امەريكالىقتار مىڭنان استام ازاماتتىق كولىكتى قالىدىرىپ كەتكەن. فوتو: BBس.

پرەزيدەنت جو بايدەننەن 11 قىركۇيەككە دەيىن ەلدەن شەگىنىپ شىعۋ بۇيرىعىن العان اۋعانستانداعى اقش كۇشتەرى ەلدەگى ازاماتتىق سوعىس قاتەرىنە قاراماستان اسكەري شەگىنىستىڭ قاربالاسىندا. اقش اسكەرلەرى ەلدەگى اسا ماڭىزدى بولعان باگرام اۋە بازاسىن تاستاپ كەتكەن. ءتىپتى، ماڭىزدى بازادان شەگىنىپ كەتكەنىنەن اۋعانستاننىڭ قاۋىپسىزدىك كۇشتەرى دە بەيحابار قالعان.

اۋعان قاۋىپسىزدىك كۇشتەرىنىڭ گەنەرالى اسادۋللا كوحيستانيدىڭ اقپارات قۇرالدارىنا بەرگەن مالىمەتىنە قاراعاندا، اقش اسكەرلەرى باگرامداعى بازادان دۇيسەنبى كۇنى تۇنگى ساعات 03:00 شاماسىندا شەگىنىپ كەتكەن. اۋعان ۇكىمەتتىك كۇشتەرى بىرنەشە ساعاتتان كەيىن عانا ماڭىزدى بازانىڭ بوس قالعانىنان حابار تاپقان.

اقش اسكەرلەرى ءتۇن جامىلىپ تاستاپ كەتكەن باگرام بازاسى ەلدەگى اسا ماڭىزدى اسكەري بازالاردىڭ ءبىرى. ونىڭ ۇستىنە باگرامدا 5 مىڭنان استام تالىپتەر قامالعان تۇرمە دە بار. قازىر «تاليبان» قوزعالىسىنىڭ قارۋلى كۇشتەرى باگدامعا شابۋىل جاساۋى مۇمكىن دەگەن قاۋىپپەن اۋعانستان قاۋىپسىزدىك كۇشتەرى سوعىس دايارلىعىندا تۇر.

كەشە، پەنتاگون تاراتقان مالىمدەمەدە، اۋعان جەرىندەگى اقش اسكەرى 90 پايىزعا جۋىق شەگىنىپ بولعانى ايتىلدى. ال، اقش-تىڭ اۋعانستانداعى اسكەري قولباسشىسىنىڭ وكىلى باگرامنان اسكەري ەۆاكۋاتسيا جاساۋ تۋرالى اۋعانستان پرەزيدەنتىمەن الدىن الا كەلىسىلگەنى جونىندە ايتقان.

اۋعانستاننان اقش جانە ناتو اسكەرلەرىنىڭ شەگىنۋىنە ىلەسە "تاليبان" ۇيىمى ەلدەگى باقىلاۋ اۋماعىن كەڭەيتۋگە تىرىسۋدا. كوپتەگەن پروۆينتسيا ورتالىقتارىن باسىپ العانى تۋرالى حابارلار تاراۋدا. دەگەنمەن، اۋعانستان قاۋىپسىزدىك كۇشتەرى بار كۇشتەرىن سالىپ اكىمشىلىك ورتالىقتاردى كەرى قايتارىپ الۋعا تىرىسۋدا.

“The Qazaq Times”