سىبايلاس جەمقورلىققا قارسى ءىس-قيمىل اگەنتتىگى "شىمكەنت مادەنيەت باسقارماسىنىڭ لاۋازىمدى وكىلدەرى پارا بەرمەكشى بولعانى ءۇشىن كۇدىككە ءىلىندى" دەگەن اقپاراتتى پروكۋراتۋرا بەكىتكەن سوڭ جاريالانعانىن مالىمدەدى.

– ءبىز ءباسپاسوز بايانىن پروكۋراتۋرا بەكىتكەن سوڭ جاريالادىق. بىزدە ءباسپاسوز بايانى بار. ونى پروكۋراتۋرا بەكىتكەن. ودان باسقا ەشتەڭە ايتا المايمىز، – دەدى The Qazaq Times تىلشىسىمەن سويلەسكەن سىبايلاس جەمقورلىققا قارسى ءىس-قيمىل اگەنتتىگىنىڭ وكىلى ەركەبۇلان شالتاي.

كەشە، 11 تامىزدا سىبايلاس جەمقورلىققا قارسى ءىس-قيمىل اگەنتتىگىنىڭ Telegram جەلىسىندەگى رەسمي ارناسى شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنىڭ شەنەۋنىكتەرى "80 ملن تەڭگە كولەمىندە پارا بەرمەك بولدى" دەگەن كۇدىكپەن ۇستالعانىن حابارلاعان. ارتىنشا، شىمكەنت قالاسىنىڭ مادەنيەت باسقارماسى اگەنتتىك اقپاراتىن جوققا شىعارىپ، Instagram-داعى پاراقشاسىندا "باسقارامانىڭ لاۋازىمدى تۇلعالارىنىڭ (باسشى، باسشىنىڭ ورىنباسارلارى) بارلىعى جۇمىس ورنىندا" ەكەنىن حابارلادى. حابارلامادا "ەڭبەك دەمالىسىندا جۇرگەن 3 ماماننان باسقا قىزمەتكەرلەر دە تۇگەل جۇمىس ورنىندا" ەكىنى دە ايتىلعان.

The Qazaq Times تىلشىسىمەن سويلەسكەن شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسى باسشىسىنىڭ ورىنباسارى ءمولدىر تۇرسىنبەكقىزىنىڭ ايتۋىنشا،  مادەنيەت باسقارماسىنا كەشەدەن بەرى قىزمەتكەرلەرىنىڭ ۇستالعانى جايلى ەشقانداي رەسمي مالىمەت كەلمەگەن.

– باسشىلىق قۇرام تۇگەل جۇمىستا. قىزمەتكەرلەر دە تۇگەل دەرلىك جۇمىس ورنىندا. قازىرگى تاڭدا ءۇش قىزمەتكەرىمىز ەڭبەك دەملىسىندا. كەشە ولاردىڭ بىرەۋىمەن بايلانىستىق، قالعان ەكەۋىنىڭ تەلەفونى ءوشىرۋلى بولدى. بۇگىن بۇل ماسەلەمەن كادر ءبولىمى اينالىسىپ جاتىر. قالعان ەكەۋىمەن بايلانىسقا شىعىپ، ماسەلە انىقتالعان سوڭ رەسمي حابارلاما تاراتامىز، – دەدى ول.

ءمولدىر تۇرسىنبەكقىزىنىڭ  ايتۋىنا قاراعاندا، شىمكەنت قالاسىنىڭ مادەنيەت، تىلدەردى دامىتۋ جانە ارحيۆتەر باسقارماسىنا قاتىستى قارالىپ جاتقان قىلمىستىق ءىس جوق. ال كەشە تاراعان سىبايلاس جەمقورلىققا قارسى ءىس-قيمىل اگەنتتىگىنىڭ حابارلاماسىندا "ۇستالعاندار مەملەكەت قارجىسىن جىمقىرۋ فاكتىسى بويىنشا قوزعالعان قىلىستى ءىستى جابۋ ءۇشىن 80 ملن تەڭگە پارا بەرۋگە ارەكەت جاسادى دەگەن كۇدىككە ءىلىندى" دەلىنگەن ەدى.

The Qazaq Times