الماتى اكىمدىگى ازاماتتىق بەلسەندىلەر مەن "دەموكراتيالىق كۇشتەر كواليتسياسىنا" كەزەكتەن تىس پرەزيدەنت سايلاۋىنان باس تارتۋ تالابىمەن ميتينگ وتكىزۋگە ەكىنشى رەت تە رۇقسات بەرمەدى. بۇل تۋرالى ورتالىق ازيا جاڭالىقار قىزمەتى جازدى.

وسىعان دەيىن اكىمدىك "ميتينگ بەلگىلەنگەن ورىن پەن ۋاقىتتا مادەني ءىس-شارا وتەدى" دەپ العاشقى وتىنىشتەرىن كەرى قايتارعان ەدى.

ميتينگ وتكىزۋ تۋرالى ەكىنشى ءوتىنىشتى «مۇقالماس» ۇيىمىنىڭ الماتى فيليالىنىڭ جەتەكشىسى قۇدايعاشۇكىر ابدۋللاەۆ اكىمدىككە 24 قىركۇيەكتە جونەلتكەن. بۇل رەتتە ميتينگ وتەتىن ورىن رەتىندە «سارىارقا» كينوتەاترىنىڭ ارتىنداعى الاڭ تاڭدالعان.

بۇل حابارلاماعا الماتى اكىمدىگىنىڭ قوعامدىق دامۋ باسقارماسى باسشىسىنىڭ ورىنباسارى ايدار ەسەنبەكوۆ «الاڭدا قۇرىلىس-مونتاجداۋ جۇمىستارى جوسپارلانعان» دەگەن سەبەپپەن ميتينگ وتكىزۋگە رۇقسات بەرمەگەن.

ەكى رەتتە دە اكىمدىكتىڭ باس تارتقانىن Facebook پاراقشاسىنا جاريا ەتكەن ساياساتكەر مۇحتار تايجان «ەسكەرتۋ ءتاسىلى قايدا، تاعى دا الداۋ ما؟» دەپ جازدى.

بۇعان دەيىن بەلسەندىلەر 17 قىركۇيەكتە ساعات 12.00-15.00 ارالىعىندا شوقان ءۋاليحانوۆ اتىنداعى الاڭدا ميتينگ وتكىزەتىنىن ايتىپ، "قازاقستاننىڭ دەموكراتيالىق كۇشتەر كواليتسياسى" اتىنان اكىمدىككە ەسكەرتۋ حات تاپسىرعان ەدى. الايدا 14 قىركۇيەكتە اكىمدىك ەسكەرتۋدى كەرى قايتارىپ، الداعى سەنبىدە ول جەردە "قوعامدىق-مادەني شارا وتەتىنىن" ايتقان.

سايلاۋ باقىلاۋشىسى ارايلىم نازاروۆا «ميتينگتە كەزەكتەن تىس سايلاۋدى وتكىزبەۋ، سايلاۋ تۋرالى زاڭعا وزگەرىس ەنگىزۋ، ساياسي تۇتقىنداردى بوساتۋ، پرەزيدەنتتى ءبىر مەرزىمگە 7 جىلعا سايلاۋ ۇسىنىسىن قابىلداماۋ سىندى تالاپتار كوتەرىلۋگە ءتيىس ەدى» دەيدى.

اكىمدىكتىڭ شەشىمىمەن كەلىسپەگەن زاڭگەر ەرلان قاليەۆ اكىمشىلىك سوتقا ارىز بەرگەن.

– «بەيبىت جينالىستاردى وتكىزۋ تۋرالى زاڭنىڭ» 11-بابىندا جەرگىلىكتى اتقارۋشى ورگان ۇيىمداستىرۋشىلارعا جيىننىڭ ورنى مەن ۋاقىتىن وزگەرتۋ تۋرالى ۇسىنىس بەرۋى كەرەك. ماسەلەن، ءبىز كورسەتكەن ۋاقىتتا كونتسەرت وتسە، وعان دەيىن نە كەيىن وتكىزۋدى ۇسىنۋى قاجەت، – دەيدى زاڭگەر.

اكىمشىلىك سوت ءىستى جەدەل قاراماعان. تاراپتاردى ءىس قوسىپ، العاشقى وتىرىستى 27 قىركۇيەكتە وتكىزبەك.

قازاقستاندا 2020 جىلى بەيبىت جيىنداردى وتكىزۋ ءتارتىبى تۋرالى جاڭا زاڭ قابىلدانعان. بيلىك بۇل زاڭ جوباسىن «بۇرىنعى ءتارتىپ ايتارلىقتاي وزگەردى، ەندى ەسكەرتۋ ارقىلى بەيبىت جيىن وتكىزۋگە بولادى» دەگەن سيپاتتا ناسيحاتتادى. پرەزيدەنت قاسىم-جومارت توقاەۆ تا ميتينگكە ازاماتتار جەرگىلىكتى اتقارۋشى ورگاندى ەسكەرتۋ ارقىلى شىعا بەرەدى دەيدى. زاڭدا «رۇقسات ەتپەۋ» ءسوزىنىڭ ورنىن «باس تارتۋ» دەگەن ءسوز الماستىرعان. قۇقىق قورعاۋشىلار زاڭ وزگەرسە دە، بەيبىت جيىنداردى باقىلاۋ مەن رۇقسات ەتۋ فورماسى ەسكى تارتىپتە قالعانىن ايتىپ كەلەدى.