەنى ەسكەرگەندە «اتىراۋمۇنايماش» بۇگىندە كاسپي ماڭى وڭىرىندەگى مۇناي كاسىپشىلىگى  جابدىقتارىنىڭ جالعىز جەتكىزۋشىسى. زاۋىتتىڭ جاڭا قۋاتتىلىقتارىندا مىرىشتاۋ جانە گاز-پلازمالىق كەسۋ تەحنولوگيالارىن قولدانا وتىرىپ، قالىڭ ءبۇيىرلى جانە مودۋلدىك جابدىقتار ءوندىرۋ جۇزەگە اسىرىلادى.

«اتىراۋمۇنايماش» قازىرگى ۋاقىتتا قازاقستانداعى ءىرى مۇناي وندىرەتىن جانە مۇناي وڭدەيتىن جوبالارعا، اتاپ ايتقاندا تەڭىز جانە قاراشىعاناق كەن ورىندارىنا، پاۆلودار، اتىراۋ جانە شىمكەنت ءموز-دەرىن جاڭعىرتۋعا ارنالعان جابدىقتاردى جەتكىزەدى.

حابارلامادا ايتىلعانداي، 2017 جىلى كومپانيا 4 700  تونناعا دەيىن ماشينا جاساۋ ونىمدەرىن ءوندىرۋدى جوسپارلاپ وتىر، بۇل 2016 جىلمەن سالىستىرعاندا  60%-عا ارتىق. كاسىپورىننىڭ شتاتى قازىرگى تاڭدا 275 ادامدى قۇرايدى، جاڭا قۋاتتىلىقتاردى پايدالانۋعا بەرگەننەن كەيىن 170 جاڭا جۇمىس ورنى اشىلادى.

“The Qazaq Times”