12 قازاندا الماتى اكىمشىلىك سوتى اكىمشىلىك كودەكستىڭ 456-2 بابىنىڭ 1-تارماعى ("جالعان اقپارات ورنالاستىرۋ، تاراتۋ") بويىنشا ازات ەۋروپا/ازاتتىق راديوسىنىڭ قازاق قىزمەتى ۇستىنەن تۇسىرىلگەن ارىزعا قاتىستى شاعىمدى قاراي باستادى. ىستە جاۋاپكەر رەتىندە ازاتتىقتىڭ الماتى بيۋروسىنىڭ جەتەكشىسى قاسىم امانجول دەپ كورسەتىلگەن. شاعىم بەرۋشى – شىمكەنت تۇرعىنى الىشەر تۋراباەۆ.

شاعىمدانۋشى اتباسار كولونياسىندا ازاپتالعان تيمۋر دانەباەۆتى كوكشەتاۋ قالاسىنداعى يزولياتورعا اۋىستىرعانى تۋرالى ورىس تىلىندەگى جاڭالىقتا ۇجىمدىق قاۋىپسىزدىك شارتى ۇيىمىنا (ۇقشۇ) قاتىستى "رەسەي جەتەكشىلىك ەتەتىن" دەگەن تىركەستى پايدالانۋ دۇرىس ەمەس دەپ سانايدى. دانەباەۆ 2022 جىلى قاڭتار كەزىندە قازاقستانعا ۇقشۇ اسكەرىنىڭ كىرگىزىلۋىن سىناپ، كەيىن 3,5 جىل تۇرمەگە كەسىلگەن. ول وزىنە تاعىلعان ايىپتى جوققا شىعارىپ، اپەللياتسيالىق شاعىم تۇسىرگەنىمەن ۇكىم كۇشىندە قالعان.

اكىمشىلىك ءىستى سۋديا راۋزا اليەۆا قاراپ جاتىر.

ازاتتىقتىڭ ادۆوكاتى جانعازى كۇنسەركين 12 قازان كۇنگى سوتتا اكىمشىلىك قۇقىق بۇزۋشىلىق بولماعاندىقتان سوت ءوندىرىسىن توقتاتۋ تۋرالى ءوتىنىش بەردى. ول سونىمەن بىرگە لينگۆيستيكالىق ساراپتاما تاعايىنداۋدى دا ءوتىندى.

سوت وتىنىشتەردى اشىق قالدىرىپ، سوت وتىرىسىن 20 قازان ساعات 11-گە بەلگىلەدى.

1992 جىلى ماسكەۋ باستاماسىمەن قۇرىلعان ۇقشۇ-عا قازاقستان جانە رەسەيمەن قاتار بەلارۋس، قىرعىزستان، تاجىكستان، ارمەنيا مۇشە. ۇقشۇ-نىڭ بىرلەسكەن شتابىنىڭ جەتەكشىسى – رەسەي فەدەراتسياسىنىڭ اسكەري مامانى، گەنەرال-پولكوۆنيك اناتولي سيدوروۆ. ۇقشۇ-نىڭ قازىرگى باس حاتشىسى – قازاقستاننىڭ رەسەيدەگى بۇرىنعى ەلشىسى يمانعالي تاسماعامبەتوۆ. ۇيىمنىڭ شتاب-پاتەرى ماسكەۋدە ورنالاسقان.

2022 جىلى قاڭتاردىڭ باسىندا قازاقستان قالالارىنداعى نارازىلىق اكتسيالارى كەيبىر قالالاردا تارتىپسىزدىككە ۇلاسىپ، 200-دەن استام ادام قازا بولعان. سول كەزدە اقوردانىڭ وتىنىشىمەن ۇقشۇ قازاقستانعا اسكەرىن كىرگىزگەن. ساراپشىلار ۇيىم قۇرىلعالى بەرى ۇقشۇ كۇشى العاش رەت پايدالانىلىپ وتىرعانىن ايتقان.

بيىل اكىمشىلىك كودەكسكە ەنگىزىلگەن 456-2 باپتى ("جالعان اقپارات ورنالاستىرۋ، تاراتۋ") قۇقىق قورعاۋشىلار "جۇمساق" تسەنزۋرا قۇرالى دەپ اتاعان. قازاقستاننىڭ مەديا كەڭىستىگىندە ازاتتىق – وسى باپپەن جاۋاپقا تارتىلىپ وتىرعان العاشقى اقپارات قۇرالى.

ازات ەۋروپا/ازاتتىق راديوسى – ورتالىق ازيا، شىعىس ەۋروپا مەن تاياۋ شىعىستا 27 ەلدەن حابار تاراتاتىن تاۋەلسىز حالىقارالىق ۇيىم. اقش كونگرەسى قارجىلاندىراتىن ازاتتىق ۇكىمەتتەر مەن ساياسي توپتاردان تاۋەلسىز، ونىڭ رەداكتسيالىق ساياساتىنا ەشكىم ارالاسا المايدى. ازات ەۋروپا/ازاتتىق راديوسىنىڭ ميسسياسى ءسوز بوستاندىعى شەكتەلگەن ەلدەردەن تسەنزۋراعا ۇشىراماعان اقپارات تاراتۋ ارقىلى دەموكراتيا قۇندىلىقتارى مەن ينستيتۋتتارىن العا جىلجىتۋ. ازاتتىقتىڭ قازاق قىزمەتى 1953 جىلى قۇرىلعان، 2008 جىلى قازاق جانە ورىس تىلدەرىندە اقپارات تاراتىن ۆەب-سايتى اشىلدى.