قاڭتاردا قازا تاپقاندار جايلى تولىق اقپارات جاريالاۋدى تالاپ ەتتى

الايدا تىزىمدە 238 مارقۇمنىڭ فاميلياسى مەن ەسىمىنىڭ ينيتسيالى عانا جازىلعان. مارقۇمداردىڭ قالاي، قانداي جاعدايدا قازا تاپقانى جايلى اقپارات جوق.

"بەيبىت ازاماتتاردى جاپپاي اتىپ، ازاپتاعانى ءۇشىن جەكە سانكتسيادان جالتارۋ ماقساتىندا جانە ونى تەكسەرمەسىن دەپ بيلىك تولىق ءتىزىمدى جاريالاماي وتىر" دەپ جازدى Qaharman توبى 17 تامىز كۇنگى حابارلاماسىندا.

توپ وكىلدەرى حابارلامادا قازا بولعانداردىڭ تولىق اتى-ءجونى مەن تۋعان جىلى، تۋعان جەرى، قانداي جاعدايدا اجال قۇشقانى جايلى مالىمەت جاريالاۋدى تالاپ ەتكەن. بۇعان قوسا، ولار قازا بولعان ادامنىڭ قايسىسى كۇشتىك قۇرىلىم وكىلى، قايسىسى بەيبىت تۇرعىن نەمەسە بەيبىت تۇردە نارازىلىققا قاتىسقانىن اجىراتىپ كورسەتۋ قاجەتتىگىن ايتتى.

"ار.رۋح.حاق" قوعامدىق قورىنىڭ پرەزيدەنتى، قۇقىق قورعاۋشى باقىتجان تورەعوجينا دا باس پروكۋراتۋرا ءتىزىمى جاريالانعاننان كەيىن ءتىزىمنىڭ تولىق ەمەستىگىن العا تارتتى.

"الماتىداعى تارتىپسىزدىك كەزىندە كەيىنگى بىرنەشە جىلدا قازاقستاندا تۇرعان يزرايل ازاماتى 22 جاستاعى لەۆان كوگەاشۆيلي اتىپ ءولتىرىلدى. ول نەگە قازا بولعان 238 ادامنىڭ اراسىندا جوق؟ ول تىزىمدە 239-ى بولىپ تۇرۋى ءتيىس پە؟ ءبىز ءوز ءتىزىمىمىزدى تەكسەرىپ، باس پروكۋراتۋرانىكىمەن سالىستىردىق. جۋىردا قۇقىق قورعاۋشىلار جيناعان ءتىزىمدى جاريالايمىز: اتى-ءجونى، قالا، جاسى، قازا بولعان كۇنى" دەپ جازدى تورەعوجينا Facebook پاراقشاسىندا.

باس پروكۋراتۋرا ازىرگە قۇقىق قورعاۋشىلاردىڭ تالاپتارىنا رەاكتسيا بىلدىرمەدى.

قۇقىق قورعاۋشى باقىتجان تورەعوجينا جەتەكشىلىك ەتەتىن Qantar2022 ەرىكتىلەر توبى بۇعان دەيىن قازا بولعانداردىڭ ءتىزىمىن ءوز بەتىنشە انىقتاپ، جاريالاعان ەدى. وندا كەمىندە 239 ادامنىڭ اتى-ءجونى كورسەتىلگەن.

بۇعان دەيىن ازاتتىق تا قازا بولعانداردى ءوز بەتىنشە انىقتاپ، ارنايى پاراقشا ارناعان. وندا 202 ادامنىڭ ءتىزىمى بار.

قازا بولعاندار تۋرالى بار اقپاراتتى جاريالاۋ قۇقىق قورعاۋشىلار، وپپوزيتسيا توپتارى مەن ەۋرودەپۋتاتتاردىڭ قازاقستان بيلىگىنە قويعان باستى تالاپتارىنىڭ ءبىرى بولعان. ەۋروپارلامەنتتىڭ قاڭتار وقيعاسى بويىنشا رەزوليۋتسياسىندا "2022 جىلى قاڭتارداعى نارازىلىق كەزىندەگى ءىرى زاڭبۇزۋشىلىقتارعا جاۋاپتى" لاۋازىمدى تۇلعالارعا سانكتسيا سالۋ تۋرالى ۇندەۋ بار.

قاڭتاردىڭ باسىندا ەلدە سۇيىلتىلعان گازدىڭ قىمباتتاۋىنا قارسى ميتينگ ءوتىپ، نارازىلىقتىڭ اياعى قانتوگىسكە ۇلاسقان. بيلىك شەتەلدە دايىندىقتان وتكەن "تەرروريستەر شابۋىلى" تۋرالى ايتتى، بىراق وعان دالەل-ايعاق كەلتىرگەن جوق. پرەزيدەنت قاسىم-جومارت توقاەۆ كۇشتىك قۇرىلىمعا ەسكەرتۋسىز وق اتۋعا بۇيرىق بەرگەنىن مالىمدەدى. ول سونىمەن بىرگە ەلدە بيلىكتى كۇشپەن باسىپ الۋ تالپىنىسى بولعانىن ايتتى، الايدا ونى كىم ۇيىمداستىرعانىن ناقتىلامادى.

رەسمي دەرەك بويىنشا، قاڭتار وقيعاسىندا 232 ادام قازا بولدى. بۇعان قوسا، وقيعا كەزىندە ۇستالعان تاعى التى ادامنىڭ تەرگەۋ يزولياتورىندا كوز جۇمعانى بەلگىلى بولدى. بيلىك قوعام تالابىنا قاراماستان وپات بولعانداردىڭ ەسىمىن جاريالاماي كەلگەن ەدى.

قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم", "جاپپاي تارتىپسىزدىك ۇيىمداستىرۋ", "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، بىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.

حالىقارالىق جانە جەرگىلىكتى قۇقىق قورعاۋشىلار قازاقستان بيلىگىن قاڭتار قىرعىنىن تاۋەلسىز جانە جان-جاقتى زەرتتەۋگە شاقىرعان. قازاقستاننىڭ بيلىگى ودان باس تارتقان.