قازاقستاندا 2022 جىلدىڭ 1 قاڭتارىنان باستاپ تومەنگى جالاقى كولەمى 60 مىڭ تەڭگەگە بولادى. بۇل تۋرالى بۇگىن، 1 قىركۇيەكتە پرەزيدەنت قاسىم-جومارت توقاەۆ حالىققا جولداۋىندا ايتتى.
"تومەنگى جالاقى كولەمى 2018 جىلدان بەرى وسپەدى. الەمدىك كوروناكريزيس حالىقتىڭ تابىسىنا سالماق ءتۇسىردى. سونىمەن قاتار قازاقستان تومەنگى جالاقى كولەمى بويىنشا تمد-نىڭ كوپتەگەن ەلىنەن قالىپ قويعان. سول سەبەپتى مەن 2022 جىلعى 1 قاڭتاردان باستاپ تومەنگى جالاقى كولەمىن 42500 تەڭگەدەن 60 مىڭ تەڭگەگە ءوسىرۋ تۋرالى شەشىم قابىلدادىم" دەدى توقاەۆ.
ول بۇل شەشىمنىڭ ءبىر ميلليوننان استام ادامعا اسەر ەتەتىنىن ايتتى. توقاەۆتىڭ سوزىنشە، قازىر ەلدە كولەڭكەلى جالاقى قورى جاريا جالاقى قورىنىڭ 30-40 پايىزىن قۇراپ وتىر، بۇل شارا وسى كورسەتكىشتى ازايتۋى ءتيىس.
"تومەنگى جالاقىنى كوتەرۋ ىشكى تۇتىنۋدى ارتتىرىپ، وڭ ەكونوميكالىق اسەر بەرەدى. ساراپشىلاردىڭ باعالاۋىنشا، جالپىۇلتتىق ىشكى ءونىمدى 1,5 پايىزعا ارتتىرادى" دەدى.
ەلدە 2019 جىلدان بەرى تومەنگى جالاقى 42 500 تەڭگە بولعان. تومەنگى جالاقى كورسەتكىشى جاردەماقى تاعايىنداۋ كەزىندە ەسەپكە الىنادى. ماسەلەن، بىلتىر كوروناۆيرۋس ىندەتى تاراي باستاعاندا قاتاڭ كارانتين شارالارى ەنگىزىلىپ، جۇمىسسىز قالعان ادامدارعا وسى ەڭ تومەنگى جالاقى كولەمى شاماسىندا ءبىر رەتتىك جاردەماقى بەرىلگەن.
بىراق وسى جولداۋىندا توقاەۆ تومەنگى جالاقى كولەمىن الەۋمەتتىك سالادا ەسەپتىك كورسەتكىش رەتىندە پايدالانۋدى دوعارۋ كەرەك دەدى. بىراق ونىڭ قالاي جۇزەگە اساتىنىن ايتپادى.
ەلدە جالاقى، جاردەماقى كولەمى وسكەن سايىن ازىق-تۇلىك پەن جانارماي باعاسى دا قىمباتتايدى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