فوتو: اشىق دەرەككوزدەن

ەلدىڭ ەرتەڭگى بولاشاعى سانالاتىن جاستاردىڭ حال-احۋالى تۋلى بۇگىنگى قوعام كوپ دۇنيەنى ەسكەرمەيتىنى جەكەلەگەن تۇلعالاردى اشىندىرادى. وسىعان ايعاق بولاتىن انىق مىسالدى بۇگىن جاڭا قالا قوناەۆتان تالدىقورعانعا بارا جاتىپ كۋا بولدىق. ارينە كوپكە توپىراق شاشۋدان اۋلاقپىز. دەگەنمەن جاستاردىڭ كوبىنىڭ اگرەسسيۆتىك مىنەز-قۇلىقتارىن كورىپ قوعام وسىعان بارىنشا دەن قويۋى كەرەك دەگەن ويعا كەلدىك.

قوناەۆتاعى جۇمىسىمىز اياقتالعان سوڭ تالدىقورعانعا قايتۋ ءۇشىن اۆتو بەكەتتىڭ ماڭىندا تۇرعان تاكسيگە قىزمەتتەسىمىز ەكەۋمىز مىندىك. كولىك ورنىنان قوزعالا بەرە شاماسى 16-17 جاستار شاماسىنداعى ءجاسوسپىرىم بالا ارقاسىندا ۇلكەن رۋزاگى بار تاكسي توستى. جۇرگىۋشى توقتاپ كولىكتىڭ تەرەزەسىن ءتۇسىردى.

- تالدىقورعان، -دەدى بالا.

- ءيا، وتىرا عوي، سۋمكاڭدى جۇك سالعىشقا سالا عوي - دەدى جۇرگىزۋشى.

-جوق! قولىما ۇستاپ وتىرام. - بالانىڭ داۋسى قاتتىراق شىقتى. جۇرگىزۋشى كوزىن باعجاڭ ەتكىزدى دە باسىن شايقاپ بارىپ جول اقىسىمەن كەلىسىپ وتىرعىزىپ الدى.

ەندى الماتى-وسكەمەن تراسساسىنا شىعا بەرە قارت ايەل كىسى جول توستى. تاكسي وعاندا توقتادى. تالدىقورعانعا باراتىن ايتتى. الدىڭعى ورىندىقتا وتىرعان قىزمتتەسىم كولىكتەن ءتۇسىپ: -اپاي الدىنا وتىرىپ الىڭىز، ارتتان قينالىپ قالارسىز، - دەپ ەدى، الگى كىسى -جوق راحمەت، كولىكتىڭ الدىنا وتىرسام جۇرەگىم كوتەرىلىپ كەتەدى، ارتىنا وتىرايىن دەگەنى سول ەدى مەنىڭ جانىمدا وتىرعان بالا جانتالاسىپ كولىكتەن شىقتى دا الدىڭعى ورىندىققا بارىپ وتىرىپ الدى. جاس بالا عوي دەپ ىشىمىزدەن رەنجىسەكتە ەشكىمىزمىز ۇندەمەدىك. ورتاعا قىزمەتتەسىم وتىردى. ەسىك جاققا اپاي وتىر. انا مىنانى ايتىپ شۇيىركەلەسىپ وتىرعامىز. كولىك ارقارلى اسۋىنا تاياعاندا الداعى وتىرعان بالا ورىندىقتى بارىنشا شالقايتىپ الدى. ارتتا وتىرعان اپايدىڭ تىزەسىن باسىپ قالدى.

