Qazaq Times رەداكتسياسىنا قىزىلوردا وبلىسىنداعى №60 تۇزەتۋ مەكەمەسىندە قاماۋدا وتىرعان تاۋەلسىز جۋرناليست، ساياسي تۇتقىن دۋمان مۇحامەتكارىمنىڭ جازعان ارىزى كەلىپ ءتۇستى. حاتتا ول ءوز ومىرىنە تونگەن قاۋىپ، قىسىم مەن زاڭسىزدىقتار تۋرالى بايانداپ، قازاقستاننىڭ ەڭ جوعارعى مەملەكەتتىك ورگاندارىنا ۇندەۋ جاساعان.

 

قر پرەزيدەنتى اكىمشىلىگىنە،

قر باس پروكۋراتۋراسىن،

قر ءىىم وزىندىك قاۋىپسىزدىك بولىمىنە،

قر ءىىم قىلمىستىق اتقارۋ جۇيەسى كوميتەتىنە،

قر پارلامەنتى سەناتى، ماجىلىسىنە

(قۇدايعا قاراعاندارى تانىسۋ ءۇشىن)

قورعاۋشىلارىم: عالىم نۇرپەيىسوۆ جانە «ار، رۋھ، حاق» قق باسشىسى باقىتجان تورەعوجينا نازارىنا.

قاۋىپسىزدىك تالاپ ەتۋ ارىزى

اۋەلى تالاپتارىمدى ءتىزىپ وتەيىن:

  1. مەنىڭ، مۇحامەتكارىم. د.ا-نىڭ ومىرىنە قاۋىپ تونگەندىكتەن وزىمە قاۋىپسىزدىك تالاپ ەتەمىن. مەنى شۇعىل تۇردە زاڭعا سايكەس الماتى ماڭىنا اۋىستىرۋدى تالاپ ەتەمىن. ويتكەنى، قىزىلوردادا №60 مەكەمە تاراپىنان عانا ەمەس وبلىستىق پروكۋراتۋرا، وبلىستىق قاجد، وبلىستىق پوليتسيا دەپارتامەنتى تاراپىنان ماعان قارسى ۇيىمداسقان جۇيەلى قىسىم بايقالۋدا.
  2. پرەزيدەنت اكىمشىلىگى، باس پروكۋراتۋرا جانە قوس پالاتالى پارلامەنت دەپۋتاتتارىنان قۇرىلعان توپ مەنىمەن جەكە كەزدەسۋدى تالاپ ەتەمىن.
  3. بەس اي ءسال-ءپال باسىلىپ 20.08.2025 ج كۇنى قايتا جاندانعان ءتىپتى بۇرىنعىسىنان جامان كۇشەيگەن قىسىمدارعا قاتىستى «زاڭ مەن جاقتا» دەپ وڭدى-سولدى جەلىمدەمەي-اق جاپسىرا بەرەتىن اكىمشىلىك جازالار مەن تامىزدىڭ التىسى كۇنى «تۇرمەدە اتىلعان وققا» قاتىستى استانادان ارنايى تەرگەۋ توبى جىبەرىلۋىن تالاپ ەتەمىن. ول توپ تەكسەرىستى №60 مەكەمەدە عانا ەمەس وبلىستىق پروكۋراتۋرادا، وبلىستىق قاجد مەن وبلىستىق پد-دە جۇرگىزسىن.
  4. 06.08.2025 ج. كۇنى «تۇرمەدە اتىلعان وق» مەنى بالاعاتتاعان (بوقتاعان جانە شىعۋ تەگىمە ءتىل تيگىزگەن) فارحات سەيىتوۆ سياقتى قىزمەتكەرلەرگە قاتىستى جانە جازعان شاعىمدارىمنىڭ مەكەمەدەن جىبەرىلمەۋى بويىنشا №2 قاپاس ىشىندەگى، بەينەجەتوندارداعى جانە دالىزدەگى ۆيدەولار مۇقيات زەرتتەلسىن.
  5. مەنىڭ تۇرمە ۇلگىسىندەگى (روبو) كيىمدى كيمەۋدەن باسقا بۇكىل اكىمشىلىك جازالار مەن ەسكەرتۋلەر كۇشىن جويسىن.

