قازاقستان پرەزيدەنتى قاسىم-جومارت توقاەۆ ماڭعىستاۋ وبلىسىنىڭ اكىمى سەرىكباي تۇرىموۆتى قىزمەتىنەن بوساتىپ، ونىڭ ورنىنا ەنەرگەتيكا ءمينيسترى نۇرلان نوعاەۆتى تاعايىندادى. توقاەۆتىڭ جارلىعى كەشە، 7 قىركۇيەك كەشكە قاراي اقوردانىڭ رەسمي سايتىندا جاريالاندى. 

اقوردا جاريالاعان پرەزيدەنت جارلىعىندا تۇرىموۆتىڭ قىزمەتىنەن نە سەبەپتى بوساتىلعانى ايتىلماعان.

57 جاستاعى تۇرىموۆ 2019 جىلدىڭ ماۋسىمىنان بەرى ماڭعىستاۋ وبلىسىنىڭ اكىمى بولدى. بيىل بۇل وبلىستا قۋاعشىلىق بولىپ، مال قىرىلعاندا قوعام بەلسەندىلەرى اكىمنىڭ ەشقانداي شارا قولدانباعانىن ايتىپ، وتستاۆكاسىن تالاپ ەتكەن.

54 جاستاعى نۇرلان نوعاەۆ بۇعان دەيىن باتىس قازاقستان جانە اتىراۋ وبلىستارىندا اكىم بولعان. ول 2019 جىلدىڭ جەلتوقسانىنان باستاپ ەنەرگەتيكا ءمينيسترى قىزمەتىن اتقاردى.

نوعاەۆتىڭ ورنىنا ەنەرگەتيكا مينيسترلىگىنە ءالى ەشكىم تاعايىندالعان جوق.

The Qazaq Times