ترامپ جانە ساۋد كورولى. فوتو: The Wall Street Journal.

اتى شۋلى اقش پرەزيدەنتى ساۋد ارابيا كورولىمەن كەزدەسۋى اقش پەن ورتا جانە تاياۋ-شىعىس قاتىناسىنىڭ جاڭا پاراعىن اشتى دەۋگە بولادى. اقش مەملەكەتتىك دەپارتامەنتىنىڭ حابارلاۋىنا قاراعاندا، قۇراما شتات پەن ساۋد ارابياسى لاڭكەستىككە قارسى تۇرۋ ىنتىماقتاستىعىن تەرەڭدەتۋدى رەسمي قولعا العان. ەكى ەل بىرلەسە وتىرىپ الەمدەگى ىقپالدى قۇدايشىل پارتيانىڭ بەلدى مۇشەسىنە ارنايى سانكتسيا جاريالاماق. بۇل تۋرالى “The Wall Street Journal” باسىلىمى حابارلايدى.

اقش پرەزيدەنتىنىڭ ساۋد ارابيا باس قالاسىنا بارۋىمەن، ەكى ەل اراسىندا لاڭكەستىككە قارسى بىرقاتار سانكتسيالاردى بىرلەسە جاريالاۋعا كەلىستى. سونىڭ ىشىندە «حەزبوللا» ۇيىمى نەگىزگە الىنىپ وتىر. ۇيىمداعى اتقارۋ كوميتەتىنىڭ نەگىزگى مۇشەسى بولىپ تابىلاتىنىن حاشەم سافيدينگە سانكتسيا جاريالاندى. بۇل اقش ۇكىمەتىنىڭ ساۋد ارابيانى يرانعا قارسى وداقتاستىقتى كۇشەيتۋى بولىپ تابىلادى.

اتالعان كوميتەت «حەزبوللانىڭ» بارلىق ساياسي، الەۋمەتتىك، ۇيىمداستىرۋشىلىق جانە ءبىلىم بەرۋ جۇمىستارىنا جاۋاپتى كوميتەت. «حەزبوللا» ليۆانداعى شيت توپتار رەتىندە  يراننىڭ قولداۋىنا يە بولىپ كەلگەن. اقش وعان قاراتا بىرنەشە رەت سانكتسيا جاريالاعانىمەن ساۋد ارابيا بەيتاراپتىق تانىتىپ كەلگەن بولاتىن. اقش ۇكىمەتىنىڭ مالىمەتىندە، سافيدين 1983 جانە 1984 جىلى جاسالعان اسا ۇلكەن جانكەشتى جارىلىس وقيعالارىنىڭ ۇيىمداستىرۋشىسى. وعان قوسا 1985 جىلى اقش TWA كومپانياسىنىڭ № 847 ۇشاعىن ۇرلاۋ قاتارلى ىستەرگە باستى جاۋاپكەر دەپ كورسەتتى.

اقش قازىنا جانە ساۋدا دەپارتامەنتى مەن ساۋد ارابياسى وسىعان دەيىن تەرروريستىك توپتارعا بىرلەسە سانكتسيا سالىپ كەلگەن. دەسە دە، ەكى ەل ۇكىمەتى بىرلەسە لاڭكەستىككە قارسى كەڭەيتىلگەن ىنتىماقتاستىق ورناتۋى العاش رەت.

“The Qazaq Times”