قوستانايداعى ءورت. ۇلت ۇستازىنىڭ تويى كەيىنگە شەگەرىلدى

قوستاناي وبلىسىنىڭ اۋليەكول اۋدانىنداعى ورمان شارۋاشىلىقتارىنىڭ بىرىندە 2-قىركۇيەك كۇنى الاپات ءورت بولدى. قوستاناي وبلىسىنداعى ءورتتى اۋىزدىقتاۋ ءۇشىن وقيعا ورنىندا جەدەل شتاب قۇرىلىپ، ونىڭ قۇرامىنا قر توتەنشە جاعدايلار ءمينيسترى يۋري يلين مەن وزگە دە بىرقاتار مەملەكەتتىك ورگانداردىڭ باسشىلارى كىردى. ءورتتى سوندىرۋگە قوستاناي، اقمولا، قاراعاندى جانە سولتۇستىك قازاقستان وبلىستارىنىڭ جەكە قۇرامى جۇمىلدىرىلدى. امانقاراعاي اۋىلىنداعى تۇرعىن ۇيلەردەن 1000 ادام ەۆاكۋاتسيالاندى. ەۆاكۋاتسيالانعان ادامدار اۋليەكول ورتا مەكتەبى مەن مەكتەپ-ينتەرناتىنا ورنالاستىرىلعانى تۋرالى مەملەكەتتىك باق جارىسا جازىپ جاتىر.
ورمان شارۋاشىلىعىنا قاراستى 106 مىڭ گەكتار ورمان قورىنىڭ 43 مىڭ گەكتارىن ءورت شارپىدى. بىرەشە ەلدى مەكەندە 108 عيماراتتى ءورت شالىپ، 98 عيمارات تولىق جانىپ كەتكەن. توتەنشە جاعداي مينيسترلىگىنىڭ حابارلاۋىنشا، ءورتتى سوندىرۋگە 111 تەحنيكا، 5 اۋە كەمەسى، 5 ءورت پويىزى، جەكە قۇرامنىڭ 793 7ادامى جۇمىلدىرىلعان.ورتتەن زارداپ شەككەندەرگە كومەك كورسەتۋ ءۇشىن جەدەل جەلى قۇرىلىپ، پسيحولوگ مامانداردىڭ جۇمىسى ۇيىمداستىرىلدى. قوستاناي وبلىسىندا سونداي-اق مەملەكەت باسشىسى قاسىم-جومارت توقاەۆ قاتىسادى دەپ جوسپارلانعان احمەت بايتۇرسىنۇلىنىڭ 150 جىلدىعىمەن بايلانىستى ءىس-شارالار دا كەيىنگە قالدىرىلدى.
مەملەكەت باسشىسى مۇندا ەندى باسقا ماقساتپەن، ياعني ورتپەن كۇرەس باعىتىندا اتقارىلىپ جاتقان جۇمىستارمەن تانىسۋ ءۇشىن كەلدى. وسى وڭىردەگى حالىقپەن، ەرىكتىلەرمەن كەزدەسكەن ەل پرەزيدەنتى ق.توقاەۆ “زارداپ شەككەن ازاماتتاردىڭ ءبارى ەكى-ءۇش ايدىڭ ىشىندە باسپانالى بولادى دەپ ۋادەمدى بەردىم. وعان كۇمانىم جوق. ول – ءبىر. ەكىنشىدەن، احمەت بايتۇرسىنۇلىنىڭ مەرەيتويىنا قاتىستى. ەڭ الدىمەن، وسى ماسەلەنى شەشەيىك. سودان كەيىن اماندىق بولسا، وسى ءبىر قاسيەتتى جەرگە كەلىپ، احمەت بايتۇرسىنۇلى بابامىزدىڭ رۋحىنا تاعزىم ەتىپ، تويدى وتكىزەمىز»،— دەدى ول. بىرنەشە كۇننەن بەرى ەلدى ەلەڭدەتىپ، الەۋمەتتىك جەلىدە ءتۇرلى پىكىرلەر تۋعىزعان الاپات ءورت اۋىزدىقتالدى. الايدا، كەلتىرگەن شىعىن مەن زارداپ شاش ەتەكتەن. بالاۋسا تالدار كوكتەپ، ورمان بولعانشا ءبىراز جىل كەتەرى انىق. ءورتتىڭ شىعۋ سەبەبىن دە بىلايعى جۇرت سان الۋان توپشىلايدى. الەۋمەتتىك جەلىلەردەگى ۆيدەولار مەن پىكىرلەر ساراپتالار. بىرەۋلەر پرەزيدەنتتىك سايلاۋدىڭ بولاتىنىمەن بايلانىستىرسا، بىرەۋلەر رەسەيمەن، بىرەۋلەر اعاششىلارمەن بايلانىستىرادى. باسىم كوپشىلىگى ادام قولىمەن جاسالعان دەپ قارايدى. ارينە مۇنىڭ ءبارى جورامال. وسىلاي بولا تۇرسا دا، بۇكىل ەل بىرلىك تانىتىپ، ءار وبلىستان ەرىكتىلەر مەن گۋمانيتارلىق كومەكتەر اعىلىپ كەلىپ جاتىر. پرەزيدەنتتىڭ بۇل ارەكەتى سايلاۋ الدى جارناما ەمەس، جالاۋلاعان قۇرعاق ۋادە ەمەس، شىنايى جاناشىرلىق بولسا ەكەن. ءتىلسىز جاۋدى ءوز ۇپايىنا پايدالانعىسى كەلەتىندەر ءۇيسىز، كۇيسىز قالعان حالىقتىڭ جاعدايىمەن ساناسار كۇن جەتتى. قارا سۋىققا ۇرىندىرماي قارا حالىقتى باسپانالى ەتەر دەگەن ويدامىز.
توتەنشە جاعدايلار ءمينيسترى يۋري يلين ءورتتىڭ سەبەبىن ىشكى ىستەر مينيسترلىگىنىڭ تەكسەرىپ جاتقانىن ايتتى. جۋرناليستەردىڭ ءورت قاساقانا جاسالۋى مۇمكىن بە دەگەن سۇراعىنا مينستر ادام فاكتورىن جوققا شىعارمايتىنىن، ءار ءتۇرلى ۆەرسيالاردى قاراستىراتىنىن، تەكسەرۋ قىلمىستىق كودەكستىڭ بىردەن ءۇش بابى بويىنشا جۇرگىزىلەتىنىن ايتقان. سونداي-اق، ءورتتىڭ شىعۋ سەبەبىن تەكسەرۋگە باس پروكۋراتۋرانىڭ كىرىسكەنى وسىعان دەيىن دە بەلگىلى بولعان بولاتىن.

ن.بايتۇرسىن