Ündistan prem'er-ministri 2014 jılğı saylaudağı jeñisin qaytalauğa tırısuda. Foto: Reuters.

Bügin Ündistanda el tarihındağı eñ masştabtı demokratiyalıq saylaudıñ qorıtındısı jariya bolmaq. Altı aptağa sozılğan kezekti saylauda 8 mıñnan astam ümitker, 670 sayasi partiya qatısıp, 1 milliardtan astam ündistandıq dauıs bergen. Eldegi partiyalar Parlamenttegi 543 orınğa bar küşin salıp talastı.

El konstituciyasına säykes, ükimetti qwru üşin sayasi partiya Parlamenttegi 272 orındı ieleui kerek. Bwğan deyin eldiñ prem'er-ministri bolıp kelgen Narendra Modi basşılığındağı «Bharatiya Janata» wlttıq partiyası 2014 jılğı jeñisin qaytalau aldında twr. Modi sol ret Ündistan halqına eldi ekonomikası men armiyası quattı älemdik super derjavağa aynaldıramın dep uäde bergen. Bwl retki saylauda eldiñ kosmostıq bağdarlaması «bwrın bolıp körmegen tabısqa qol jetkizgenin», zımırandardıñ sätti sınaqtan ötkenin alğa tarttı.

Onıñ saylaudağı bastı qarsılası – Ündistan Wlttıq Kongresi partiyasınıñ jetekşisi Rahul Gandi boldı. Ol Modige «eldegi demokratiyalıq instituttardı joyıp jatır» degen ayıp taqqan bolatın.

Kezekti saylaudağı partiyalardıñ bastı ügit taqırıbı ekonomikalıq problemalarğa bağıttalğan. Äsirese, jwmıssızdıqtı qısqartu turalı uäde bergen partiyalar köp boldı. Sebebi, quattı ekonomikasına qaramastan ündistandıqtardıñ basım köpşiligi kedeyşilikpen ömir sürude.

Kezekti saylaudı ötkizu üşin 7 mlrd AQŞ dolları jwmsalğan. Bwl AQŞ-tıñ 2016 jılğı prezident jäne Kongress saylauına ketken qarajattan 500 mln dollar köbirek. Ortalıq saylau komissiyasınıñ özinde 300 müşe bolıp, olarğa qosımşa 10 mln adam saylau jwmıstarına tartılğan.

Dauıs beru qwqığı bar ündistandıqtardı tolıq qamtu üşin saylau komissiyasınıñ müşeleri tikwşaq, qayıq, tipti pilge minip te alıs-alıs aymaqtarğa deyin aralağan.

“The Qazaq Times”