س5+1 ديالوگى اۋعانستان تاقىرىبىن تالقىلادى. فوتو: قر ءسىم.

بۇگىن، 15 شىلدەدە، اقش جانە ورتا ازيا ەلدەرى سىرتقى ساياسي ۆەدومستۆو باسشىلارىنىڭ قاتىسقان س5+1 فورماتىنداعى كەزدەسۋ تاشكەنتتە ءوتتى. كەزەكتى وتىرىسقا قازاق، وزبەك، تاجىك جانە تۇركىمەن ەلدەرىنىڭ ءسىم جەتەكشىلەرى، قىرعىزستاننىڭ وزبەكستانداعى ەلشىسى جانە اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسىنىڭ ورىنباسارى قاتىسقان. بۇل تۋرالى قر ءسىم رەسمي سايتى مالىمدەدى.  

وتىرىستىڭ باستى تاقىرىبى اۋعانستان ماسەلەسى بولعانى ايتپاسا دا تۇسىنىكتى. وعان قوسىمشا پاندەميادان زارداپ شەككەن ەكونوميكانى قالپىنا كەلتىرۋ بويىنشا بىرلەسكەن كۇش-جىگەر تاقىرىپتارىن تالقىلاعان.

تاشكەنتتەگى باس قوسۋ.

سىرتقى ىستەر ءمينيسترىمىز مۇحتار تىلەۋبەردى ءوز كەزەگىندە س5+1 ديالوگىن دامىتۋدىڭ، بيوقاۋىپسىزدىك، ساۋدا-ينۆەستيتسيالىق ىنتىماقتاستىق جانە ەنەرگەتيكا سالاسىنداعى ىنتىماقتاستىقتى تەرەڭدەتۋدىڭ، ادام ساۋداسىنا قارسى ورتاق كۇرەستى جانداندىرۋدىڭ، ادام كاپيتالىن دامىتۋ بويىنشا ىستەستىكتەردىڭ ماڭىزدى ەكەنىن اتاپتى.

قر ءسىم جەتەكشىسى م.تىلەۋبەردى شارا اياسىندا پرەزيدەنت جو بايدەننىڭ ۇلتتىق قاۋىپسىزدىك جونىندەگى كەڭەسشىسىنىڭ ورىنباسارى ەليزابەت  شەرۆۋد-رەندالل باستاپ كەلگەن امەريكالىق دەلەگاتسيا قۇرامىمەن ەكىجاقتى كەزدەسۋ وتكىزگەن.

م.تىلەۋبەردى اقش دەلەگاتسياسى قۇرامىندا بايدەننىڭ ۇلتتىق قاۋىپسىزدىك جونىندەگى كەڭەسشىسىنىڭ ورىنباسارى ەليزابەت شەرۆۋد-رەندالل جانە اقش-تىڭ اۋعانستان بويىنششا بۇرىنعى وكىلى حاليد زالمايمەن كەزدەسىپ تۇر.

قازىرگى اۋعانستانداعى جاعدايدىڭ وزگەرىسى مەن دامۋىنان الىپ قاراعاندا س5+1 فورماتىنداعى ديالوگتىڭ اتالعان ماسەلەنى باستى تاقىرىپ ەتۋى زاڭدىلىق. اۋعانستاننان اسكەرىن شىعارىپ جاتقان قۇراما شتاتتار ايماقتاعى اسكەري مۇمكىندىكتەرىن ورتالىق ازيادا ساقتاپ قالعىسى كەلەتىنى بەلگىلى. بۇل ماقساتتا ۋاشينگتون وزبەكستانعا كوبىرەك ءۇمىت ارتىپ وتىرعانى دا انىق بولا ءتۇستى.

قر ءسىم جەتەكشىسى م.تىلەۋبەردى تاشكەنتتە.

كەزدەسۋ بارىسىندا تاراپتار قانداي كەلىسىمدەر مەن ۋادەلەرگە كەلىسكەنى قر ءسىم مالىمەتىندە انىق ايتىلماعان. دەگەنمەن، اتالعان ديالوگ فورماتى ۋاشينگتوننىڭ ايماقتاعى ىقپالىن ارتتىرۋعا باعىتتالعان نەگىزگى جوباسى بولعاندىقتان، الداعى ۋاقىتتا ايماق گەوستراتەگيالىق دامۋىنا وراي بۇل جوبانىڭ ماڭىزدىلىعى ارتا تۇسپەك.

“The Qazaq Times”