ەندى ارىزدىڭ وزىنە كەلسەك. شىنىن ايتسام وسى كۇندە مەنىڭ حات جازۋ تۇگىل كىتاپ وقۋعا كۇشىم جوق. 29.08.2025 ج. كۇنى «توتاليتارلى كونستيتۋتسيانىڭ «30 جىلدىعىنا» ارنالعان اشتىعىم ءالى توقتاعان جوق. سودان بەرى ون (10) كەلى سالماق تاستاپپىن. تاۋەلسىزدىكتىڭ وتىز ءتورت (34) جىلدىعىنا دەيىن شىداسام سالماعىم بالكىم سول وتىز تورتكە دەيىن ءتۇسىپ تە قالار…

نەگىزى بۇل شاعىمدى جازۋىما مەنى ابدەن قاجىتقان قىزىلوردالىق قاجد-نىڭ ورىنباسارى اسا دارىندى ادىلەت پولكوۆنيگى ج. زيابەكوۆ تۇرتكى بولدى. ول كىسى 05.09.2025 ج. كۇنى كىرىس №655د جاۋابىندا – «60 مەكەمە قىزمەتكەرلەرىنىڭ زاڭسىز ارەكەتتەرى ءوز دالەلىن تاپپادى» – دەپ جازىپتى دا ارتىنان «سەن ءوزىڭ كاكاي» دەگەندەي «جازا وتەۋ ءتارتىبى مەن مىندەتتەرىن بۇزعانىڭىز انىقتالدى» دەپتى. ونىمەن قويماي قوقك №419 بابىمەن قورقىتادى.

شىندىعىنا كەلگەندە قاجد-دەن بىردە-بىرەۋى كەلىپ مەنىمەن سويلەسكەن ەمەس. ەشقانداي قىزمەتتىك تەرگەۋ جۇرگەن جوق. ال، 06.08.2025 ج. كۇنى قاپاس ىشىندە جارىلعان بەلگىسىز زاتقا قاتىستى ارادا جارتى اي سالىپ 20.08.2025 ج. كۇنى ۋچاسكەلىك ينسپەكتور 19:20-دا كەلىپ ات-ءۇستى، نەم كەتتى – دەگەن تەرگەۋ جۇرگىزگەن بولدى. ونىڭ وزىندە «بۇعان دەيىن2012,2020 دەگەن باسقا جىلدارى شاعىم تۇسىرىپپە ەدىڭىز؟ – دەگەن ءبىر ءتۇرلى سۇراقتار قويىپ ءوزىمدى مازاق قىلىپ كەتتى. سۇراق-جاۋابىمىز سول پوليتسەيدىڭ بەينەجەتونىنا ءتۇستى.

ال، 06.08.2025 ج. كۇنگى ساعات 16:20-17:00 ارالىعىنداعى №2 قاپاس ىشىندەگى، دالىزدەگى جانە ايعاق زاتتاردى (ۇساق شەگە سياقتى 3-4 تەمىر زاتتى) جويىپ جىبەرگەن كەزەكشى باعلان قاليەۆتىڭ بەينەجەتونىنداعى ۆيدەولار سول بەتى زەرتتەلمەدى. №2 قاپاس ىشىندەگى جارىلعان زاتتان قالعان قارا داقتاردا زەرتتەۋگە الىنبادى. قىزىلوردا وبلىستىق پروكۋراتۋرانىڭ ورىنباسارى ماحمۋت الماس تا بۇل جاتقا نەمقۇرايلىق تانىتىپ وتىر. 11.08.2025 ج. كۇنى جەكە قابىلداۋمەن عانا شەكتەلدى.

