يراك جەرىندەگى اقش كۇشتەرى شەگىنبەك. فوتو: Anadolu Agency

امەريكا قۇراما شتاتتارى اۋعانستاننان عانا ەمەس، بيىل جىل سوڭىنا دەيىن يراكتان دا ءوزىنىڭ اسكەري كۇشتەرىن شەگىندىرىپ كەتپەك. ءبىر كۇن بۇرىن اقش پرەزيدەنتى جو بايدەن وسى شەشىمدى جاريا ەتتى. دەگەنمەن ول اقش پەن يراك ۇكىمەت كۇشتەرى اراسىنداعى ىنتىماقتاستىقتىڭ جالعاسا بەرەتىنىن ايتقان.

پرەزيدەنت بايدەن بۇل شەشىمدى جاريا ەتۋدەن بۇرىن يراك پرەمەر-ءمينيسترى مۇستافا ءال-كازيميمەن اق ۇيدە كەزدەسكەن بولاتىن. ال، يراكتان اسكەر شەگىندىرۋ جانە ودان كەيىنگى ەكى ۇكىمەت ورتاسىنداعى ىنتىماقتىڭ جالعاسۋى جايىندا كەلىسسوزدەر بۇعان دەيىن دە جالعاسىپ كەلە جاتقان بولاتىن.

يراك جەرىندەگى اۋقىمدى شەگىنىس ترامپ كەزىندە باستالعان. قازىر يراكتا اقشتىڭ 2500 جاۋىنگەرى «يسلام مەملەكەتى» تەررورلىق توبىنىڭ قالدىق كۇشتەرىنە قارسى وپەراتسيالار جۇرگىزۋدە. نەگىزىگەن يراك قارۋلى كۇشتەرىن جاتتىقتىرۋ مىندەتىن اتقارىپ كەلەدى.

كەي مالىمەتتەردە يراكتاعى امەريكالىق اسكەرلەردىڭ سانى وزگەرىسسىز ساقتالىپ قالۋى مۇمكىن دەگەن دە سوزدەر ايتىلادى. بۇل شەشىم يراك پرەمەر-ءمينيسترىن قوللداۋ ءۇشىن عانا جاسالماق. انىعىندا اقش ءۇشىن يراك جەرىندە اسكەر ۇستاۋ بارعان سايىن قيىنعا تۇسۋدە. سەبەبى، بىلتىر جىل باسىندا اقش كۇشتەرى يران رەۆوليۋتسيا ساقشىلار كورپۋسىنىڭ گەنەرالى قاسىم سۇلەيمەني (كاسەم سۋلايماني) جانە يراكتاعى يران قولداعان ءشيىت مۇسىلماندارنىڭ ليدەرىن ولتىرگەننەن كەيىن يراك جەرىندە اسكەر ۇستاۋ ۇلكەن پروبلەماعا اينالدى. سەبەبى، يران مەن وزگە دە شيىتتىك كۇشتەر تارابىنان كەلەتىن قاۋىپ بارعان سايىن كۇشەيدى.

يراكتىڭ ساياسي پارتيالارى دا ءتۇرلى قاۋىپكە قاراماستان ەلدەن بارلىق شەتەلدىك قارۋلى كۇشتەردىڭ شىعىپ كەتۋىن تالاپ ەتە باساتادى. بۇل اقش قولداۋىنداعى قازىرگى ۇكىمەتتى دە تىعىرىققا تىرەۋدە.

“The Qazaq Times”