ۋكراينا پرەزيدەنتى ۆلاديمير زەلەنسكي رەسەي ارمياسىنىڭ حەرسون وبلىسىنداعى كاحوۆ سۋ ەلەكتر ستانتسياسىن مينالاپ تاستاعانى جونىندە اقپارات تۇسكەنىن ايتتى، -دەپ جازدى ورتالىق ازيا جاڭالىقتار قىزمەتى.

بەيسەنبى كۇنى بريۋسسەلدە ەۋروكەڭەس وتىرىسىنا ونلاين قاتىسقان زەلەنسكي وسىلاي دەپ مالىمدەدى.

"بىزدە رەسەيلىك تەرروريستەردىڭ سۋ قويماسى مەن كاحوۆ سۋ ەلەكتر ستانتسياسىنىڭ اگرەگاتتارىن مينالاپ تاستاعانى جونىندە اقپارات بار. بۇل ەلدەگى ءىرى ەنەرگيا نىساندارىنىڭ ءبىرى. سۋ قويماسىندا 18 ملن تەكشە مەتر سۋ بار. ەگەر رەسەيلىك تەرروريستەر سۋ قويماسىن جارسا، 80-نەن استام ەلدى مەكەندى سۋ باسۋى مۇمكىن" دەدى زەلەنسكي. ونىڭ سوزىنەن "ينتەرفاكس-ۋكراينا" اگەنتتىگى ءۇزىندى كەلتىرەدى.

ۋكراينا پرەزيدەنتىنىڭ ايتۋىنشا، جارىلىس بولعان جاعدايدا ەلدىڭ وڭتۇستىگىندەگى سۋمەن قامتاماسىز ەتۋ جۇيەسىنە نۇقسان كەلەدى. بۇعان قوسا، ەۋروپاداعى ەڭ ءىرى زاپوروجە اتوم ەلەكتر ستانتسياسى رەاكتورلارىن سۋىتاتىن سۋ قالماي قالادى. وعان سۋ كاحوۆ سۋ قويماسىنان الىنادى.

زەلەنسكي كاحوۆ سۋ ەلەكتر ستانتسياسىنا حالىقارالىق ميسسيانى جىبەرىپ، ول جاققا ۋكراين قىزمەتكەرلەرىن قايتارۋ قاجەتتىگىن اتاپ ءوتتى.

كاحوۆ سۋ ەلەكتر ستانتسياسىنداعى بوگەت – رەسەي باقىلاۋىندا قالعان دنەپردەگى وتكەلدەردىڭ ءبىرى. امەريكالىق سوعىستى زەرتتەۋ ينستيتۋتى (ISW) جۋىردا جاريالاعان تالداۋىندا رەسەي اسكەرى حەرسوننان شەگىنگەن كەزدە قالا مەن ماڭىنداعى ەلدى مەكەندەردى سۋ استىندا قالدىرۋ ءۇشىن سۋ قويماسىن جارىپ كەتۋى مۇمكىن دەپ مالىمدەگەن.