Qırğızstandıq sayasatker Ömirbek Babanov. Foto: Zakon.kz.

Bügin Babanov Qırğızstanğa oralmaq. Eldegi «Respublika» partiyasınıñ bwrınğı jetekşisi bolğan onıñ elge oraluı türli dau-damayğa da mwrındıq boluda. Ömirbek Babanovtıñ keluine qarsı Bişkekte narazılıq şeruler wyımdastırıp jatqandar da bar. Al, onıñ jaqındarı art-artınan swraqqa tartıluda. Bir jarım jıl şetelderde bas sauğalap jürgen Babanovtıñ osınday sayasi qısımdarğa qaramastan eline baruğa täuekel etkeni qalay? Nemese, Babanovtıñ Qırğızstanğa qaytuınıñ qanday sayasi mäni bar?

Ömirbek Babanovqa bwdan bwrın «Konstituciyalıq tüzimdi küşpen özgertuge tırısqan» jäne «Wltaralıq, äleumettik jäne dini arazdıqtı qozdırğan» degen ayıptar tağılğan bolatın. Babanov Bişkekke bet tüzegennen tartıp onıñ memlekettik qızmettegi tuısqandarı swraqtarğa tartıluda. Tergeuge tüskenniñ biri Babanovtıñ tuğan jieni delingen «Qırğızstan» banki direktorlar keñesi törağasınıñ orınbasarı Jänibek Mırzabaev. Onı ekonomikalıq qılmıstarğa qatısı bar degen küdikpen swraqqa alğan. Bes sağat boyı tergeuge alınğan Mırzabaev özine qarsı tergeudiñ Babanov Bişkekke qaytatının mälimdegennen keyin bastalğanın aytqan.

Qırğızstanda Babanovtıñ elge oraluına qarsı top ta, onı jaqtauşı topta türli ereuilder, baspasöz mäjilisterin ötkizude. Onıñ jaqtastarı jergilikti bilik Babanovtıñ elge keluine jäne jwrtpen kezdesu ötkizuine kedergi keltirp jatır dep mälimdegen.

Qırğızstannıñ keybir sayasatkerleri Babanovtıñ bwl jolı elge oraluı «sayasi şou» dep bağalağan. Bwnday pikirdiñ birin sayasatker Tursınbek Akun aytqan. Ol sözinde: «Babanov qazirgi bilikke qarsı toptar küşeygen kezde «mine men de barmın» degendey körinip jatır. Ol öziniñ elge keletinin sonşalıqtı dabıra etui de sodan. Bwl kez oğan eñ tiimdi oray jaratıp otır. Bwğan deyin nege kelmegen?», – deydi.

Al, bwrınğı prezident Atambaev basqarıp otırğan QSDP (Qırğızstan Social-Demokrattar Partiyası) Babanovtıñ elge keluinen qattı alañdap otır. Sebebi, Babanov aldınğı saylauda atalğan partiyağa qarsı ıqpaldı küşterdiñ biri bolğan. 600 mıñ saylauşı Babanovtı qoldağan bolatın. Aqpan ayınıñ bas şeninde Atambaev Babanovtıñ qamaudağı jaqtastarına sot şeşimi jariyalanbay jatqanın aytıp, sot şeşimin şığaruğa eki ay uaqıt beretinin, bwğan deyin Babanovtıñ jaqtastarına ükimet kesilmese eldi massalıq ereuilge şaqıratının aytqan.

Biraq, bwğan prezident Jienbekov (Jeenbekov) ereuil jasap, bilikke qısım jasaumen mäseleniñ şeşilmeytinin aytqan bolatın. Bişkek biligi bolsa Babanovtıñ jaqtastarı jasağan beybit şerulerge barınşa kedergi keltirude.  Ayta keteyik, bwğan deyin qarsılas sanalıp kelgen prezident Jienbekov pen Babanov ortaq til tabısıp, Atambaev pen Madumarov odağına qarsı birikti degen sözder de tarağan. Qalay degen künde de Qırğızstandağı eñ bay adamdardıñ qatarında twratın Babanovtıñ Bişkekke qaytuı qırğız elindegi sayasi ortanıñ «temperaturasın köterdi».

“The Qazaq Times”