Tarazda Qañtar boyınşa isti bolğan toğız adamnıñ sotında soñğı söz aytıldı. Küdiktilerdiñ keybiri tağılğan ayıptardı moyındadı. Endi biri istegen isine ökinbeytinin ayttı. Barlığı sottan ädil şeşim şığarudı swradı.

18 säuirde ötken sot otırısına BAQ ökilderi tağı da kirgizilmedi. Sot hatşısı jurnalisterge procestiñ tergeu izolyatorı ğimaratında ötip jatqanın alğa tartıp, rejimdi nısanı foto-videoğa tüsiruge bolmaytının ayttı. BAQ ökilderi procesti oblıstıq sot ğimaratında monitordan baqıladı.

«Mağan jala japqandar qalay tınış ömir süretinin tüsinbeymin»

Qañtar oqiğası kezinde qaytıs bolğan WQK podpolkovnigi Dastan Ädilbaydı öltirdi dep ayıptalğan 38 jastağı Erbol Jwmanov soñğı sözinde özine jala japqan adamdarğa qayırılıp, olardıñ osıdan keyin arı qaray qalay ömir süretinin tüsinbeytinin ayttı.

– Men türmede bir jıldan astam uaqıt boyı otırmın. Osı uaqıtqa deyin özimniñ kinäsiz ekenimdi däleldep kele jatırmın. Bwl jerde barlığı meni tıñdadı, biraq eşqanday nätije joq ekenin barlıqtarıñız bayqap otırğan şığarsızdar. Bwnıñ barlığı qanşa uaqıtqa sozılatının bilmeymin. Biraq men tübine deyin küresuge dayınmın. Ötken sot otırısında men soğıs jariyalaytın bolğanmın. Men bwl soğıstı mağan jala japqan adamdarğa jariyalap otırmın. Kuägerler men jäbirlenuşiler jalğan söylep, adamdı 15 jıldan ömir boyına deyin bas bostandığınan ayırıp, qalay ğana tınış ömir süretinderin tüsinbedim, – dedi ol.

Erbol Jwmanov özine tağılğan ayıptı işinara moyındadı jäne prezident Toqaev aytqan Jaña Qazaqstanğa senbeytinin mälimdedi.

– Meniñ marqwm äke-şeşem «ölip bara jatsañ da şınıñdı ayt» dep tärbie bergen. Bwl kisilerde de amal bolmağan şığar, bwlarğa da qısım körsetken şığar. Bolmasa, basşıları bwyrıq bergen şığar. Onı özderiñiz oylanıp körersizder. Bwl zañsızdıqtı toqtatatın jaratuşı allağa senemin, sosın, aqiqat üşin küresip jürgen qazaq batırlarına senemin. Al prezidentimiz aytqan Jaña Qazaqstanğa sene almaymın. Sebebi «bayağı jartas, sol jartas». Bolaşağımızdıñ ötirikke bara jatqanı aqiqat... Men qaru alğanımdı moyındaymın. Qatelik jasadım. Oğan şınımen de ökinemin. Biraq 380 bappen tağılğan ayıptı moyındamaymın. Sebebi men ol jerde bolğan joqpın. Onı osı jerde özderiñizge däleldedim, – dedi Jwmanov.

«İstegen isime ökinbeymin»

İs boyınşa jappay tärtipsizdik wyımdastırdı dep ayıptalğan 64 jastağı käsipker Nwrahan Mahatov öziniñ istegen isine ökinbeytinin ayttı.

– Qwrmetti sot! Barlığı aytılğan, öziñiz şeşim şığarasız. Men bilmeymin, meniñ kinäm ol jerge barıp halıqqa basu aytqanım şığar. Mende sol jerde (is boyınşa kuäger bolğan – red) Mırzaliev, Başirov siyaqtı tas laqtırıp, örtesem, mümkin bostandıqta jürer me edim. Men istegen isime ökinbeymin. Men ol jerde basu ayttım. Sizdiñ ädil şeşimiñizge dayınmın, – dedi ol.

Soñğı sözden keyin sud'ya keñesu bölmesine ketti. Onıñ ükimdi qaşan oqitını äzirge belgisiz. Sot hatşısı küdiktilerdiñ tuıstarına ükim oqılatın künniñ uaqıtın aldın ala eskertip, aytatının ayttı.

7 säuirde ötken sot otırısında ayıptauşı prokuror Aybol Sağıntaydı 7 jılğa, Däuren Nwrälievti 6 jılğa, Erbol Jwmanovtı 20 jılğa, Jaqsılıq Abdullaevtı 7 jılğa, Nwrahan Mahatovtı 7 jılğa, Qanat Nwrahanwlın 7 jılğa bas bostandığınan ayıru jazasına kesudi swrağan. Al Salamat Qosanov pen Dosmwhambet Sadıqovtı 5 jılğa, Ermahan Saylauovtı 6 jılğa sottap, raqımşılıq zañına say sot zalınan bosatudı swrağan.