Pentagon Saud Arabiyasındağı äskerlerdi küşeytkenin rastadı. Foto: Forces Network

Irannıñ agressiyalıq qadamdarın toqtatu maqsatında AQŞ Saud Arabiyasına äskerlerin attandıruda. Ötken apta soñında Pentagon basşısı resmi mälimdeme jasap, eki jauıngerlik wşaqtı qosının qamtığan, «Patriot» zımıran batareyaları men «Sad» jüyesi jäne onı qoldauşı personal Saud Arabiyasına attanğanın jetkizgen.

AQŞ-tıñ Irandağı arnayı ökili jäne AQŞ memlekettik hatşısınıñ Iran isi jönindegi keñesşisi Brayn Huk bwl turalı sözinde: «Saud Arabiyası AQŞ-tıñ wzaq merzimdi qauipsizdik boyınşa seriktesi. Ortaq erejeler men halıqaralıq tärtipti qorğau üşin bizden qorğanıs jağında kömek talap etip otır. Bwl retki qoldau körsetu aymaqtağı qauipsizdik pen twraqtılıqtı qorğauğa tikeley qatıstı», – degen. Ol jäne amerikalıq qarulı küşter men qorğanıs tehnikalarınıñ Arab tübegine ornalasqanın tübek mañındağı arab elderi de qoldap otırğanın qosa ayttı.

AQŞ-tıñ Iran mañındağı äskeri jäne äue bazaları. 2012, Foto: Forces Network

Ötken ayda Saud Arabiyasınıñ mwnay nısandarına şabuıl jasalıp, eldiñ mwnay öndirisi 50 payızğa deyin qısqarğan edi. AQŞ şabuılğa baylanıstı Tehrandı ayıptadı. Äri, zımırandar men wşqışsız wşu qwrılğıları Irannıñ oñtüstik-batısınan wşıp keldi dep körsetti. Osığan baylanıstı AQŞ arab jerine 3 mıñ qarulı jasağın attandırğan. Biraq, Tehran özine tağılğan ayıptı joqqa şığardı.

Pentagonnıñ mälimdeuinşe mamır ayınan beri osı aymaqqa jiberilgen amerikalıq sarbazdardıñ sanı 14 mıñğa jetken. Bwlar tört retki mwnay tankerine jasalğan şabuıl kezinde jiberilgen äskerlerdi de öz işine qamtidı. Bwl qarulı küşter äue şabuıldarınan aldın-ala mälimet bere alatın aviaciyalıq eskadril'ya, teñiz patrul'dik aviaciya eskadril'yası, Patriot zımıran batareyaları, B-52 bombalauşı wşağı, wşaq tasımaldauşı kemeniñ şabuılşı komandaları, sonday-aq, amfibiyalıq kölik terminaldarı jäne drondarmen küşeytilgen.

Pentagon sonday-aq, Qwrama Ştattıñ barlıq äskeri äue jäne teñiz küşterine, teñiz küşteriniñ qwrılıq qosındarına qajet bolğan jağdayda osı aymaqtağı qarulı küşterge kömek beruge bwyırğan.

“The Qazaq Times”