نەگە ەندى عانا قاۋىپسىزدىك تالاپ ەتىپ وتىرمىن؟ ويتكەنى، مەندە ءادىل تەرگەۋ وتەدى دەگەن (06.08.2025 ج. كۇنى جارىلعان زاتقا بايلانىستى) ءۇمىت بولعان ەدى. ءبىر اي ءوتتى. جارىلعىش زاتتى قاپاسقا كىرگىزگەن ادامنىڭ ارتىن كەزەكشى باعلان قاليەۆ جاپتى. ال، ونىڭ ارتىن №60 مەكەمە باسشىلىعى، ولاردىڭ ارتىن وبلىستاعى باسقا قۇزىرلى ورگاندار جابا باستادى. ياعني مەنىڭ ومىرىمە قاۋىپ توندىرگەن №60مەكەمە ەمەس بۇكىل ورگاندار دەگەن كۇدىگىم بار. سوندىقتان قىزىلوردا وبلىسىندا جانە وعان كورشىلەس باسقا ايماقتاردا ماعان تىنىشتىق جوق. مەن ارينە ءولىم جازاسىنا «كەسىلگەن» ادام ەكەنىمدى ءتۇسىندىم. الماتىدا بولسامدا اجال قۋىپ جەتەدى. دەگەنمەن، ۇيىمە جاقىن ولۋگە مۇرسات بەرىڭىزدەر.

بيلىكتە وتىرعان ماعان جاناشىرلار نازارىنا: ەگەر مەنى الماتى ماڭىنا اۋىستىرماي جاتىپ اياق-استى قىزىلوردا تۇرمەسىندە ءولىپ كەتسەم «اسىلىپ ءولدى» نەمەسە ءتىلىنىپ ءولدى دەگەندەرگە سەنبەڭىزدەر. مەن – ادىلدىك جولىنداعى كۇرەسىمدى جالعاستىرۋ ءۇشىن ءومىر سۇرگىم كەلەدى.

«ءپىس قازانىم بەس اي» دەگەنگە «وتىرايىن ون اي» دەگەن قوجاكەڭنىڭ ءسوزى ەرىكسىز ويىما ورالادى. مەنىڭ دە №60 مەكەمەدە وتىرعانىما ون اي بولدى. شىق بەرمەس شىعاي بايدىڭ قازانى ەكى رەت پىسەتىن ۋاقىت بولدى. ىشىنە تاس ءتۇسىپ كەتكەن بە ايتەۋىر قازانداعى ەت پىسپەك تۇگىل سۋى دا ىسىمادى. ستارو-نوۆىي كازاحستان-داعى سياقتى قازاندا دا وتىز ءتورت جىلدىق تۇراقتىلىق سياقتى… ون ايدىڭ ىشىندە ۇنسىزدىك ساقتاپتىم-تىرىس وتىرىپ تا كوردىم. الايدا، مەنىڭ تىنىشتىعىمدى مۇنداعى كەيبىر قىزمەتكەرلەر السىزدىككە بالاعان سياقتى. دورەكى سويلەدى، بالاعاتتادى، شىعۋ تەگىمە ءتىل تيگىزدى. ەندى مىنە تاعى ارىز-شاعىمدارىمدى جىبەرمەيتىن ەسكى ادەتتەرىنە باستى. ۇستىمىزدەگى جىلدىڭ 20,26,28 جانە 29 تامىز كۇندەرگى شاعىمدارىم شىقپادى. ەرىكسىز كامەرا بەتىن جاۋىپ، ۋلاپ-شۋلاپ 28 مەن 29 تامىز كۇنگى ارىزدارىمدى ايتەۋىر جىبەرتتىم. ال، 20 مەن 26 تامىز كۇنگى شاعىمدارىم سول بەتى جوق. وسى شاعىمدى تاعى جوق قىلىپ جىبەرمەسە كورىم. ايتپاقشى، 20.06.2025 ج. كۇنگى «ار،-رۋھ-حاق» قوعامدىق قورى باسشىسى باقىتجان تورەعوجيناعا جازعان توعىز بەتتىك حاتىمدى 16:25 تە قاپاس ىشىندەگى بەينەباقىلاۋ كامەراسىنا ءبىر-بىردەن كورسەتىپ جاساق باستىعى ءالي جۇباتاروۆتىڭ قولىنا ۇستاتىپ جىبەرگەنمىن. ال، 26.08.2025 ج. كۇنگى ەسكە سالۋ شاعىمىن تاڭعى تەكسەرىس كەزىندە (09:15) كەزەكشى قۇتتىبەكتىڭ قولىنا ۇستاتتىم. مۇنىڭ الدىندا 11.03.2025, 13.03.2025 جانە 26.03.2025 ج. اراز-شاعىمدارىم جوعالعان ەدى. بۇلاردى دا سول كۇنگى ۆيدەودان كورە الاسىزدار.قاجك ۆيدەو مۇراعاتى توعىز ايعا دەيىن ساقتالاتىنىن ەسكەرسەك تەرگەۋ جۇرگىزۋگە ءالى ۋاقىت جەتەدى. سول سياقتى 06.08.2025 ج. كۇنگى مەن وتىرعان №2 قاپاستا جارىلعان زات بويىنشا دا ۆيدەوماتەريالداردى الدىرساڭىزدار ەكەن. اسىرەسە، ايعاق زاتتاردى جويىپ قىلمىسكەردىڭ ءىزىن جاسىرعان باعلان قاليەۆتىڭ بەينە جەتونىن تەرگەۋ كەرەك.

