فوتو: اشىق دەرەككوزدەن

الماتى قالاسى بوستاندىق اۋدانىنىڭ №2 قىلمىستىق سوتى قاڭتار وقيعاسىنان سوڭ ازاپتالدىم دەگەن تيمۋر رادچەنكونىڭ شاعىمىن قاراپ، پوليتسەيلەر باقىت حاميت، ارنات بيمۋرزاەۆ جانە داۋلەت قالىمبايعا ۇكىم شىعاردى، -دەپ جازدى ورتالىق ازيا جاڭالىقتار قىزمەتى.

بۇل تۋرالى پروتسەستى قاداعالاعان قۇقىق قورعاۋشى باحىتجان تورەعوجينا Facebook پاراقشاسىندا حابارلادى.

سۋديا رومان سەليتسكي حاميت پەن بيمۋرزاەۆتى "ازاپتاۋ" بابىمەن ايىپتى دەپ تاۋىپ، ءۇش جىلعا سوتتادى. ولار جازاسىن قونىس كولونياسىندا وتەۋى ءتيىس. ال قالىمبايدىڭ "قىزمەتىنە سالعىرت قارادى" دەگەن ايىپپەن ءبىر جارىم جىلعا باس بوستاندىعى شەكتەلدى.

سوت ۇشەۋىن قىزمەتتە العان شەندەرىنەن ايىرىپ، ءۇش جىل ورگاندا جۇمىس ىستەۋگە تىيىم سالدى. ايىپتالۋشىلار سوتتا ءوز كىنالارىن مويىندامادى.

ءۇش پوليتسەيگە ۇكىم شىققانىن سۋديا سەليتسكيدىڭ حاتشىسى ايدانا ايدىلداەۆا راستادى، بىراق ول باسقا اقپارات بەرۋگە قۇقىعىم جوق دەپ ۇكىمگە قاتىستى پىكىر ايتپادى.

باقىت ءحاميتتىڭ ادۆوكاتى مارات ايداربەكوۆ ازاتتىققا "ۇكىممەن كەلىسپەيتىندەرىن، اپەللياتسيالىق شاعىم تۇسىرەتىندەرىن" جەتكىزدى.

ادۆوكاتتىڭ ويىنشا، تەرگەۋ كەزىندە كوپ زاڭ بۇزىلعان، ال تەرگەۋگە سەبەپ بولعان ۆيدەوجازبا زاڭسىز جولمەن الىنعان.

― مۇنداي ۆيدەوجازبا تەرگەۋ سوتىنىڭ سانكتسياسىمەن عانا الىنۋى كەرەك، سەبەبى وقيعا كۇزەتىلەتىن قۇپيا مەكەمە – پوليتسيا بولىمشەسىندە بولعان. بىراق تەرگەۋ سوتىنىڭ سانكتسياسى بولماعان. ەگەر دالەلدىڭ الىنۋ جولى زاڭسىز بولسا، سوت ول ۆيدەونى قابىلداماۋى كەرەك ەدى، - دەيدى ادۆوكات.

29 جاستاعى تيمۋر رادچەنكونى ازاپتاۋ ءىسى قاراشا سوڭىندا قارالا باستاعان. ول سوتتا "2022 جىلى 8 قاڭتاردا پوليتسەيلەر كولىك ايداپ كەتتى دەگەن كۇدىكپەن ءوزىن بوستاندىق اۋدانى پوليتسيا بولىمشەسىنە اپارىپ، سوققانىن" ايتقان. رادچەنكو پوليتسەيلەر ءتورت كۇن بولىمشەدە زاڭسىز ۇستاعانىن دا مالىمدەگەن.

10 قاڭتارداعى وتىرىستا پروكۋرور پوليتسەيلەرگە ءتورت جىل تۇرمە جازاسىن سۇراعان. ال رادچەنكو "قالىمباي مەن بيمۋرزاەۆ شىعىندى وتەگەنگە دەيىن كەشىرىم سۇرادى" دەگەن.

― ولار ءتورت جىل وتىرعانىن قالامايمىن، بۇل كوپ. ولاردى كەشىردىم، وتباسىلارى بار، جۇمىستان دا شىعارماساڭىزدار. ال باقىت حاميت كەشىرىم دە سۇراعان جوق، ودان مورالدىق شىعىن رەتىندە 300 مىڭ تەڭگە ءوندىرۋدى سۇرايمىن. كەشىرىم سۇرامادى. سۋديا، ءوزىڭىز شەشەرسىز، - دەدى رادچەنكو سوتتا.

ال سوتتاعى سوڭعى سوزدەرىندە حاميت، قالىمباي جانە بيمۋرزاەۆ ايىپپەن كەلىسپەگەن. بىراق بيمۋرزاەۆ رادچەنكوعا قول كوتەرىپ جىبەرگەنىن مويىنداعان.

― ايىپپەن كەلىسپەيمىن. تيمۋر رادچەنكومەن تانىس ەمەسپىن. قاڭتار وقيعاسى كەزىندە ءتورت كۇن دەمالىسسىز جۇمىس ىستەدىم. رادچەنكو ءتىل تيگىزگەندە سالىپ جىبەرگەنىم راس. ۇستىندەگى كيىمىنىڭ "كاپيۋشونىن" جۇلىپ العانىم دا راس. ازاپتامادىم. ۇكىم شىعاراردا ءتورت بالام بارىن ەسكەرسەڭىز، جابىرلەنۋشىدەن دە كەشىرىم سۇرادىم، - دەدى بيمۋرزاەۆ سوتتا.

سوت ۇكىمى ءالى كۇشىنە ەنگەن جوق.

2022 جىلى قاڭتار وقيعاسى كەزىندە ۇستالعان جۇزدەگەن ادام قاماۋدا ازاپتالعاندارىن ايتقان. باس پروكۋراتۋرا قاڭتار قىرعىنىندا قازا تاپقان 238 ادامنىڭ التاۋى ازاپتاۋدان كوز جۇمدى دەگەن.

بيلىك باسىندا ازاپتاۋ فاكتىلەرىن جوققا شىعارىپ كەلگەن، كەيىن ازاپتاۋ فاكتىلەرىن ايتۋشىلار كوبەيگەن تۇستا بۇل اقپاراتتى مويىندادى.

باس پروكۋرور بەرىك اسىلوۆ 5 قاڭتاردا پارلامەنتتەگى جيىندا ازاپتاۋ شاعىمدارى بويىنشا 329 ءىس قوزعالىپ، پروكۋراتۋرادا ۇقك مەن پوليتسيانىڭ 34 قىزمەتكەرىنىڭ ءىسى قارالىپ جاتقانىن ايتقان.