سەنات رەگلامەنتىنەن "قۇرمەتتى سەناتور" اتاعى الىندى. قازىر مۇنداي اتاق جوق. 12 قاڭتاردا ازاتتىق ءتىلشىسىنىڭ سۇراعىنا جاۋاپ بەرگەن سەنات سپيكەرى ماۋلەن اشىمباەۆ وسىلاي دەپ مالىمدەدى. ءۇش جىل بۇرىن ناۋرىزدا وتستاۆكاعا كەتەتىنىن مالىمدەگەن سوڭ نازارباەۆقا "قۇرمەتتى سەناتور" اتاعى بەرىلگەن ەدى. بۇل تۋرالى ورتالىق ازيا جاڭالىقتار قىزمەتى جازدى.

– وسىدان ەكى-ءۇش اپتا بۇرىن سەناتتىڭ رەگلامەنتىنە ءتيىستى وزگەرىستەر ەنگىزىلدى. سول كەزدە "قۇرمەتتى سەناتور" اتاعىن رەگلامەنتتەن الىپ تاستادىق. قازىر بىزدە ونداي ينستيتۋت جوق. شەشىم قابىلداعان سەبەبىمىز – بىلتىر ماۋسىمدا وتكەن رەفەرەندۋمدا كونستيتۋتسيادان تۇڭعىش پرەزيدەنت ەلباسىنا قاتىستى نورمالار الىنىپ تاستالدى. بۇل حالىقتىڭ شەشىمى. ەرتەڭ تۇڭعىش پرەزيدەنت تۋرالى زاڭنىڭ كۇشى جويىلايىن دەپ جاتىر. كونستيتۋتسيالىق سوتتىڭ ءتيىستى شەشىمى بار. سونى ەسكەرىپ، ءبىز دە رەگلامەنتتەن الىپ تاستاعانبىز. سول سەبەپتى بۇل جەردە ەشقانداي سۇراق بولۋى مۇمكىن ەمەس، - دەدى ماۋلەن اشىمباەۆ.

ونىڭ ايتۋىنشا، قازاقستاننىڭ سەناتى تاريحىندا "قۇرمەتتى سەناتور" اتاعى تەك ەكس-پرەزيدەنت نۇرسۇلتان نازارباەۆتا عانا بولعان. "سوندا بۇل اتاق نازارباەۆ ءۇشىن ارنايى شىعارىلعان با؟" دەگەن ازاتتىق ءتىلشىسىنىڭ سۇراعىنا اشىمباەۆ ناقتى جاۋاپ بەرمەدى، بىراق "تۇسىنىكتى عوي ءبارى" دەپ سولاي ەكەنىن "راستادى".

نازارباەۆقا "قۇرمەتتى سەناتور" اتاعىن بەرۋدى 2019 جىلى ناۋرىزدا انت بەرىپ، قازاقستان پرەزيدەنتى قىزمەتىنە كىرىسكەن قاسىم-جومارت توقاەۆ ۇسىنعان. سول جىلى مامىردا سەنات بيۋروسىنىڭ مۇشەلەرى ۇسىنىستى تۇگەل قولداعان. نۇرسۇلتان نازارباەۆ 19 ناۋرىزدا مەرزىمىنەن بۇرىن وتستاۆكاعا كەتەتىنىن مالىمدەگەن ەدى.

وسى اپتادا قازاقستاننىڭ كونستيتۋتسيالىق سوتى ءبىر توپ دەپۋتاتتىڭ ءوتىنىشىن قاراپ، "تۇڭعىش پرەزيدەنت - ەلباسى" زاڭىنىڭ كۇشىن جويعان.

  • 2000 جىلى قابىلدانعان "تۇڭعىش پرەزيدەنت – ەلباسى زاڭى" ەلدىڭ ەكس-پرەزيدەنتى نۇرسۇلتان نازارباەۆ پەن ونىڭ وتباسىنا كوپ باسىمدىق بەرەدى. زاڭعا ساي، نازارباەۆ پەن ونىڭ وتباسى مۇشەلەرى قىلمىستىق جاۋاپكەرشىلىككە تارتىلمايدى، قامالمايدى، مۇلىكتەرى تاركىلەنبەيدى، شەكتەۋ قويىلمايدى.
  • "تۇڭعىش پرەزيدەنت" زاڭىندا نازارباەۆ جانە ونىمەن بىرگە تۇراتىن وتباسى مۇشەلەرىنىڭ "بانكتىك شوتتارىنىڭ قۇپيالىعىنا جانە بانك شوتتارىنا تيىسپەۋگە كەپىلدىك بەرىلەتىنى" جازىلعان. قوعامدا "ەلباسى زاڭىن" جەكە باسقا تابىنۋ دەپ سىنعا العاندار كوپ بولعان.
  • ساراپشىلار قاڭتار وقيعاسىنان سوڭ نازارباەۆتىڭ بيلىككە ىقپالى السىرەدى، ال قازىرگى پرەزيدەنت قاسىم-جومارت توقاەۆتىڭ بيلىگى كۇشەيدى دەيدى. توقاەۆ ءوز سوزدەرىندە نازارباەۆ پەن ونىڭ اينالاسىن سىنعا الىپ، نازارباەۆتىڭ جاقىندارىن قىزمەتتەن العان. نازارباەۆتىڭ ۇلكەن قىزى داريعا نازارباەۆا ماجىلىستەگى دەپۋتاتتىق مانداتىن تاپسىرىپ بەردى. ەكس-پرەزيدەنتىڭ نەمەرە ءىنىسى قايرات ساتىبالدى مەن نازارباەۆتار اۋلەتىنىڭ قۇداسى قايرات بورانباەۆ "اقشا جىمقىرۋ" ايىبىمەن قاماۋعا الىندى.