قازاقستان پارلامەنتى ءولىم جازاسىن جويۋ تۋرالى زاڭ جوباسىن ماقۇلدادى

زاڭ جوباسى قازاقستان زاڭناماسىنان ء"ولىم جازاسى" دەگەن ۇعىمدى تۇتاس الىپ تاستاۋعا مۇمكىندىك بەرەدى، دەدى باس پروكۋروردىڭ ورىنباسارى اسەت شىڭداليەۆ.

ءبىرىنشى پرەزيدەنت نۇرسۇلتان نازارباەۆتىڭ ومىرىنە قاستاندىق جاساۋ بابىنان دا ءولىم جازاسى تىركەسى الىنادى.

باستاپقىدا قىلمىستىق كودەكستىڭ 13 بابىنان ءولىم جازاسىن الىپ، تورتەۋىندە قالدىرۋ جوسپارلانعان. اتاپ ايتقاندا، جوبا اۆتورلارى ءولىم جازاسىن سوعىس كەزىندە جاسالعان ەرەكشە اۋىر قىلمىستارعا قولدانۋدى ۇسىنعان.

قازاقستان پرەزيدەنتى قاسىم-جومارت توقاەۆ وتكەن ايدا بريۋسسەلگە ساپارى قارساڭىندا ء"ولىم جازاسىن تۇتاس الىپ تاستاۋ قاجەتتىگىن" مالىمدەگەن. 8 جەلتوقساندا ءماجىلىس پرەزيدەنت ۇسىنعان نۇسقانى ماقۇلداعان.

بىلتىر قىركۇيەك ايىندا قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتى حاتتاماسىنا قوسىلۋىجايلى تۇسىنىكتەمە بەرگەن پرەزيدەنت توقاەۆ "كونستيتۋتسياعا وزگەرىس ەنگىزۋ قاجەت ەمەس" دەپ ايتقان. قازاقستان كونستيتۋتسياسىندا ءولىم جازاسى اسكەري قىلمىستارعا قوسا تەررورلىق قىلمىس جاساعاندارعا دا قولدانىلاتىنى كورسەتىلگەن. ال حالىقارالىق حاتتامادا ونداي ەسكەرتپە جاساۋعا بولمايدى دەگەن تالاپ بار.

زاڭ جوباسى ەندى پرەزيدەنتكە قول قويۋعا جىبەرىلەدى.

قازاقستاندا 2004 جىلدان بەرى ءولىم جازاسىن ورىنداۋعا مەرزىمسىز موراتوري جاريالانعان. سودان بەرى ەلدە كەمىندە ەكى رەت ءولىم جازاسى قولدانىلدى.

سوڭعى رەت ءولىم جازاسى 2016 جىلى شىعارىلدى. وسىدان شامامەن ءتورت جىل بۇرىن الماتىدا پوليتسيا ءبولىمى مەن ۇقك دەپارتامەنتىنە قارۋلى شابۋىل جاسالىپ، سالدارىنان بىرنەشە ادام قازا تاپقان ەدى. شابۋىلعا كۇدىكتى رەتىندە 1990 جىلى تۋعان، بۇعان دەيىن ەكى رەت سوتتالعان دەپ سيپاتتالعان رۋسلان كۇلەكباەۆ ۇستالعان. كەيىنىرەك الماتى سوتى ونى "تەراكت جاسادى" دەپ تانىپ، ءولىم جازاسىنا كەسكەن.

قۇقىق قورعاۋشىلار بيلىكتى بىرنەشە رەت ءولىم جازاسىن الىپ تاستاۋعا شاقىرعان.