جوزەف بايدەن اق ۇيدە مالىمدەمە جاسادى. فوتو: VOA,

امەريكا قۇراما شتاتتارى اۋعانستانداعى اسكەري ميسسياسىن 31 تامىزدا اياقتايدى. اق ۇيدە مالىمدەمە جاساپ، امەريكا تاريحىنداعى ەڭ ۇزاق سوعىستى توقتاتۋ تۋرالى شەشىمىن تاعى ءبىر رەت قورعاعان پرەزيدەنت جوزەف بايدەن وسىنداي مالىمدەمە جاسادى.

بايدەن سوزىندە اقش-تىڭ 20 جىل ىشىندە 1 ترلن دوللار قارجى سارىپ ەتكەنىنە جانە 2400 امەريكالىق ساربازدىڭ قازا تاپقانىنىن باسا ايتا كەلىپ، قازىرگى امەريكالىقتاردى 20 جىل بۇرىنعى ساياساتقا بايلاۋدىڭ مۇمكىن ەمەس دەگەن پىكىرىن ءبىلدىردى. 2001 جىلى 11 قىركۇيەك وقيعاسىنان كەيىن قۇراما شتاتتار وزىنە شابۋىل جاساعان تەررورلىق توپتاردى «جازالاۋ» ماقساتىندا اۋعانستانعا كىرگەن ەدى.

اق ءۇي باسشىسى سوزىندە اقش ەندىگى باسىمدىق بەرەتىن باعىتتارى رەتىندە  كەلەسى پاندەمياعا دايىندىق، قىتايمەن ەكونوميكالىق باسەكەلەستىككە قابىلەتتىلىگىن ارتتىرۋ جانە «كليماتتىڭ وزگەرۋ قاۋپىنە» جاۋاپ بەرۋ دەپ كورسەتتى.

«ۇزاق مەرزىمنەن الىپ قاراعاندا، ءبىز وتكەن 20 جىل ءۇشىن ەمەس، الداعى 20 جىل ءۇشىن كۇرەسەتىن بولساق، ءبىز ءوز باسەكەلەستەرىمىزبەن شىنايى كەزدەسكەندە ولاردان كۇشتىرەك بولامىز»، – دەدى بايدەن سوزىندە.

بايدەن كەزەكتى تەلەجولداۋىن اق ۇيدە جاسادى. ول جۋرناليستەردى قابىلداۋدان بىرنەشە ساعات بۇرىن ونىڭ كەڭەسشىلەرى كامالا حارريس ەكەۋىنە اۋعانستانداعى سوڭعى جاعدايلار تۋرالى ەسەپ بەرگەن بولاتىن. ال، وسى سەيسەنبىدە پەنتاگون جاساعان مالىمدەمەدە اقش كۇشتەرى اۋعانستاننان شەگىنۋ پروتسەسىنىڭ 90 پايىزىن ورىنداپ بولعانىن ايتقان بولاتىن.

“The Qazaq Times”