-بالام ورىندىعىڭدى كىشكەنە كوتەرە عوي. اياعىم قىسىلىپ قالدى... -اپاي جايمەن ءتىل قاتتى. بالا قولاعىنا كيگەن قۇلاققاپتىڭ اسەرىنە بولسا كەرەك ەستىمەدى. سوسىن جۇرگىزىۋشى بالانىڭ جەڭىنەن تارتىپ: -ارتتاعى ادام قىسىلىپ قالدى، ورىندىعىڭدى كوتەر، -دەپ ەدى اناۋ باسىن كوتەرمەستەن -كەتشى-ەي! تەگىن الىپ بارا جاتانداي، اقشاقدى تولەيمىن سولاي كەلىستىك! بۇل ورىندى تالدىقورعانعا دەيىن مەن ارەنداۆات ەتتىم. جەتكەنشە قالاي وتىرام ءوزىم بىلەم... دەپ ارى قاراي بوقاۋىز ءسوز ايتا باستادى.

-ەسىڭ دۇرىس پا؟!- جۇرگىزۋشى تۇتەپ كەتتى. كولىكتى باياۋلاتىپ بارىپ جول شەتىنە توقتادى دا - ادامشا ايتقان سوڭ ءسوز تىڭدا بالا، سەن مەنىڭ نەمەرەمدەيسىڭ! ارتىڭدا اجەڭدەي ادام وتىر. ونىڭ اياعىن باسا جانشىپ ورىندىقتى شالقالاتۋعا سەنىڭ اقىڭ جوق. اۋەلى بۇل ورىندى مىنا تاتەڭ انا اپايعا بەرگەن. وعان كەلىپ وتىرىپ الدىڭ. ۇيالمايسىڭ با؟ قالاماساڭ ءتۇسىپ قال دا باسقا كولىككە وتىر... دەپ ەدى اناۋ بالا بىرەۋ كۇش قولدانعانداي باجىلداي جونەلدى.

مەنىڭ قاقىم، قۇقىم، سەن كامەلەت جاسىنا تولماعان بالاعا قىسىم كورسەتىپ وتىرسىڭ "قازاقستان رەسپۋبليكاسىنىڭ بالانىڭ قۇقىقتارى تۋرالى زاڭنىڭ 4 بابىنىڭ 1 تارماعىنا ساي مەن تەڭ قۇقىلىمىن. بۇل ورىندا قالاي وتىرعىم كەلەدى سولاي وتىرامىن" باسىمدى قاتىرما دەدى.

كۇيىپ كەتكەن جۇرگىزۋشى -مىناۋ ءبىر ءتامپىش قوي-ەي! دەپ ەدى اناۋ بالا تىپتەن ورشەلەنىپ كەتتى. نە كەرەك تالدىقورعان قالاسىنا جەتكەنشە قۇلاعىمىزدى سارسىتىپ لەكتسيا وقىپ باردى. شالقالاتقان ورىندىعىن سول قالپى كوتىرمەدى.

بۇل ءبىزدىڭ كوزىمىزبەن كورگەن ءبىر عانا جاعداي. وتكەندە عانا الەۋمەتتىك جەلىدەن الماتى قالاسىنداعى كوشە اۆتوبۋىنداعى جاس بالانىڭ ۇلكەن كەيۋاناعا قالاي داۋىس كوتەرگەنىن كورىپ قوعام بولىپ تۇرشىككەن ەدى. دەمەك بۇل كەزدەيسوق ەمەس. بۇگىنگى جاستاردىڭ كوبىنىڭ بويىندا بار جامان ادەت. قوعام بولىپ بۇنى ەمدەۋ كەرەك. تاربيە جۇرگىزىپ بالانىڭ قۇقىقتارىنمەن بىرگە ادامگەرشىلىك تاربيەسىندە بەرۋگە مىندەتتى ەكەنىمىزدى ءار اتا-انا ەستە مىقتى ساقتاۋ كەرەك.

ەلدىڭ ەرتەڭگى بولاشاعى جاستاردىڭ تاربيەسىن جاستايىنان قاداعالاۋ قوعامنىڭ باستى مىندەتى ەكەنىن ەستەن شىعارمايىق.

تالدىقورعان قالاسى،

ءامينا ادايحان