الماتى وبلىسىندا قويىلعان مۇقاعالي ماقاتاەۆتىڭ 62 ميلليون تەڭگەلىك ەسكەرتكىشىنە بايلانىستى داۋ شىقتى.

«ماقاتاەۆقا ەمەس، مىرزاليەۆكە كوبىرىك ۇقسايدى»

رايىمبەك اۋدانىنىڭ ورتالىعى نارىنقول ەلدى مەكەنىندە قويىلعان ەسكەرتكىشتىڭ ءتۇر-سيپاتى مەن ورنالاسقان جەرىنە كوڭىلى تولمايتىن جۇرت ءمۇسىننىڭ دۇرىس جاسالماعانىن ايتادى. ەسكەرتكىش كەلبەتىنە بايلانىستى الەۋمەتتىك جەلىدە ماسەلە  كوتەرگەن جۋرناليست قانات ابىلقايىر «ءمۇسىن مۇقاعالي ماقاتاەۆقا ەمەس، قادىر مىرزاليەۆكە كوبىرەك ۇقسايدى جانە بويى تىم الاسا» دەپ ەسەپتەيدى. ونىڭ سوزىنشە، ەسكەرتكىشتە بەينەلەنگەن مۇقاعاليدىڭ تۇرىسىندا تۇرۋ مۇمكىن ەمەس.

«ەسكەرتكىشتە مۇقاعاليدىڭ بويى الاسا. ونىڭ بيىك، اسقاق كىسى بولعانىن بىلەمىز. شەبەرحانادا جاسالعان كەزدە بيىك بولىپ كورىنەدى. ويتكەنى ەسكەرتكىش  3,5 مەتر. بىراق تۇعىرعا قوندىرعان كەزدە كوزگە قوراش كورىنىپ تۇر. بۇل جەردە ەسكەرتكىش قادىر مىرزاليەۆتىڭ كەيپىنە كوپ ۇقساپ كەتكەن. بارلىعىن ايتاتىن بولسام، ەسكەرتكىشتى تولىقتاي وزگەرتۋ كەرەك بولادى. ەسكەرتكىشتەگى مۇقاعاليدىڭ تۇرىسىندا مەن تۇرا المادىم. ءبىر قول جامباستا، اياعى قيسايعان، ەكىنشى قولى بەلدە تۇر. ادامدا ونداي تۇرىس بولمايدى»، - دەيدى ابىلقايىر.

قانات ابىلقايىر مۇقاعالي ماقاتاەۆتىڭ 62 ميلليون تەڭگەلىك ەسكەرتكىشى مەن وسىدان بىرنەشە جىل بۇرىن 23 ميلليون تەڭگەگە جاسالعان جازۋشى ديداحمەت ءاشىمحانۇلىنىڭ مۇسىنىمەن سالىستارادى. ونىڭ سوزىنشە، ەكى ەسكەرتكىشتىڭ اراسى جەر مەن كوكتەي.

«ديداحمەت اعانىڭ ەسكەرتكىشىن جاسايتىن كەزدە ەسكيزىمەن تانىسقانبىز. ءبىز وعان ءوز پىكىرىمىزدى ايتقانبىز. سول كەزدە ديداحمەت اعانىڭ ەسكەرتكىشىنە تولىعىمەن 23 ميلليون تەڭگە كەتكەن. مىنا ەسكەرتكىشتى 30 ميلليون تەڭگە دەيىك. ەرتەڭ قولاسى ساپالى دەپ ايتۋى مۇمكىن. ار جاعىندا 10 ميلليون تەڭگەگە ماڭايىن قاتىرىپ تۇرىپ اباتتاندىرىپ تاستاۋعا بولادى. بۇلار «باسىندا ەسكەرتكىش قويۋعا 10 سوتتىق جەر بولگەنبىز، كەيىننەن 30 سوتتىق بولىپ كەتتى. سودان ەسكەرتكىش سولاي كورىنىپ قالدى» دەپ وتىر. بىراق ايدالاعا اپارىپ قويسا دا ءمۇسىن وزىنىكىن ايتىپ تۇرادى»، - دەيدى جۋرناليست.

