1 قاڭتاردا شىعىس قازاقستان وبلىسىنداعى جالعىز گاز كەنىشى – سارىبۇلاقتان قىتايعا تابيعي گاز ەكسپورتتاۋ توقتاتىلدى. بۇل جونىندە ازاتتىققا جەرگىلىكتى بەلسەندىلەر حابارلادى، اقپاراتتى كەنىش ورنالاسقان زايسان اۋدانىنىڭ بيلىگى راستادى، -دەپ جازدى ورتالىق ازيا جاڭالىقتار قىزمەتى.

- اكىمدىك وسىعان دەيىن جىل سوڭىندا مەموراندۋم ۋاقىتى بىتەدى، قىتايعا گاز ساتۋ توقتاتىلادى دەپ ايتقان بولاتىن. سول بويىنشا كومپانياعا تالاپ قويىپ بارعانىمىزدا ولار كەلىسىم بەردى. قۇبىردى بەكىتۋ جۇمىسى بەس-التى ساعاتتاي ۋاقىتتى الدى. 31 جەلتوقساندا كەشكىلىك بارعاننان تۇنگى ساعات ءۇش شاماسىندا عانا ۇيگە قايتتىق، - دەدى اۋدان تۇرعىنى اسحات سماعۇلوۆ.

بۇعان دەيىن زايسان اۋدانى تۇرعىندارى ايماقتاعى بىرنەشە اۋىل گازسىز وتىرعاندا جەرگىلىكتى اكىمدىك كوگىلدىر وتىندى قىتايعا جىبەرىپ جاتىر دەپ بىرنەشە رەت نارازىلىق بىلدىرگەن ەدى.

اۋداندىق تۇرعىن ءۇي-كوممۋنالدىق شارۋاشىلىعى، جولاۋشى كولىگى جانە اۆتوموبيل جولدارى ءبولىمىنىڭ باسشىسى دانيار سەرىكوۆ كەنىشتى يگەرۋشى "تارباعاتاي مۇناي" كومپانياسى مەن ەنەرگەتيكا مينيسترلىگى اراسىنداعى كەلىسىمشارت 31 جەلتوقساندا اياقتالعانىن ايتتى. ياعني، بۇل كەلىسىمنىڭ اياقتالعانى قىتايعا گاز تاسىمالداۋ توقتاعانىن بىلدىرەدى.

- كومپانيا 2022 جىلى [قىتايعا] 75 ميلليون تەكشە مەتر گازدى ەكسپورتتاۋى ءتيىس بولعان، الايدا بۇل شاماعا جەتىپ ۇلگەرگەن جوق. سوندا دا بەلگىلەنگەن مەرزىمى كەلگەندىكتەن كەلىسىمدى توقتاتتى، - دەدى سەرىكوۆ.

ال "تارباعاتاي مۇناي" كومپانياسىنىڭ ينجەنەرى سەرىك جولىمبەتوۆ "بيىل قىتايعا 67 ميلليون تەكشە مەتر گاز ايدالدى" دەيدى.

اكىمدىك پەن كومپانيا وكىلدەرى "جەتپەي قالعان كولەمدى ەكسپورتتاۋ ءۇشىن قۇبىر قايتا اشىلۋى مۇمكىن بە؟" دەگەن سۇراققا "ناقتى ايتا المايمىز، ءبىزدىڭ قۇزىرەتىمىزدە ەمەس" دەپ جاۋاپ بەردى.

ازاتتىق وسى ماسەلە جونىندە ەنەرگەتيكا مينيسترلىگىنىڭ ءباسپاسوز قىزمەتىنە ساۋال جولداپ قويدى.

جەرگىلىكتى بيلىك بۇدان بۇرىن دا قىتايعا گاز ەكسپورتى توقتاتىلدى دەپ مالىمدەگەن. الايدا "تارباعاتاي مۇناي" كومپانياسى جازعى ۋاقىتتا شىعىندى اقتاي المايتىنىن العا تارتىپ، جىل اياعىنا دەيىن 75 ميلليون تەكشە مەتر تابيعي گازدى ەكسپورتتاۋعا رۇقسات العان.

زايسان اۋدانىنان قىتايعا گاز جىبەرۋ 2013 جىلى ەكى ەلدىڭ ۇكىمەتارالىق كەلىسىمەن ساي باستالدى. 2020 جىلعا دەيىن كەنىشتەگى قوردىڭ نەبارى ەكى پايىزى ىشكى نارىقتا پايدالانىلعان. باستاپقىدا سارىبۇلاق كەنىشىندە وندىرەتىن گاز كولەمى 4 ملرد تەكشە مەتر بولعان، 2022 جىلدىڭ باسىندا اۋدان اكىمدىگى سونىڭ 3 ملرد 200 ميلليون تەكشە مەتردەن استامى قىتايعا جىبەرىلگەنىن مالىمدەدى.

ەكى ەلدىڭ ۇكىمەتارالىق كەلىسىمىنە سايكەس، سارىبۇلاق كەنىشىندەگى گازدىڭ 50 پايىزى قازاقستاننىڭ ىشكى نارىعىنا باعىتتالۋعا ءتيىس ەدى. الايدا شارت تالابى ساقتالعان جوق. مۇنى شىعىس قازاقستان وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى "ىشكى ينفراقۇرىلىم دامىماۋى سالدارىنان بولدى" دەپ تۇسىندىرەدى.

2022 جىلى مامىردا اۋدان تۇرعىندارى بارلىق گاز قىتايعا ساتىلعانىنا نارازىلىق ءبىلدىردى. تۇرعىندار زايسان اۋدانىندا سەگىز اۋىل مەن بىرنەشە الەۋمەتتىك نىسان گازعا قوسىلماعانىن نارازى.

شقو اكىمى دانيال احمەتوۆ كەنىشتە قالعان گاز قورى زايسان اۋدانىنا 11-12 جىلعا جەتەدى دەپ مالىمدەگەن.