فوتو: Deagel.com

اقش پەن رەسەي اسكەري ۇشاقتارى ءبىر اپتادا ەكى رەت ۇشىراسىپ قالدى. بۇل جولى ەكى ەلدىڭ اسكەري ۇشاقتارى 12 مەترگە دەيىن جاقىنداپ كەلدى. اقش تەڭىز ارمياسىنىڭ حابارلاۋىنشا، 12 مامىر كۇنى قاراتەڭىز كەڭىستىگىندە رەسەيدىڭ سۋ-27 جويعىش ۇشاعىمەن اقش-تىڭ P-8 سۇڭگۋىر قايىققا قارسى شارلاۋشى ۇشاعىنا كەزدەسىپ قالعان. بۇل الەم اقپارات كەڭىستىگىندە ەكى ەل ۇشاعىنىڭ ءبىر اپتادا ەكى رەت «توسىن دا اسەرلى كەزدەسۋى» دەپ اتالدى.

13 مامىر كۇنى، رەسەي سىرتقى ىستەر ءمينيسترى سەرگەي لاۆروۆ امەريكاعا جاساعان ساپارىن اياقتاپ، ەلىنە قايتقالى تۇرعان ەدى. ءتىپتى، بۇل ساپاردا ەكى جاقتى قارىم-قاتىناستاردى جاقسارتۋ تۋراسىندا دا كەلىسسوزدەر جاسالعان بولاتىن. رەسەيدىڭ «تاسس» اقپاراتتىق اگەنتتىگى 14 مامىر كۇنى Fox News-كە بەرگەن اقپاراتىندا دا وسى تۋرالى ايتىلدى. وندا اقش تەڭىز ارمياسىنىڭ حابارلاماسىنا سىلتەمە جاسالعان: «12 مامىر كۇنى اقش P-8 شارلاۋشى ۇشاعى، قىرىم جاعالاۋىنا 160 شاقىرىم قاشىقتىقتاعى قاراتەڭىز حالىقارالىق اۋە كەڭىستىگىنەن ۇشىپ ءوتتى» دەپ مالىمدەگەن بولاتىن.

رەسەي جىبەرگەن سۋ-27 جويعىش ۇشاعى مەن اقش  P-8 شارلاۋشى ۇشاعى كەڭىستىكتە يىق تىرەسە ۇشقان. ءتىپتى ەكى ۇشاقتىڭ اراسى 12-اق مەترگە دەيىن جاقىن كەلگەن. اقش تەڭىز ارميا جاعى رەسەيدىڭ بۇل ارەكەتى تولىقتاي ارانداتۋشىلىق دەپ ايىپتاپ وتىر. ولار رەسەيلىك سۋ-27 ۇشاعىنىڭ وزىمەن بىرگە اۋە زىمىرانىن دا الىپ جۇرگەنىن اتاپ ايتتى. بىراق، بۇل تۋرالى رەسەي قورعانىس ءمينيسترى الىگە دەيىن مالىمەت بەرمەي وتىر.

“The Qazaq Times”