تارازدا قاڭتار بويىنشا ءىستى بولعان توعىز ادامنىڭ سوتىندا سوڭعى ءسوز ايتىلدى. كۇدىكتىلەردىڭ كەيبىرى تاعىلعان ايىپتاردى مويىندادى. ەندى ءبىرى ىستەگەن ىسىنە وكىنبەيتىنىن ايتتى. بارلىعى سوتتان ءادىل شەشىم شىعارۋدى سۇرادى.

18 ساۋىردە وتكەن سوت وتىرىسىنا باق وكىلدەرى تاعى دا كىرگىزىلمەدى. سوت حاتشىسى جۋرناليستەرگە پروتسەستىڭ تەرگەۋ يزولياتورى عيماراتىندا ءوتىپ جاتقانىن العا تارتىپ، رەجيمدى نىسانى فوتو-ۆيدەوعا تۇسىرۋگە بولمايتىنىن ايتتى. باق وكىلدەرى پروتسەستى وبلىستىق سوت عيماراتىندا مونيتوردان باقىلادى.

«ماعان جالا جاپقاندار قالاي تىنىش ءومىر سۇرەتىنىن تۇسىنبەيمىن»

قاڭتار وقيعاسى كەزىندە قايتىس بولعان ۇقك پودپولكوۆنيگى داستان ءادىلبايدى ءولتىردى دەپ ايىپتالعان 38 جاستاعى ەربول جۇمانوۆ سوڭعى سوزىندە وزىنە جالا جاپقان ادامدارعا قايىرىلىپ، ولاردىڭ وسىدان كەيىن ارى قاراي قالاي ءومىر سۇرەتىنىن تۇسىنبەيتىنىن ايتتى.

– مەن تۇرمەدە ءبىر جىلدان استام ۋاقىت بويى وتىرمىن. وسى ۋاقىتقا دەيىن ءوزىمنىڭ كىناسىز ەكەنىمدى دالەلدەپ كەلە جاتىرمىن. بۇل جەردە بارلىعى مەنى تىڭدادى، بىراق ەشقانداي ناتيجە جوق ەكەنىن بارلىقتارىڭىز بايقاپ وتىرعان شىعارسىزدار. بۇنىڭ بارلىعى قانشا ۋاقىتقا سوزىلاتىنىن بىلمەيمىن. بىراق مەن تۇبىنە دەيىن كۇرەسۋگە دايىنمىن. وتكەن سوت وتىرىسىندا مەن سوعىس جاريالايتىن بولعانمىن. مەن بۇل سوعىستى ماعان جالا جاپقان ادامدارعا جاريالاپ وتىرمىن. كۋاگەرلەر مەن جابىرلەنۋشىلەر جالعان سويلەپ، ادامدى 15 جىلدان ءومىر بويىنا دەيىن باس بوستاندىعىنان ايىرىپ، قالاي عانا تىنىش ءومىر سۇرەتىندەرىن تۇسىنبەدىم، – دەدى ول.

ەربول جۇمانوۆ وزىنە تاعىلعان ايىپتى ءىشىنارا مويىندادى جانە پرەزيدەنت توقاەۆ ايتقان جاڭا قازاقستانعا سەنبەيتىنىن مالىمدەدى.

– مەنىڭ مارقۇم اكە-شەشەم «ءولىپ بارا جاتساڭ دا شىنىڭدى ايت» دەپ تاربيە بەرگەن. بۇل كىسىلەردە دە امال بولماعان شىعار، بۇلارعا دا قىسىم كورسەتكەن شىعار. بولماسا، باسشىلارى بۇيرىق بەرگەن شىعار. ونى وزدەرىڭىز ويلانىپ كورەرسىزدەر. بۇل زاڭسىزدىقتى توقتاتاتىن جاراتۋشى اللاعا سەنەمىن، سوسىن، اقيقات ءۇشىن كۇرەسىپ جۇرگەن قازاق باتىرلارىنا سەنەمىن. ال پرەزيدەنتىمىز ايتقان جاڭا قازاقستانعا سەنە المايمىن. سەبەبى «باياعى جارتاس، سول جارتاس». بولاشاعىمىزدىڭ وتىرىككە بارا جاتقانى اقيقات... مەن قارۋ العانىمدى مويىندايمىن. قاتەلىك جاسادىم. وعان شىنىمەن دە وكىنەمىن. بىراق 380 باپپەن تاعىلعان ايىپتى مويىندامايمىن. سەبەبى مەن ول جەردە بولعان جوقپىن. ونى وسى جەردە وزدەرىڭىزگە دالەلدەدىم، – دەدى جۇمانوۆ.

«ىستەگەن ىسىمە وكىنبەيمىن»

ءىس بويىنشا جاپپاي تارتىپسىزدىك ۇيىمداستىردى دەپ ايىپتالعان 64 جاستاعى كاسىپكەر نۇراحان ماحاتوۆ ءوزىنىڭ ىستەگەن ىسىنە وكىنبەيتىنىن ايتتى.

– قۇرمەتتى سوت! بارلىعى ايتىلعان، ءوزىڭىز شەشىم شىعاراسىز. مەن بىلمەيمىن، مەنىڭ كىنام ول جەرگە بارىپ حالىققا باسۋ ايتقانىم شىعار. مەندە سول جەردە ء(ىس بويىنشا كۋاگەر بولعان – رەد) مىرزاليەۆ، باشيروۆ سياقتى تاس لاقتىرىپ، ورتەسەم، مۇمكىن بوستاندىقتا جۇرەر مە ەدىم. مەن ىستەگەن ىسىمە وكىنبەيمىن. مەن ول جەردە باسۋ ايتتىم. ءسىزدىڭ ءادىل شەشىمىڭىزگە دايىنمىن، – دەدى ول.

سوڭعى سوزدەن كەيىن سۋديا كەڭەسۋ بولمەسىنە كەتتى. ونىڭ ۇكىمدى قاشان وقيتىنى ازىرگە بەلگىسىز. سوت حاتشىسى كۇدىكتىلەردىڭ تۋىستارىنا ۇكىم وقىلاتىن كۇننىڭ ۋاقىتىن الدىن الا ەسكەرتىپ، ايتاتىنىن ايتتى.

7 ساۋىردە وتكەن سوت وتىرىسىندا ايىپتاۋشى پروكۋرور ايبول ساعىنتايدى 7 جىلعا، داۋرەن نۇراليەۆتى 6 جىلعا، ەربول جۇمانوۆتى 20 جىلعا، جاقسىلىق ابدۋللاەۆتى 7 جىلعا، نۇراحان ماحاتوۆتى 7 جىلعا، قانات نۇراحانۇلىن 7 جىلعا باس بوستاندىعىنان ايىرۋ جازاسىنا كەسۋدى سۇراعان. ال سالامات قوسانوۆ پەن دوسمۇحامبەت سادىقوۆتى 5 جىلعا، ەرماحان سايلاۋوۆتى 6 جىلعا سوتتاپ، راقىمشىلىق زاڭىنا ساي سوت زالىنان بوساتۋدى سۇراعان.