تالدىقورعاندا قاڭتار قىرعىنى كەزىندە ۇستالعانداردى ازاپتادى دەپ ايىپلعان 5 پوليتسەيدى تىڭدايتىن كەزدە سوتتان جۋرناليستەردى شىعارىپ جىبەردى.

23 جەلتوقساندا جەتىسۋ وبلىسىنىڭ مامانداندىرىلعان اۋدانارالىق سوت زالىندا ءوتىپ جاتقان ازاپتاۋ ءىسى بويىنشا 23-ءشى رەتكى ءوتىپ جاتقان سوت وتىرسىندا سۋديا بەكمۇرات دۇيسەنبەكوۆ «قاڭتار قىرعىنى» كەزىندە قامالعاندارعا ۇتىك باستى دەپ ايىپتالعان ايدىن كەنجەباەۆتىڭ ادۆوكاتى رۋسلان ەسەيبەكوۆتىڭ  بەينە جانە اۋديو جازبا تۇسىرۋگە قارسىلىعىن قاناعاتتاندىردى.

"قۇرمەتتى سوت! ءبىز سوتتالۋشىلاردى سۇراماس بۇرىن، بەينە-اۋديو جازبا جازۋعا قارسىمىز. سەبەبى بۇنىڭ بارلىعى ينتەرنەتتە ءجۇر. مەن بۇنى الدىندا دا ايتقانمىن. سوندىقتان بۇنىڭ بارلىعىن ءوشىرىپ تاستاپ، زالدان شىعارىپ جىبەرسە دە بولادى", -دەدى ادۆوكا ەسەيبەكوۆ.

ەسەيبەكوۆتىڭ ءوتىنىشىن كۇدىكتىلەر بوقانوۆ الماس، جۇماشوۆ ەرمەك، نۇرتازا جانباقىت، توقتاش ساپارمۇرات جانە ولاردىڭ قورعاۋشىلارى جامبىلباەۆ ەسيمحان، قارىمساقوۆ قانات، سارقىتوۆ جانات، تۇرمانبەتوۆ قوسانالى قولدادى. پروكۋرور قىدىربەك ەرلان سۋديانىڭ ءوز قاراۋىندا قالدىرۋىن سۇرادى.

سوتقا قاتىسقان جابىرلەنۋشى تاراپتىڭ قورعاۋشىسى اسەم ءتۇسىپوۆانىڭ پروتسەستەن كەيىنگى بىزگە ايتۋىنشا، سۋديا دۇيسەنبەكوۆ كۇدىكتى بوقانوۆ الماس پەن نۇرتازا جانباقىتتان جاۋاپ الىنعان سوڭ دا،  جۇمىس ۋاقىتىنىڭ اياقتالۋىنا از قالعانىنا قاراماستان، ءۇشىنشى كۇدىكتىنى تىڭداماق بولعان. الايدا ءتۇسىپوۆانىڭ قارسىلىعىمەن تىڭداۋدى 26 جەلتوقسان تاڭعى ساعات 10:00-گە قالدىرعان.