فوتودا اقىن مۇقاعالي ماقاتاەۆ پەن جازۋشى ديداحمەت ءاشىمحانۇلىنىڭ مۇسىندەرى بەينەلەنگەن.

ماقالا جازۋ بارىسىندا قانات ابىلقايىر Facebook جەلىسىندە رايىمبەك اۋدانىندا الەۋمەتتىك جەلىدە ەسكەرتكىشتى ماقتاۋ ناۋقانى باستالعانىن ايتىپ جازبا جاريالادى.

«ەسكەرتكىشتىڭ بولمىسى ۇنادى»

مۇقاعالي ماقاتاەۆتىڭ ۇلى جۇلدىز ماقاتاەۆ ەسكەرتكىشكە كوڭىلى تولاتىنىن جانە سالىنعانعا دەيىن اپتا سايىن بارىپ كورىپ تۇرعانان ايتادى.

«تۇرعان جەرىن، فونىن بىلمەيمىن. ال ەسكەرتكىشتىڭ ءبىتىم، بولمىسى جەكە ءوز باسىما ۇنايدى. بويى كىشى بولىپ كەتتى دەپ جاتىر، وندايىن مەن كورمەدىم. ءمۇسىندى جاساپ جاتقاندا اپتا سايىن شاقىرىپ، كورسەتىپ تۇردى»، - دەيدى اقىننىڭ ۇلى.

ءوز كەزەگىندە الماتى وبلىستىق مادەنيەت باسقارماسىنىڭ باسشىسى مارلەن كولباەۆ باق وكىلدەرىنە «ەسكەرتكىشتى كورۋگە ارنايى كوميسسيا شىققانىن» مالىمدەدى.

داۋلى ەسكەرتكىشتى كىم جاسادى؟

مەملەكەتتىك ساتىپ الۋلار پورتالىندا ىلىنگەن اقپاراتتا نارىنقول اۋىلىنىڭ جاستار ساياباعىنا مۇقاعالي ماقاتاەۆقا ەسكەرتكىش ورناتۋعا رايىمبەك اۋدانى اكىمدىگىنىڭ باققوجا مۇقاي اتىنداعى اۋداندىق مادەنيەت ءۇيى تاپسىرىس بەرگەندىگى كورسەتىلگەن. كونكۋرستى «تايقازان» جشس جەڭىپ العان. تەندەردىڭ جالپى قۇنى 62 ميلليون تەڭگە. تاراپتار كەلىسىمشارتقا 2021.03.09 كۇنى قول قويعان.

اتالعان كومپانيا 2008 جىلى الماتى قالاسىندا تىركەلگەن. باسشىسى – مەيىرلان ازماعانبەتوۆ. كومپانيا 2019 جىلدان بەرى مەملەكەتتىك ساتىپ الۋ پورتالىندا ءتورت كەلىسىمشارت جاساسقان. بارلىعىندا ەسكەرتكىش ورناتۋعا تاپسىرىس العان. ءتورت كەلىسىمشارتتىڭ ۇشەۋىن تالدىقورعان قالالىق تۇرعىن ءۇي-كوممۋنالدىق شارۋاشىلىعى بولىمىمەن جاساسقان. كەلىسىمشارتتاردىڭ جالپى سومماسى 500 ميلليون تەڭگەنى قۇرايدى.

"تايقازان" جشس العان تەندەرلەردىڭ سىزباسى.

كونتەنت اقش دامۋ اگەنتتىگى (USAID) ارقىلى امەريكا حالقىنىڭ كومەگىمەن "MediaCAMP – ورتالىق ازيا باعدارلاماسى" اياسىندا دايىندالدى. (ۇجىمنىڭ اتى) اقپاراتتىڭ مازمۇنىنا تىكەلەي جاۋاپتى جəنە اقپارات USAID-تىڭ نەمەسە اقش ۇكىمەتىنىڭ، سونىمەن قاتار Internews ۇستانىمىنا ساي كەلمەۋى مۇمكىن.

"The Qazaq Times"