رەسەي فەدەرالدىق قاۋىپسىزدىك قىزمەتى قارۋلى بۇلىككە شاقىرعانى ءۇشىن "ۆاگنەر" جەكەمەنشىك اسكەري كومپانياسىنىڭ جەتەكشىسى ەۆگەني پريگوجيننىڭ ۇستىنەن قىلمىستىق ءىس قوزعادى. بۇل جونىندە رەسەي باس پروكۋراتۋراسى حابارلادى. بۇل باپ بويىنشا ەڭ جوعارعى جازا – 20 جىل. بۇل تۋرالا ازاتتىق راديوسى جازدى.

جۇما كۇنى ەۆگەني پريگوجين "ۆاگنەر" جاۋىنگەرلەرىن ارتيللەريا مەن اسكەري تىكۇشاق كومەگىمەن اتقىلاپ جاتىر دەپ رەسەي قورعانىس مينيسترلىگىن ايىپتاعان. ونىڭ ايتۋىنشا، وسىنىڭ كەسىرىنەن ونىڭ اسكەريلەرى قازا تاپقان.

جۇما كۇنى كەشكە پريگوجيننىڭ تەلەگرام-ارناسىندا داۋىسى سونىكىنە ۇقسايتىن ادام "ەلدىڭ اسكەري باسشىلىعىنا قارسى" بۇلىك باستاپ، "ادىلدىك ورناتاتىنىن" مالىمدەدى. ول جۇرتتى "قارسىلىق بىلدىرمەي بەرىلۋگە" شاقىردى جانە قاراماعىندا 25 مىڭ سارباز بار ەكەنىن ەسكەرتتى. بىراق ەلدىڭ ساياسي باسشىلىعىن باسىپ الۋ ويى جوق ەكەنىن، "پرەزيدەنت بيلىگى، ىشكى ىستەر مينيسترلىگى، ۇكىمەت جانە باسقا دا قۇرىلىمدار بۇرىنعى قالىپپەن جۇمىس ىستەي بەرەتىنىن" ايتتى.

ونىڭ ايتۋىنشا، جۇما كۇنى "ۆاگنەر" توبىنىڭ كوزىن جويۋ ءۇشىن" رەسەيدىڭ دونداعى روستوۆ قالاسىنا قورعانىس ءمينيسترى سەرگەي شويگۋ كەلىپ، قايتا "قاشىپ كەتكەن". رەسەي قورعانىس مينيسترلىگى پريگوجيننىڭ اتىنان تاراپ جاتقان اقپاراتتىڭ ءبارى شىندىققا جاناسپايتىنىن، تەك ارانداتۋ ماقساتىندا تاراتىلىپ جاتقانىن ايتتى.

ازاتتىقتىڭ ورىس قىزمەتىنىڭ حابارلاۋىنشا ماسكەۋ مەن دونداعى روستوۆتا "بەكىنىس" جوسپارى باستالعان. روستوۆ كوشەلەرىندە اسكەري تەحنيكا ءجۇر، كەي كوشەلەر جابىلعان.

ۆۆس-ءدىڭ حابارلاۋىنشا ماسكەۋدە فسب باسقارماسى مەن اسكەريلەر دابىل بويىنشا جۇمىلدىرىلعان. ماسكەۋ مەن روستوۆ اراسىنداعى فەدەرالدىق تراسساعا بلوكپوستتار قويىلعان. رەسەي استاناسىنداعى مەملەكەتتىك مەكەمەلەردىڭ ماڭىنا كۇزەت قويىلدى دەگەن دەرەكتەر بار. كەي ساراپشىلار رەسەيدە "ازامات سوعىسى باستالدى" دەگەن دە پىكىر جازىپ جاتىر.

جۇما كۇنى جاريالانعان جارتى ساعاتتىق ۆيدەومالىمدەمەسىندە پريگوجين ۋكرايناعا شابۋىل نەگىزسىز بولعانىن، ەل باسشىلىعى رەسەي حالقىن "الداپ وتىرعانىن" ايتقان.