الماتىدا ەلەكتروساموكاتپەن باعدارشامنان ءوتىپ بارا جاتقان ەر ادام. فوتو: Tengrinews.kz

قازاقستاندا ەلەكتروساموكاتپەن جۇرۋگە شەكتەۋ قويىلۋى مۇمكىن. بۇل تۋرالى بۇگىن، 11 ماۋسىمدا حالىققا ەسەپ بەرۋ جيىنىندا ىشكى ىستەر ءمينيسترى ەرلان تۇرعىمباەۆ مالىمدەدى. 

ءمينيستردىڭ ايتۋىنا قاراعاندا، كوشە مەن تراسسادا ەلەكتروساموكاتپەن جۇرۋگە مۇلدە تىيىم سالىنعان.

"جول قوزعالىسى تۋرالى زاڭدا ساموكات سياقتى كولىك قۇرالى كورسەتىلمەگەن. ونىڭ بىرنەشە سەبەبى بار. اتالعان كولىك قۇرالىنىڭ سەرتيفيكاتسياسى جوق. ەكىنشىدەن، ولار كولىك قۇرالىندا بولۋى ءتيىس تالاپتارعا سايكەس ەمەس، ياعني، دوڭگەلەك ديامەترى، توقتاتۋ جۇيەسى، گاباريتتىك فونار، ارتقى اينا، قاۋىپسىزدىك جۇيەسى جوق. قازىر كوشە مەن تراسسادا ەلەكتروساموكاتپەن جۇرۋگە مۇلدە تىيىم سالىنعان. ولار جول قوزعالىسىنىڭ قاتىسۋشىسى بولماعاندىقتان ولاردىڭ قوزعالىسىنا شەكتەۋ قويىلادى" دەدى تۇرعىمباەۆ.

ونىڭ ايتۋىنشا، ەلەكتروساموكات پايدالانۋعا قاتىستى زاڭناماعا وزگەرىستەر ەنگىزىلۋى مۇمكىن.

"قازىر ۆەلوسيپەد جولدارى مەن تروتۋارلارعا قاتىستى ماسەلە قارالىپ جاتىر، سەبەبى ساموكاتتاردىڭ جىلدامدىعى ساعاتىنا 20 شاقىرىمدى قۇرايدى. كەيبىر ەلدەردە شەكتەۋ ەنگىزىلگەن. ۇلىبريتانيادا جەكەلەگەن اۋماقتان باسقا جەرلەردە ساموكاتتاردى پايدالانۋعا تىيىم سالىنعان. ەۋروپانىڭ وزگە ەلدەرىندە دە جىلدامدىق رەجيمىنە بايلانىستى شەكتەۋ ەنگىزىلىپ جاتىر. بىزدە بۇل ماسەلە رەتتەلمەگەن. قازىر بارلىق مۇددەلى ورگان قىزمەتكەرلەرىنەن قۇرالعان جۇمىس توبى قۇرىلدى. مەنىڭ ويىمشا، وسى توپتىڭ شەشىمىنە قاراي زاڭناماعا وزگەرىستەر ەنگىزىلەدى دەپ ويلايمىن" دەدى ول.

"The Qazaq Times"