گرۋزيا ءوز اۋماعىندا اقش-پەن بىرلەسىپ اسكەري جاتتىعۋ بازاسىن سالماق. ول ءۇشىن گرۋزيا ۇكىمەتى 4 ميلليون دوللار قارجى ءبولۋدى جوسپارلاپ وتىر.

«بۇل اسكەري بازا گەرمانيادا ورنالاسقان اقش پەن ناتو اسكەريلەرى بىرلەسىپ دايىندالاتىن حوحەنفەلس اسكەري بازاسىنا ۇقساس بولادى» - دەدى گرۋزيا قورعانىس ءمينيسترى لەۆان يزوريا.

2016 جىلدىڭ شىلدە ايىندا تبليسيدە اقش-تىڭ سول كەزدەگى مەملەكەتتىك حاتشىسى دجون كەرريمەن، گرۋزيانىڭ پرەمەر-ءمينيسترى گەورگي كۆيريكاشۆيلي اسكەري قورعانىس سالاسىندا بىرلەسىپ جۇمىس جاساۋعا بايلانىستى مەماراندۋمعا قول قويعان ەدى.

«گرۋزيانىڭ اقش-پەن بىرلەسىپ اسكەري بازا سالۋى دەگەنىمىز. ءبىر جىل بويى گرۋزيا اۋماعىندا اقش اسكەرىنەن بولەك، ناتو-نىڭ دا اسكەري جاساقتارى بولادى دەگەن ءسوز. ول، رەسەي تاراپىنان گرۋزياعا جاسالۋى مۇمكىن ارانداتۋشى ارەكەتتەردىڭ الدىن الۋعا كومەكتەسەدى» - دەيدى، گرۋزيالىق اسكەري-ساراپتامالىق «ارسەنال» جۋرنالىنىڭ رەداكتورى يراكلي الاداشۆيلي.

ەستەرىڭىزگە سالايىق 2008 جىلى رەسەي قارۋلى قاقتىعىس ارقىلى گرۋزيادان وڭتۇستىك وسەتيا مەن ابحازيانى ءبولىپ العان بولاتىن. سودان بەرى گرۋزيا رەسەيمەن ديپلوماتيالىق قارىم-قاتىناسىن ۇزگەن.

“The Qazaq Times”