ەندى مەنىڭ تۇرمە ۇلگىسىندەگى كيىمدى (روبو) كيمەۋدەن باسقا اكىمشىلىك جازالار مەن ەسكەرتۋلەر كۇشىن جويۋعا قاتىستى ايتارىم. ارىز-شاعىمدارىم شىقپاسا، قىزمەتكەرلەر مازاق قىلىپ بالاعاتتاسا، تەگىمە ءتىل تيگىزسە مەن بەينە باقىلاۋ كامەراسىن جاپپاي قايتەمىن؟ ونىڭ وزىندە استاناداعى قاجك نازارىن اۋدارسا ەكەن دەپ جابامىن. نەگىزى كامەرا جابىلماس بۇرىن كەمىندە ءۇش ساعات بۇرىن قىزمەتكەرلەردى، باسشىلىقتى ەسكەرتەمىن. ىمداپ، قاعازعا جازىپ كامەراعا كورسەتەمىن. الدىن الۋ ارەكەتى بولماعاندىقتان بارىپ جابامىن. سوسىن مەنى بوقتاعان قىزمەتكەرلەر نەگە جاۋاپقا تارتىلمايدى دا مەن نەگە اكىمشىلىك جازاعا تارتىلا بەرەدى ەكەنمىن. قىسقاسى مەنىمەن جەكە سويلەسۋ ءۇشىن استانادان جىبەرىڭىزدەرشى. ايتارىم كوپ.

10.09.25ج كۇنى دە كامەرا جابىق تۇردى. ويتكەنى باسشىلىق 5 كۇن بويى مەنى قابىلداماي الداپ ءجۇر. قۇرمەتپەن.

ۇرى جۇيەنىڭ قاس جاۋى مۇحامەتكارىم د.ا. 11.09.2025ج.

وسى ارىز ءۇش(3) بەتتەن تۇرادى.

رەداكتسيا حات مازمۇنىن وزگەرتپەي جاريالادى. اۆتور كوتەرگەن ماسەلەلەر بويىنشا قۇزىرلى ورگانداردان رەسمي جاۋاپ كۇتەمىز. وقىرمانداردىڭ دا پىكىرىن ءبىلۋ ماڭىزدى — ويلارىڭىزدى تومەندەگى پىكىر الاڭىندا قالدىرا الاسىزدار.

The Qazaq Times